Адыгэ щIалэм и ехъулIэныгъэхэр

Урысей Федерацэм и Президент Путин Владимир УФ-м ЕгъэджэныгъэмкIэ и министерствэмрэ «Урысей-I» телеканалымрэ яхуищIа унафэм ипкъ иткIэ къызэрагъэпэща «Класс лэжьыгъэ» («Классная тема») теленэтыным и бжьыгъуэ зэфIэхьым нэсахэм я цIэ-унагъуэцIэхэр иджыблагъэ къраIуащ. ФIыуэ ялъагъу, пщIэ зыхуащI егъэджакIуэхэм я псалъэрэ я Iуэху еплъыкIэрэ зэхахын щхьэкIэ цIыху 232 964 хуэдиз IэIэтым хэтащ.

IэIэтым ипкъ иткIэ «Класс лэжьыгъэ» теленэтыным и бжьыгъуэ зэфIэхьым хэтыну цIыхуиблыр нахуэ хъуащ. Зэхьэзэхуэр бжьыхьэкIэхэм деж екIуэкIынущ, ауэ иджыпсту щыщIэдзауэ абы къыхэжаныкIахэм зыхуагъэхьэзыр, щхьэж зыпэрыт IэнатIэмрэ иригъаджэ дерсымкIэ хуэзэфIэкIынумрэ щIэщыгъуэу утыку кърилъхьэфынумкIэ я Iэмалхэр зэрагъэуIуж.

Бжьыгъуэ зэфIэхьым нэса цIыхуиблым яхэтщ Налшык къалэм дэт 2-нэ лицейм физикэмрэ астрономиемкIэ и егъэджакIуэ Къэшэж Аслъэн. ЕгъэджакIуэм зэрыжиIэмкIэ, иригъэкIуэкI лэжьыгъэр щыIэ мардэхэм тету къызэригъэпэщми, къупхъэм ирихуэну иужь иткъым. «НыбжьыщIэм и щIэныгъэр здынэсыр къипщытэжыфын щхьэкIэ, абы къару ирихьэлIэм и инагъымрэ и пэжагъымрэ егъэплъын хуейщ. Псалъэм и хьэтыркIэ, сэ куэдрэ сабийхэм солъэIу гъэпцIалъэ (шпаргалка) цIыкIухэр ягъэхьэзырыну. Си фIэщ мэхъу ар щIэныгъэм и къэкIуапIэу зэрыщытыр, сыту жыпIэмэ упщIэхэм я жэуапыр абыхэм къалъыхъуэ, нэхъыщхьэу къалъытэр къыхагъэщын икIи зэрагъэпэщын хуей мэхъу, ар апхуэдэу зэбгъэуIун щхьэкIэ, узэджа псоми зэ урикIуэжын хуейуэ IэнатIэ уоухуэ. Ауэ а гъэпцIалъэхэр дерсхэм къыщагъэсэбэпыжу здэркъым. Я щхьэм къинар утыку зэращIыжыфыр къапщытэжыну къыхузоджэ», – щыжеIа Къэшэж Аслъэн игъэхьэзыра видеогъэлъэгъуэныгъэ кIэщIым.

«Класс лэжьыгъэ» теленэтыным хэтыну хуейуэ лъэIу тхылъ къезыгъэхьахэм я бжыгъэр цIыху минихым щIегъу. Урысейм и щIыналъэхэм псоми къарыкIа тхылъхэр къэпщытакIуэхэм шыбзэм щIигъэкIа нэужьутыку зэпеуэ зэмылIэужьыгъуэхэр екIуэкIащ. ПэIудзауэ екIуэкIа хэхыныгъэхэм нэсар цIыху 35-ращ: ахэр биологиемкIэ, физикэмкIэ, есэпымкIэ, химиемкIэ, географиемкIэ, тхыдэмкIэ, урысыбзэмкIэ егъэджакIуэхэрщ. КъыхэжаныкIахэм папщIэ къызэрагъэпэща урысейпсо IэIэтыр «ВКонтакте» интернет утыкум щекIуэкIащ.

Зэпеуэм зыхуигъэувыжа къалэнхэм ящыщщ иджырей егъэджакIуэм и пщIэр къэIэтыныр, а IэщIагъэр ди къэралым дежкIэ нэхъ мыхьэнэ ин дыдэ зиIэхэм зэращыщыр цIыхум и фIэщ щIыныр. Телезэхьэзэхуэм щытекIуам езым и уней нэтын урысейпсо телевиденэм къыщызэригъэпэщыжыну Iэмал иIэнущ.

Зэпеуэр зэрекIуэкIым дыкIэлъоплъ икIи ди лъэпкъэгъу щIалэм и Iуэхур ефIэкIуэну, и кIэныр къикIыу текIуэныгъэр зыIэригъэхьэну ди гуапэщ.