Псори и чэзум нэдгъэсынущ

КIуэкIуэ Казбек:

КъБР-м и Iэтащхьэр хэтащ щIыналъэм ­зегъэужьынымкIэ Правительствэм и комиссэм и штабым и зэIущIэм. 

УФ-м и Правительствэм и УнафэщIым и къуэдзэ Хуснуллин Марат зи унафэщI штабым иригъэкIуэкIа видеозэIущIэм хэтащ КъБР-м и Iэтащхьэри. Абы щытепсэлъыхьащ лъэпкъ, къэрал проектхэр 2022 - 2024 гъэхэм зэрагъэзэщIэнум. 
«Формирование городской среды» щIыналъэ проектым и «Жилье и городская среда» лъэпкъ Iуэхум ипкъ иткIэ, Къэбэрдей-Балъкъэр Республикэм къыщагъэщIэрэщIэжащ пщIантIэ 55-рэ щIыпIэ 14-рэ. «Псы къабзэ» щIыналъэ проектым ­тету Тэрч къалэ, Анзорей, Куба, Лашынкъей, Нартан, Къулъкъужын Ипщэмрэ Ищхъэрэмрэ, Былым, Сэрмакъ жыла­гъуэхэм псы къыщыщIаш щIыпIэ 13 зыхуей хуагъэзащ. 
«Здравоохранение», «Культура» проектхэм я Iыхьэщ онкодиспансерымрэ ЩIалэгъуалэ творчествэмкIэ унэмрэ ухуэныр. Щхьэусыгъуэ зэхуэмыдэхэм къыхэкIыу къагъэувыIауэ щыта Iуэхухэр ирагъэжьэжащ 2022 гъэм. Къищы­нэмыщIауэ, гъэр имыкI щIыкIэ зыхуей хуагъэзэнущ гъуэгу ­километри 180-рэ, абы щыщу километр 70-м уэздыгъэ трагъэувэнущ. 
«Современная школа» лъэпкъ Iуэхур ягъэзащIэу курыт еджапIэхэр дащIыхьащ Прохладнэ, Нарткъалэ, Куба. Сабии 140-рэ зыщIэхуэ садыр мыгувэу щатын хуейщ Солдатскэ ­къуажэм.
«Пэжщ, а ухуэныгъэхэр республикэм щедгъэкIуэкI лэжьыгъэм и зы Iыхьэ мащIэу аращ. ЕхъулIэныгъэшхуэхэр къагъэлъагъуэу лъэпкъ проектхэр щагъэзащIэ щIыналъэхэм ящыщщ Къэбэрдей-Балъкъэрыр. Дубзыхуа псори и чэзум нэдгъэсынущ!», - щыжиIащ КIуэкIуэм и телеграм-каналым.