Шей пщтыркIэ

Къэбэрдей-Балъкъэрым и полицейхэм, жылагъуэм, муниципалитетым я лIыкIуэхэмрэ волонтёрхэмрэ машинэхэм гъэсыныпхъэ щрагъахъуэ щIыпIэхэм къыщызэрагъэпэщащ шынагъуэншагъэм ехьэлIа Iуэху щхьэпэхэр.  

Iуэхур къезыхьэжьахэм «Шоферыр шейм игъэхуэбэнущ!» къыхуеджэныгъэм щIэту егуэпащ Май районым руль щызыIыгъхэм.

Къэрал Автоиснпекцэм и лэжьакIуэхэмрэ балигъ мыхъуахэм я IуэхухэмкIэ инспекторхэмрэ шоферхэм зыхуагъэзащ, Урысей МВД-м Май районым щиIэ къудамэм дэлажьэ Жылагъуэ советым и лIыкIуэхэу Портниковэ Юлие, Подковыровэ Кристинэрэ Пуртовэ Юлиерэ, волонтерхэр, щIалэгъуалэ советым хэтхэр, Май районым и администрацэм щэнхабзэмкIэ и къудамэм и лэжьакIуэхэр ящIыгъуу.

Районым и автозаправкэхэм волонтерхэм рулым дэсхэм жраIащ чэфу авторанспортыр зебгъакIуэмэ кърикIуэнухэр, къыхагъэщащ езы шоферым и гъащIэмрэ узыншагъэмрэ имызакъуэу, гъуэгум тет адрейхэмкIи зэрышынагъуэр.

Акцэм хэтхэм щIымахуэ щIыIэм шей пщтыркIэ загъэхуэбэну хуагъэлъагъуэри шофер пщIы бжыгъэхэр абы ирагъэфащ.

Iуэхум хэтахэм волонтерхэмрэ полицейхэмрэ фIыщIэ хуащIащ апхуэдэ гулъытэм папщIэ икIи къагъэгугъащ сытым деж Гъуэгум зэрыщызекIуэ хабзэм тетыну.