ФIыкIэ узыгъэгугъэ

КIуэкIуэ Казбек «Газпром» акционер зэгухьэ­ныгъэм (ПАО) и департаментым и унафэщI Марков Владимиррэ «Газпром меж­регионгаз» ООО-м и тхьэмадэ Густов Сергейрэ яхуэзащ. Ахэр тепсэлъыхьащ 2021 - 2025 гъэхэм ятещIыхьа программэм ипкъ иткIэ республикэм газыр щызэлъэгъэIэсынымкIэ щрагъэ­кIуэкI лэ­жьыгъэр зы­хуэдэм. 

Къэдгъэлъагъуэмэ, 2022 гъэм къриубыдэу Тэрч районым щаукъуэ­диящ газ зрикIуэ бжьамиишхуэу ­къуажэ зэхуакухэр зэпызыщIэр, къагъэсэ­бэпар зыхуэдизыр къэзыгъэлъагъуэ Iэмэпсымэхэри щIыпIэ зыбжанэм щагъэуващ. Мы илъэсым я ­мурадщ газыр зэзыгъэзахуэ станцхэм ящыщу 9-р къагъэщIэрэщIэжыну, ар зэбгрызыш бжьамийхэм зы къыхагъэ­хъуэну.
«Программэр IэмалыфIщ Къэбэрдей-Балъкъэ­рым и цIыхухэм я псэукIэ, экономикэ я лъэныкъуэкIэ нэхъри зиужьынымкIэ. Псалъэм папщIэ, Тыр­ныауз щыIэ пцIий къыщIэхыпIэм газ зэретшалIэр, зэрыгурыIуэгъуэщи, щхьэ­пэщ а комбинатыр ла­жьэу ирагъэжьэжынымкIэ, зэрыщытам ефIэ­кIыжу зиужьыжынымкIэ. Ди мурадщ республикэм и про­мышленностым зыкъегъэужьыжыным телажьэ IуэхущIапIэ псоми 2026 гъэм ирихьэлIэу газ етшэ­лIэну», - къыхигъэщащ Густов Сергей. 
ЗэIущIэм хэтахэр тепсэлъыхьащ газ уасэр зэрат щIыкIэм, и къэгъэсэ­бэ­пыкIэр шынагъуэншэу зэрыщагъэтыпхъэм, нэгъуэщIхэми. Щхьэхуэу и гугъу ящIащ зи Iуэху нэхъ хуэмыщIахэм газ яIэ хъуным ­теухуауэ щыIэ хэкIыпIэхэм. 
ЗэIущIэм къыщыхагъэщащ УФ-м и Президентым и унафэкIэ социальнэ IуэхущIапIэхэм газыр ешэлIэ­ныр къэралым и Правительствэм пIалъэншэ зэ­рищIам. Апхуэдэу, ди республикэр къэтщтэнщи, Ды­гулыб­гъуей къуажэм дэт поликлиникэу гъэ кIуам мардэщIэхэм къитIасэу зэрагъэпэщыжам махуитI ипэкIэ газ ирашэлIащ.
КъБР-м и Iэтащхьэ КIуэкIуэ Казбек Марков Вла­димиррэ Густов Сергейрэ фIыщIэ яхуищIащ цIыху­хэм я псэукIэр зыхуэдэнумкIэ мыхьэнэшхуэ зиIэ ­Iуэ­хухэмкIэ республикэм зэрызыкъыщIагъакъуэм папщIэ.

Поделиться: