Дзюдо

Дзюдо

 «Динамо» спорт зэгухьэныгъэр илъэсищэ зэрырикъур ягъэлъапIэ

Налшык къалэ дэт «Гладиатор» спорткомплексым гъатхэпэм и 4 – 5-хэм щекIуэкIащ дзюдомкIэ урысейпсо зэхьэзэхуэ. Ар хуэгъэзауэ щытат «Динамо» Урысейпсо физкультурэ спорт зэгухьэныгъэр къызэрызэрагъэпэщрэ илъэсищэ зэрырикъум.

Зэпеуэм хэтащ ди къэралым и щIыналъэ 14-м къикIа, зи ныбжьыр илъэс 23-м фIэмыкIа щIалэу, хъыджэбзу 180-м нэблагъэ. А зэхьэзэхуэм ди спортсменхэм медалибл щызыIэрагъэхьащ.

Зи хьэлъагъыр килограмм 81-м нэсхэм я гупым щыбэна Байсиев Таулан дыщэр къихьащ.

Дыжьыныр зыIэрагъэхьащ Мысыр Каринэ (кг 48-рэ), Шэджэм БетIал (кг 66-рэ), Мырзэбэч Ильяс (кг 100) сымэ.

Балъкъыз Алихъан (кг 81-рэ), Къуныжь Ролан (кг 90), Быф Идар (кг 100) сымэ домбеякъыр зыIэрагъэхьащ.

Дзюдо

Тегеран дыжьыныр къыщахьащ

Ираным и къалащхьэ Тегеран къалэм иджыблагъэ щекIуэкIащ Перс псыдэжыпIэм и кубокыр дзюдомкIэ къэхьыным хуэгъэза дунейпсо зэхьэзэхуэ.

А зэпеуэм хэтащ Ираным, Иракым, Афганистаным щыщхэр, апхуэдэуи Къэбэрдей-Балъкъэрым и «Локомотив» спорт клубым и гъэсэнхэр. Командэ 12 зи гугъу тщIы кубокым щIэбэнащ.

Финалым кIуа ди щIалэхэр хьэрхуэрэгъу къахуэхъуа хэгъэрейхэм къыхагъэщIащ икIи етIуанэ увыпIэр яубыдащ.

Гимнастикэ

Урысейм и кубокыр Налшык щагъэджэгу

Урысейм гимнастикэмкIэ и кубокыр къэхьыным хуэгъэза зэпеуэ Налшык къалэ щекIуэкIащ.

Абы хэтащ зи ныбжьыр илъэс 16 ирикъуахэм къыщыщIэдзауэ пщащэ нэхъыжьхэр - псори зэхэту командэ 21-рэ.

УвыпIэ нэхъыщхьищыр къэзыхьахэм хуагъэфэщащ УФ-м спортымкIэ и мастер цIэ лъапIэр. КъищынэмыщIауи, абыхэм Iэмал ягъуэтащ ди къэралым и цIэкIэ дунейпсо зэхьэзэхуэхэм хэтыну.

Зэпеуэм увыпIэ нэхъыщхьищыр щаубыдащ Москва къикIахэм. Япэ увыпIэр «Экспрессия»-м, етIуанэр «Мадоннэ»-м, ещанэр «Амуаж» командэхэм я хъыджэбзхэм хуагъэфэщащ.

Урысейм и Кубокыр къэхьыным ехьэлIауэ «Бгыхэм я макъамэ зыфIаща зэхьэзэхуэм хэтащ илъэс 12 - 14 зи ныбжьхэр. Абы япэ увыпIэр щиубыдащ Калмыкъым и «Аура» гупым. ЕтIуанэ хъуахэщ КъБР-м и «Iуащхьэмахуэр». Ещанэ увыпIэри зыIэрагъэхьащ ди республикэм и «Iуащхьэмахуэ-Олимп» гупым.

Илъэси 10 – 12 хъухэм я зэхьэзэхуэм япэ увыпIэр щызыIэрагъэхьащ Москва областым къикIа «Сириус» гупым. ЕтIуанэр Свердлов областым щыщ «Легенда»-м иратащ, ещанэ хъуащ Къэбэрдей-Балъкъэрым и «Iуащхьэмахуэ и щыгум» гупыр.

Шахмат

Бзылъхугъэхэм я чемпионат

Налшык шахматымкIэ и уардэунэ «Каисса»-м иджыблагъэ щекIуэкIащ КъБР-м классическэ шахматымкIэ и 65-нэ цIыхубз чемпионат.

КIэух зэхьэзэхуэм щызэрихьэлIэжат республикэм шахматымкIэ щынэхъ лъэрызехьэ цIыхубзипщI. А зэпеуэм щытекIуауэ, КъБР-м и чемпион цIэри хуэфащэу къалъытащ Кабардиковэ Миланэ. ЕтIуанэ хъуащ Мэрзей Лилианэ. Ещанэ увыпIэр къылъысащ Жантудуевэ Амалие.