Мылъкур къагъэсэбэп

УФ-м и Правительствэм и УнафэщIым и къуэдзэ Хуснуллин Марат видео­конференц мардэм тету иджыблагъэ иригъэкIуэ­кIащ Урысей Федерацэм и Правительствэм щIыналъэ зыужьыныгъэмкIэ и комиссэм и Президиумым и зэIущIэ. Абы хэтащ Къэ­бэрдей-Балъкъэрым и Iэтащхьэ КIуэкIуэ Казбек.

ЗэIущIэм вице-премье­рыр щытепсэлъыхьащ ­УФ-м и Правительствэм ухуэныгъэм халъхьэ мылъкум и гъэлэжьэкIэ пIалъэр нэхъ кIэщI зэрищIыну Iэмалхэм зэрегупсысым. Ар яхузэфIэкIмэ, цIыхухэр ­нэхъ псынщIэу унэхэм щIэ­тIысхьэжынущ, ухуакIуэхэми лэжьыгъэм трагъэкIуэ­дэнур нэхъ мащIэщ. Ику иту къапщтэмэ, къэралым иужь­рей зэманым унэхэр плIыкIэ нэхъ псынщIэу зэтралъхьэн щыщIадзащ, а Iуэхур адэкIи ирагъэфIэ­кIуэнущ. 
КъинэмыщIауэ, инженер къэхутэныгъэхэми проект лэжьыгъэхэми экспертхэр кIэлъыплъыну хуит зыщI унафэм Iэ щIадзакIэщ. Уасэ гъэувынымкIэ къэралым и федеральнэ хабзэм ипкъ иткIэ, ухуэныгъэ лэжьыгъэхэм ятекIуэдэну мылъкур «ресурс-индекс» IэмалкIэ (уасэхэм зэрызихъуэ­жым елъытауэ) ягъэувыну Iэмал яIэнущ а дэфтэрым и фIыгъэкIэ. 
Иджыри зы зэхъуэкIыныгъэщIэ Iуэхум къыхалъхьэнущ. ДяпэкIэ псоми къагъэсэбэп унэхэр яухуэн папщIэ, хуитыныгъэ щхьэхуэ къеIыхын хуейуэ щытынукъым. Абы ухуакIуэхэм лэ­жьыгъэм трагъэкIуадэ мылъ­кур игъэмэщIэнущ, езы ухуэныгъэхэри нэхъ тыншу къыхатхыкIынущ. 
2023 - 2025 гъэхэм къы­халъхьа лъэпкъ, федераль­нэ программэхэм я гъэ­зэ­щIэ­кIэм тепсэлъыхьащ УФ-м ухуэныгъэмрэ псэу­пIэ-коммунальнэ хозяйст­вэмкIэ и министр Файзуллин Ирек. 
«Капитальнэ ухуэныгъэ­хэмрэ псэупIэ-коммунальнэ хозяйствэмрэ» унэтIыныгъэмкIэ Къэбэрдей-Балъкъэрым унэ 210-рэ щаухуэнущ, сом меларди 6,9-рэ текIуадэу. Гъуэгуи 109-рэ тралъхьэнущ, сом меларди 4 нэхърэ мынэхъ мащIэ ихьу. Егъэджэныгъэм, узын­шагъэм, щэнхабзэм епха ухуэныгъэ 60 зэрагъэпэщыжынущ, сом мелард 1,9-рэ и уасэу. Лэжьыгъэ псоми и ужь ихьакIэщ. 
ЗэIущIэм инфраструктурэ зэгъэпэщыным епха про­ект­хэр и чэзум, зыхуей хуэ­зэу зэрызэфIагъэкIыпхъэми и гугъу щащIащ.