КъБР-м и Правительствэм и УнафэщI Мусуков Алий иригъэкIуэкIащ Iуэхугъуэ щхьэхуэхэр къыщаIэта зэIущIэ.
«Дыкъэзыухъуреихь дунейр хъумэнымрэ Къэбэрдей-Балъкъэрым и щIыуэпсым и хъугъуэфIыгъуэхэр къэгъэсэбэпынымкIэ» республикэм и къэрал программэм зэхъуэкIыныгъэхэр хэлъхьэным и проектыр игъэхьэзыращ КъБР-м и Правительствэм. КъБР-м щIыуэпс хъугъуэфIыгъуэхэмрэ экологиемкIэ и министрым и къуэдзэ Табыхъу Аслъэнджэрий тепсэлъыхьащ ахэр зыхуэдэм.
- ЗэхъуэкIыныгъэхэр тещIыхьащ уэлбанэ кIыхьым и зэранкIэ гъуэгухэм къытелъэда ятIэпсыр гъэкъэбзэным. ЯтIэпсыр зэрыж ухуэныгъэ щагъэувынущ Герхожан Су псым и IущIапIэм щегъэжьауэ Бахъсэныпсым нэс. Iуэхур гъэзэщIа хъунущ «Псы хъугъуэфIыгъуэр къэгъэсэбэпын» программэм тету, - жиIащ абы.
IэмэпсымэщIэхэр къэзыщэху промышленнэ IуэхущIапIэхэм абы трагъэкIуадэ ахъшэм щыщ хуапшыну КъБР-м и республикэ бюджетым къыхэкI субсидиер зэрыратыну щIыкIэр игъэбелджылащ КъБР-м промышленностымкIэ, энергетикэмрэ сатумкIэ и министрым и къуэдзэ КIарэ Елдар. Ар ягъэбелджылащ 2014 гъэ лъандэрэ щыIэ «Промышленностым зегъэужьынымрэ хьэрхуэрэгъухэм ефIэкIыным елэжьынымкIэ» щыIэ программэмрэ «КъБР-м промышленностымрэ сату Iуэхумрэ зыщегъэужьынымкIэ» подпрограммэмрэ тету.
- IуэхущIапIэхэр зыхэтыну зэпеуэм щытекIуэхэм субсидиер иратынущ япшыныжын хуэмейуэ. Ауэ къащэхуну Iэмэпсымэхэм текIуэдэну мылъкум и процент 50 нэхърэ нэхъыбэ ятынукъым, ахъшэкIэ къэплъытэми, ар сом мелуан 20-м фIэкIынукъым, - жиIащ къэпсэлъам.
КIарэ Елдар къытеувыIащ унагъуэхэм къыщIах кIэрыхубжьэрыхум иращIэнумкIэ щыIэ «Урысей экологие оператор» IуэхущIапIэм, Ставрополь крайм и Правительствэм, КъБР-м и Правительствэм Ставрополь крайм экопромышленнэ паркым зыщегъэужьыным и лъэныкъуэкIэ я зэгурыIуэныгъэм.
«Къат куэду зэтет унэхэм щыпсэухэм зэдай мылъкур зехьэным теухуауэ» КъБР-м и законым зэхъуэкIыныгъэ хэлъхьэным и проектыр игъэбелджылащ КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим.
Программэм хеубыдэ республикэм щыIэ къат куэду зэтет унэ псори. Абыхэм щыпсэухэм ар зехьэным папщIэ ят ахъшэр халъхьэ программэр ягъэбелджыла нэужь илъэситхум къриубыдэу. 2020 гъэм республикэм и программэм хабжащ къат куэду зэтет уни 171-рэ. Ар метр зэбгъузэнатIэ мин 428,8-рэ мэхъу. Къапщтэмэ, унэхэр зехьэным текIуэдэнущ сом меларди 2,9-рэ. Уасэхэр къабжащ 2023 гъэм къекIуэкIым тещIыхьауэ. Унэхэр зехьэным хухах ахъшэр зэрат илъэситху пIалъэр кIыхьлIыхьу къалъытэ. Ар ягъэмэщIэну я мурадщ мази 8-м нэсыху.
Сабий садхэмрэ егъэджэныгъэ IуэхущIапIэхэмрэ щIэныгъэ зэрыщрагъэгъуэтым, абыхэм я лэжьакIуэхэм улахуэ зэрырат щIыкIэм теухуауэ 2023 гъэмрэ къыкIэлъыкIуэ 2024, 2025 илъэсхэмрэ тещIыхьауэ къалэхэмрэ къуажэхэмрэ хухах бюджетым халъхьэну мылъкум и IуэхукIэ къэпсэлъащ КъБР-м егъэджэныгъэмрэ щIэныгъэмкIэ и министрым и къуэдзэ Мокаев Ачемиз. Ар къытеувыIащ сабий зеиншэхэмрэ адэ-анэ зыщхьэщымытыжхэмрэ папщIэ щыIэ IуэхущIапIэхэр 2024 гъэм фIэмыкIыу мардэ щхьэхуэм тегъэувэнымкIэ Правительствэм и проектым. Школ-интернат фIэщыгъэр зэхъуэкIын хуейуэ къалъытэ «Сабий зеиншэхэмрэ адэ-анэ зыщхьэщымытыжхэмрэ гъащIэм хэзыгъэгъуазэ центр» жиIэу. Центрым щыIэнущ сабий зеиншэ къалъхуагъащIэхэм щегъэжьауэ илъэс 23 ныбжьым нэс.
КъБР-м лэжьыгъэмрэ цIыхухэм псэуныгъэм теухуауэ къащхьэщыжынымкIэ и министр Асанов Алим тепсэлъыхьащ республикэм и унагъуэ хуэмыщIахэм, гугъуехь пэщIэхуахэм зэрадэIэпыкъуну щIыкIэр зыгъэбелджылы Iуэхугъуищым.