КъБР-м и Iэтащхьэ КIуэкIуэ Казбекрэ КъБР-м узыншагъэр хъумэнымкIэ и министр Къалэбатэ Рустамрэ Правительствэм и Унэм щызэхуэзащ. Ахэр тепсэлъыхьащ узыншагъэр хъумэн IэнатIэм и зыужьыныгъэмрэ медицинэ IуэхущIапIэхэм я лэжьыгъэмрэ.
2023 гъэм щIадзауэ Нашык къалэ дэт 2-нэ, 3-нэ поликлиникэхэм я къудамэхэм, Республикэ сабий клиникэ центрым и 2-нэ, 4-нэ поликлиникэ къудамэхэм, Прохладнэ, Бахъсэн щIыналъэ сымаджэщхэм я поликлиникэ къудамэхэм, Тэрч район сымаджэщым и сабий отделением зэгъэпэщыжыныгъэ лэжьыгъэхэр щокIуэкI. Ахэр псори мы гъэм зэфIагъэкIыну я мурадщ. Апхуэдэуи Кэнжэ амбулаторэщIэ щаухуэнущ дызэрыт илъэсым.
Республикэм и щIыналъэхэм щыIэ медицинэ IуэхущIапIэхэм щхьэкIэ автомобиль псынщIэу - 19, диагностикэ зэращI Iэмэпсымэу 80 къащэхуащ.
Зэгъэпэщыжыныгъэ лэжьыгъэм иужь зэрихьэрэ, IуэхущIапIэ 23-р зыхуей хуагъэзэжащ, узыншагъэр щахъумэ IуэхущIапIэу 6 щIэуэ ящIащ е къагъэщIэрэщIэжащ, медицинэ Iэмэпсымэу - 200, поликлиникэхэмрэ къуажэ амбулаторэхэм папщIэ автомобилу 60 къащэхуащ.
2024 гъэм IуэхущIапIитху ухуэн щIадзэнущ, 15-р зэрагъэзэхуэжынущ, зыхуей хуагъэзэжынухэм ящыщу 10-р дызэрыхьа илъэсым яухынущ. Звезднэ жылэм амбулаторэщIэ щаухуэнущ. Министрым зэрыжиIамкIэ, зи гугъу тщIы лэжьыгъэхэм мы махуэхэм еувэлIэнущ.
Апхуэдэуи Налшык къалэ дащIыхь, метр зэбгъузэнатIэу мини 10 хъу поликлиникэ №1-р зэф1агъэкIын я гугъэщ. Мы поликлиникэм иджырей медицинэм къыщагъэсэбэп Iэмал псори хэтынущ, сыт хуэдэ узыфэри къыщахутэфынущ, лышх узыфэмкIэ центр хэтынущ, эндоскопиемкIэ хирургие, махуэм щеIэзэ къудамэхэр иIэнущ.
Онкодиспансерым и ухуэныгъэр йокIуэкI. КъищынэмыщIауэ Республикэ клиникэ сымаджэщым метр зэбгъузэнатIэ мин 1,2-рэ хъу дэIэпыкъуэгъу отделенэщIэр ящI, абы зэпищIэнущ хирургие корпусымрэ ЩIыналъэ лъынтхуэ центрымрэ.
