Къэбэрдей-Балъкъэр Республикэм Iэтауэ щагъэлъэпIащ Урысей студентыгъуэм и махуэр. Абы и щIыхькIэ КъБР-м и Iэтащхьэ КIуэкIуэ Казбек ехъуэхъуащ ди щIыналъэм щыпсэу, щеджэ студентхэм. Республикэ унафэщIым къыхигъэщащ студентыгъуэ пIалъэр гъащIэм щыщ Iыхьэшхуэу зэрыщытыр, абы ирихьэлIэу цIыхум и хьэлыр зэрызэфIэувэр, къыпэщылъ дунейр зэрыхъунур зэриубзыхур.
Iэтащхьэм жиIащ Къэбэрдей-Балъкъэрым и студенхэм щIэныгъэм, еджэныгъэм, спортым, творчествэм ехъулIэныгъэ куэд щызыIэрагъэхьэу, жылагъуэ гъащIэм жыджэру хэту, проект гъэщIэгъуэнхэр къыхалъхьэрэ пхагъэкIыу зэрыщытыр. Абы ипкъ иткIэ, унафэщIхэр хьэзырщ абыхэм сытым дежи ядэIэпыкъуну, я зэчиймрэ Iэзагъымрэ зрагъэужьыфын хуэдэу Iэмалхэр къыхузэрагъэпэщыну, жэрдэм, тегушхуэныгъэ, зэфIэкI яIэ къудеймэ, утыкушхуэхэм зэрихьэфынур жиIащ Iэтащхьэм.
А махуэ дахэм КIуэкIуэ Казбек яIущIащ Къэбэрдей-Балъкъэрым и студентхэм. Къызэхуэса ныбжьыщIэ акъылыфIэхэм защыхуигъазэм Iэтащхьэм жиIащ: «Мы махуэшхуэм лъабжьэ ин иIэщ, Урысейм и япэ еджапIэ нэхъыщхьэр къыщызэIуахам епхауэ, ар Москва къэрал университетращ. Студентхэр гъащIэм щIэщыгъуэу къыхыхьэ псори псынщIэу къэзыпхъуатэ ныбжьыщIэхэщ. Аращ абыхэм IуэхугъуэщIэхэр къагупсысурэ гъащIэм хапщэну щIыщыгугъыр, акъылкIи, жыджэрагъкIи пэлъэщу къыщIалъытэр.
Къэбэрдей-Балъкъэрым и студент мин бжыгъэм зэчиифIэ куэд яхэтщ, къызыхуигъэщIар пасэу къагурыIуэжрэ щIэныгъэм, егъэджэныгъэм, спортым, творчествэм епха IэщIагъэхэм ехъулIэныгъэшхуэхэр щызыIэрагъэхьэу. А псори гумрэ псэмрэ къабгъэдэкIыу, акъылкIэ зэрагъэзахуэу бгъэдохьэри аращ къащIехъулIэр. Сэ сыхуейщ иджыри ехъулIэныгъэ куэд фиIэну сынывэхъуэхъуну.
Фэри къывгуроIуэ, нобэ ди къэралыр гугъуехь куэд зэрыхэтыр, дунейпсо зэныкъуэкъум и ныбжь къызэрытридзэр, лъэпощхьэпо куэд зэрырихьэлIэр. Абы ипкъ иткIэ, фэри фи пщэ къыдэхуэ жэуаплыныгъэр нэхъ ин хъуащ. Фэращ ди къэралым и къэкIуэнур тэмэм хъунымкIэ къалэныщIэхэр зыгъэзэщIапхъэр, къэралыгъуэ зэIузэпэщ диIэн папщIэ дяпэкIэ зи гуащIэ езыхьэлIэн хуейр.
Фи зэфIэкIым, зэчийм, къарум, жэуаплыныгъэм, хэкупсагъэм куэдкIэ елъытащ дунейпсо утыкум ди къэралым щиубыдыну увыпIэр. ДяпэкIэ диIэну физикхэм, математикхэм, инженерхэм я фIыгъэкIэ технологиещIэхэм дакIэщIыхьэнущ, уеблэмэ, япэ дищыфынущ, ди къэралым и лъэщагъыр щIэдгъэбыдэу.
Фэ тхыдэмкIэ, литературэмкIэ, нэгъуэщI гуманитар унэтIыныгъэхэмкIэ къыфхэкIыну егъэджакIуэхэрщ къыдэкIуэтей щIэблэр зыхуэдэнур зэлъытар. Фэ ахэр зэрывгъасэрщ зытеухуауэ щытынур щIэблэм я псэукIэр, гупсысэкIэр, тхыдэ, псэкупсэ, щэнхабзэ лъапIэныгъэхэм хуащIыну пщIэр. Ахэращ къэралым и лъэр быдэу щызыгъэтыр. НобэкIэ нэгъуэщI еплъыкIэхэр къытхалъхьэну хэту къытпэщIэува къэралхэм апхуэдэущ дазэрыпэщIэтыфынур. Ди жылагъуэр зэтезыкъутэн, ди еплъыкIэхэр, гупсысэкIэр дэзыгъэхъуэжын къарум пэщIэтыфынур фэращ.
Дауи, псом нэхърэ нэхъыщхьэр узыншагъэрщ, къыдэкIуэтей щIэблэм я узыншагъэр хъумэныр дяпэкIэ диIэну дохутырхэм, физическэ культурэмрэ спортымрэ я лэжьакIуэхэм куэдкIэ елъытащ».
УнафэщIым къыхигъэщащ къэралымрэ республикэмрэ къыщызэрагъэпэща Iэмалхэр къагъэсэбэпу щIалэгъуалэм щIэныгъэ зрагъэгъуэтыну, лъагъуэ пэж къыхахыну, IэщIагъэлI Iэзэхэр къахэкIыну, я щIэныгъэмрэ зэфIэкIымрэ Къэбэрдей-Балъкъэрымрэ Урысеймрэ къыхуагъэсэбэпыфу хъуну зэращыгугъыр.
- Дэ щIалэгъуалэм заужьын, я гусысэхэр гъащIэм хапщэн папщIэ, дяпэкIи тлъэкI къэдгъэнэнукъым, ар Урысейм и Президент Путин Владимир иригъэкIуэкI политикэм и нэхъыщхьэщ, - жиIащ Iэтащхьэм.
Къэбэрдей-Балъкъэр къэрал университетым щекIуэкIа зэIущIэм студент 200-м нэблагъэ кърихьэлIащ. Абыхэм яхэтт дзэ Iуэху хэхам щыIахэри, щIэныгъэлI ныбжьыщIэхэри, ехъулIэныгъэшхуэхэр зыIэрызыгъэхьахэри, курыт IэщIагъэ зэзыгъэгъуэтхэри, тхакIуэхэри, къэрал, щIыналъэ зэпеуэхэм щытекIуахэри, жылагъуэ лэжьакIуэхэри, волонтерхэри, студент самоуправленэм нэхъ жыджэру хэтхэри.
Студентхэм я къэпсэлъэныгъэм къыхэщащ къэрал щIыб политикэм, къэрал кIуэцI Iуэхухэм, социально-экономикэ щытыкIэм, Урысейм, республикэм щекIуэкIхэм фIыуэ зэрыхащIыкIыр. Абыхэм упщIэ 30-м щIигъу иратащ Iэтащхьэм, езыхэм я еплъыкIэхэр, гупсысэхэр къагъэлъэгъуащ.
Дзэ Iуэху хэхам хэтахэми къыдэкIуэтей щIэблэр гъэсэнымкIэ сэбэп хъуну зэрыхьэзырыр жаIащ, къищынэмыщIауэ гъэмахуэ зыгъэпсэхугъуэм школхэм къыщызэрагъэпэщ лагерхэм студент отрядхэр гъэкIуэн зэрыхуейр къыхагъэщащ.
Студентхэм къыхалъхьащ волонтёрхэр пщIэншэу жылагъуэ транспортым къришэкIыну игъуэу къызэралъытэр, республикэпсо студсовет къызэрагъэпэщын зэрыхуейр. Ди республикэр турист щIыналъэу зэрыщытым ипкъ иткIэ, экологие щэнхабзэм зегъэужьын зэрыхуейр къыхалъхьащ щIалэгъуалэм, абы папщIэ курыт еджапIэхэм экологие факультативхэр къыщызэIуахым сэбэп зэрыхъунур жаIащ. ЩIалэгъуалэ центрхэм, абыхэм я мыхьэнэм щытепсэлъыхьым еплъыкIэ гъэщIэгъуэн куэд утыку кърахьащ студентхэм икIи КIуэ-кIуэ Казбек а псоми хэплъэн зэрыхуейр жиIащ.
ЗэIущIэм и кIэухым КIуэкIуэ Казбек студентхэм иджыри зэ ехъуэхъуащ къыхахауэ зыхуеджэ IэщIагъэм ехъулIэныгъэхэр къыпэкIуэу ирилэжьэну, я зэфIэкIыр Къэбэр-дей-Балъкъэрым и зэIузэпэщыныгъэм къыхуагъэсэбэпыну зэригуапэри дыщIигъуащ.