УнэтIыныгъэхэм къызэщIаубыдэ

КъБР-м и Iэтащхьэ КIуэ­кIуэ Казбек лэжьыгъэ Iуэ­хукIэ хуэзащ Аруан щIыналъэ адми­нист­рацэм и Iэтащхьэ ЛIыжьыкъуэ Хьэзрит. А районым щIыпIэ самоуправленэмкIэ и советым и унафэм ипкъ ­иткIэ, ЛIыжьыкъуэ Хьэзрит иджыблагъэ хахащ Аруан щIыналъэм и пашэу.

ЛIыжьыкъуэм зэрыжи­IамкIэ, админист­рацэм зэ­фIи­гъэкIын хуейуэ къы­пэ­щылъ Iуэхугъуэ нэхъыщ­хьэхэм хохьэ ди къэралым гъу­нэгъу щIыналъэм щригъэкIуэкI дзэ Iуэху хэхам (СВО) хэту фронтым щыIэ я лъахэгъухэм ядэ­-Iэ­пыкъуныр, абыхэм я уна­гъуэ­хэм защIэгъэ­къуэныр, «Хэкум и хъумакIуэхэр» уры­сейпсо фон­дым щIы­пIэм щиIэ къудамэм шэщIауэ ­дэ­лэжьэныр. 
Абыхэм нэмыщI зэIущIэм щытепсэлъыхьащ нэгъуэщI Iуэхугъуэхэми. Апхуэдэхэщ щIыналъэм мэкъумэш IэнатIэм адэкIи зыщегъэу­-жьы­ным, гъатхасэр и чэзум икIи къызы­хуэ­тыншэу егъэ­кIуэ­кIыным ехьэлIахэр. Къы­хэгъэщыпхъэщ Аруан районым и хозяйствэхэм бжьы­­хьэсэ къэкIыгъэхэр щIы­гъэпшэркIэ зэпэщ зэращIар. Гъатхэм мэкъумэш къэкIыгъэхэр щыхасэнущ гек­тар мини 10-м щIигъум.
КъБР-м и Iэтащхьэм къыхигъэбелджылыкIащ районым и экономикэм нэхъыфIу зиужьын ­папщIэ, абы хыхьэ щIыпIэхэм я мылъкум нэхъри хагъэхъуэн зэрыхуейр. Абы папщIэ нэхъ жы­джэру ядэ­лэ­жьапхъэщ Iуэхум мылъку хэзылъ­хьэфыну хьэрычэ­ты­щIэхэм. Гулъытэ хэха хуэ­щIын хуейщ лъэпкъ проектыщIэхэу Урысей Федерацэм и Президент Путин ­Владимир и ­жэрдэмкIэ къы­­­халъхьахэм. Абыхэм ящыщ дэт­хэ­нэри хуолажьэ цIыхухэм я псэукIэр егъэ­­фIэ­кIуэным.
Республикэм и пашэм зи гугъу ищIа унэ­тIыныгъэхэм къызэщIаубыдэ Аруан щIыналъэм и псэупIэ-коммунальнэ IэнатIэм зезыгъэужьынухэр, ар адэкIи езыгъэ­фIэ­кIуэнухэр. ЛIыжьыкъуэм зэ­ры­жи­IамкIэ, дызэрыт илъэ­­сым абы и лъэныкъуэкIэ зэлэжьынухэм ящыщщ Къэхъун къуа­жэм псы зэ­рыкIуэ бжьамиищIэхэр ­щыукъуэдииныр, Нарт­къалэ, Псы­гуэнсу жылэ­хэм я зыгъэпсэхупIэ, цIыху куэд зэкIуа­лIэ щIыпIэхэр зэгъэ­пэ­щыжыныр. 
Дызэрыт илъэсым къриу­быдэу и кIэм нагъэ­сынущ Шэ­рэдж Ищхъэрэ, Старэ Шэ­рэдж­ ­къуажэхэм я амбулато­рэщIэхэм я ухуэныгъэр. Ап­хуэ­дэуи щIын яухынущ Нарт­къалэ щаухуэ курыт еджапIэри. Районым и жылэ нэхъыщхьэ Нарткъалэ и уэрам нэхъ инхэми яужь щи­хьэ­нущ ухуэныгъэ-зэгъэпэ­щы­­жыныгъэ лэжьы­гъэ­ш­хуэ­хэр. КъинэмыщIауэ, мы зэманым щIы­налъэм зы­­щы­хуагъэхьэзыр Старэ Шэрэдж ­къуажэм дащIыхьыну я мурад сабий гъэсапIэщIэм и ухуэ­ныгъэр зэраублэнум, Нарт­къалэ, Аруан жылэ­хэм дэт курыт еджапIэхэр зэрызэ­рагъэпэщыжынум.
КIуэкIуэ Казбек гуапэу ехъуэ­хъуащ къалэным пэрыувагъащIэ, мурадыщIэхэмрэ жэрдэ­мы­щIэхэмрэ зи куэд, Аруан щIыналъэ адми­нистрацэм и Iэтащхьэ ЛIыжьыкъуэ Хьэзрит. Райо­ным ифI, и зэ­пэщыныгъэ къызыхэкIыну и пщэры­лъ­хьэр ехъулIэныгъэкIэ зэфIихынуи зэригуапэр къыхигъэщащ.