Марсым псэ зыIут щыпсэуа?
Марс планетэм куэд щIауэ кIэлъоплъ щIэныгъэлIхэр икIи абы зэгуэр гъащIэ щыIауэ хуагъэфащэ. Ар икIи лъабжьэншэу пхужыIэнукъым - кIуэ пэтми нэхъыбэ мэхъу абы щыхьэт техъуэ щапхъэхэр.
Планетэ Плъыжьым и щхьэфэм сурэт тезых «Персеверанс» Iэмэпсымэм мы гъэм и мэлыжьыхьым ЩIым къигъэхьащ зи чэзу теплъэгъуэхэр. Урысей щIэныгъэлI-математик, техникэ щIэныгъэхэм я доктор Злобин Андрей къызэрилъытэмкIэ, а сурэтхэр тэмэму къэппщытэмэ, Iэмэпсымэ лъэщхэр къэбгъэсэбэпу набдзэгубдзаплъэу зэпуплъыхьмэ, динозаврхэм я къупщхьэхэм хуабжьу ещхьхэр щыплъагъунущ. Илъагъухэр фIэгъэщIэгъуэн хъури, щIэныгъэлIым псэущхьэщIэм цIэ фIищащ - «номиным ещхь динозавр», зищIысыр зэкIэ ямыщIэ псэущхьэм и щхьэ къупщхьэр зэрыхъурейр тегъэщIапIэ ищIри.
Сурэтхэр иджурэ Злобиным зэхигъэуващ пасэ зэманым ЩIыми щыпсэуа псэущхьэ абрагъуэхэм хуэдэ гуэрхэм я теплъэхэр. ЩIэныгъэлIым псэущхьитIым я хьэдэ къупщхьэхэр къыхилъагъукIащ сурэтхэм, зэрыжиIамкIи, ахэр зы лIэужьыгъуэм щыщщ. Я щхьэ купщхьэхэм я мызакъуэу, я дзэшхуэхэри я пэхэм тет бжьакъуэхэри къыхигъэбелджылыкIащ Злобиным.
Нэхъ пасэу щIэныгъэлIхэм къызэрахутамкIэ, Марсым псы щыIащ, абы и лъэужьхэр иджыри къапэщIохуэ. А псор я лъабжьэу щIэныгъэлIхэм трагъэчыныхь Марсым пасэ зэманым псэ зыIут зэрыщыпсэуам.
Нобэ
♦Урысей Федерацэм Къэрал кIуэцI IуэхухэмкIэ и министерствэм и юридическэ IэнатIэм и махуэщ
♦Японием щагъэлъапIэ цIыхубз министрхэм я махуэр
♦Тыркумэным щагъэлъапIэ Гъавэм и махуэр
♦1900 гъэм Франджым и къалащхьэ Париж и метрор къызэIуахащ.
♦1903 гъэм лъакъуэрыгъажэмкIэ япэ дунейпсо зэпеуэр екIуэкIащ.
♦1918 гъэм РСФСР-м къару щигъуэтащ япэ совет конституцэм.
♦1920 гъэм Урысейм къыщызэрагъэпэщащ къэралым щIэныгъэншагъэр щыгъэкIуэдыным пыщIа Iуэхухэр зэкIэлъызыгъэкIуэну комиссэ.
♦1924 гъэм къыдэкIащ «Красный спорт» (иджы - «Советский спорт») газетым и япэ номерыр.
♦1926 гъэм Екатеринослав къалэм и цIэр Днепропетровск жиIэу зэрахъуэкIащ.
♦1941 гъэм Сталин Иосиф СССР-м зыхъумэжыныгъэмкIэ и наркому ягъэуващ.
♦1942 гъэм Къардэн Къубатий Березовскэ куейм фашист кхъухьлъатитI къыщриудыхат.
♦1952 гъэм Финляндием и президент Паасикиви Юхо Хельсинки къыщызэIуихащ ХV гъэмахуэ Олимп Джэгухэр. Совет Союзым щыщ спортсменхэр япэу зыхэтар а Олимпиадэрщ. Ар екIуэкIащ бадзэуэгъуэм и 19 - шыщхьэуIум и 3-хэм къриубыдэу.
♦1980 гъэм Москва щыщIидзащ ХХII гъэмахуэ Олимп Джэгухэм. СССР-м и командэ къыхэхам абы къыщихьауэ щытащ медали 195-рэ. Советыдзэхэр Афганистаным зэрырашар хабзэншагъэу къызэралъытэр кърырагъэлъагъуэу, Олимпиадэм къэкIуатэкъым къэрал 50-м щIигъум я спортсменхэр. Зэпеуэхэр екIуэкIащ бадзэуэгъуэм и 19 - шыщхьэуIум и 3-хэм.
♦1996 гъэм Атлантэ (США) къыщызэIуахащ ХХVI гъэмахуэ Олимпиадэр, бадзэуэгъуэм и 19 - шыщхьэуIум и 3-хэм къриубыдэу екIуэкIар. Спортсмен нэхъыбэ дыдэ зыхэтар а зэхьэзэхуэхэрщ - цIыху 10744-рэ.
♦1814 гъэм къалъхуащ къигупсыса кIэрахъуэ лIэужьыгъуэмкIэ дуней псом цIэрыIуэ щыхъуа Кольт Сэмюэль.
♦1834 гъэм къалъхуащ франджы сурэтыщI цIэрыIуэ, скульптор Дега Эдгар.
♦1893 гъэм къалъхуащ ХХ лIэщIыгъуэм и усакIуэ нэхъ лъэщ дыдэхэм хабжэу щыта Маяковский Владимир.
♦1934 гъэм къалъхуащ урысей актёр цIэрыIуэ, режиссёр, УФ-м и цIыхубэ артист, «Хэкум и пащхьэ щиIэ фIыщIэхэм папщIэ» орденым и нагъыщэ псори зыхуагъэфэща Ширвиндт Александр.
♦1935 гъэм къалъхуащ УФ-м и цIыхубэ артист, режиссёр, тхакIуэ Ливанов Василий.
♦1938 гъэм къалъхуащ совет уэрэджыIакIуэ, актёр, кинорежиссёр, Куржым и цIыхубэ артист, СССР-м и Къэрал саугъэтыр зрата Кикабидзе Вахтанг.
♦1971 гъэм къалъхуащ Украинэм щыщ боксёр цIэрыIуэ, дунейпсо зэпеуэхэм и мызэ-мытIэу щытекIуа, Киев къалэм и Iэтащхьэ Кличко Виталий.
Дунейм и щытыкIэнур
«pogoda.yandex.ru» сайтым зэритымкIэ, Налшык уэфIу щыщытынущ. Хуабэр махуэм градус 35 - 36-рэ, жэщым градус 23 - 25-рэ щыхъунущ.
Лъэпкъ Iущыгъэ:
Хьэлывэр япкIыху щысри, ягъэжьэху пэплъэжакъым.
