Урысей Федерацэм футболымкIэ и етIуанэ дивизионым и Япэ гупым 2021 - 2022 гъэхэм щекIуэкI зэхьэзэхуэм мы махуэхэм щIадзэж. Мазищым щIигъуэкIэ зэпеуэр зэрызэпагъэуа зэманым къриубыдэу загъэпсэхунуи, зыгъэсэныгъэхэр ирагъэкIуэкIынуи, футболистыщIэхэмкIэ загъэлъэщынуи командэхэм яхузэфIэкIащ. АдэкIэ кIэух зэIущIэ гугъухэр къапэщылъщ.
Зэхьэзэхуэм и бжьыхьэ лъэхъэнэр нэхъ пасэу зэрызэфIэ- кIам и фIыгъэкIэ зыгъэсэныгъэхэм щIамыдзэ щIыкIэ ди футболистхэм тхьэмахуищкIэ загъэпсэхуну Iэмал къахукъуэкIащ. А зэманыр яхурикъуащ нэгъэсауэ я къарур зэтрагъэувэжыну икIи я узыншагъэм кIэлъыплъыжыну.
Налшыкдэсхэм щIалэщIэ куэд яхэтащ зыгъэсэныгъэхэм щIакIэлъыплъу, ягу ирихьмэ зэхьэзэхуэхэм джэгупIэ губгъуэм къыщрагъэхьэну. Дыгъэгъазэм и 12-м щIадза тренировкэхэм командэм лэжьыгъэшхуэ щызэфIигъэкIащ. «Спартак-Налшыкым» и тренер нэхъыщхьэ Биджиев Хьэсэнбий зэрыжиIамкIэ, щIалэхэм гукъыдэжышхуэ яIэу зыгъэсэныгъэхэр кърахьэлIащ.
ЗэхъуэкIыныгъэхэри щыIэщ. Хъыбар къызэрытIэрыхьамкIэ, лъэныкъуитIри зэдэарэзыуэ командэм хэкIыжащ налшыкдэсхэм я ехъулIэныгъэхэм хэлъхьэныгъэ мымащIэ хуэзыщIа футболист Iэзэ Багъэтыр Альберт. КъищынэмыщIауэ, Осетие Ищхъэрэ - Аланием и «Алания»-м и гъусэу зыгъэсэныгъэхэр ирегъэкIуэкI Черткоев Дато. «Спартак-Налшыкым» хэту зэхьэзэхуэм и кIэух Iыхьэм щIидзэнущ Масленников Игорь. Абы теухуа зэгурыIуэныгъэ налшыкдэсхэм я унафэщIхэм иращIылIащ Ярославль и «Шин-ник»-м и гъэсэн гъуащхьэхъумэныкъуэм. Адрей щIалэхэр «Спартак-Налшыкым» и гъусэу зэхьэзэхуэм и гъатхэ лъэхъэнэм техьэну я мурадщ.
ЕсэнтIыгу къалэм зи чэзу зыгъэсэныгъэхэр щригъэкIуэкIащ «Спартак-Налшыкым». ЩIымахуэ зыгъэхьэзырыгъуэ Iыхьэм хиубыдэу налшыкдэсхэм япэ зэныбжьэгъугъэ зэIущIэр драгъэкIуэкIащ Ставрополь крайм футболымкIэ и чемпионатым 2021 гъэм ещанэу пашэныгъэр къыщызыхьа Невинномысск къалэм и «Ставрополь-АгроСоюз»-м. Хабзэ хъуауэ зыгъэсэныгъэ къэс зэныбжьэгъугъэ зэIущIэ зыдрагъэкIуэкI командэм Къэбэрдей-Балъкъэрым и футболистхэр 1:0-у ефIэкIащ. ЗэпэщIэтыныгъэм и 35-нэ дакъикъэр екIуэкIыу невинномысскдэсхэм я штрафнойм щихьэм топыр къыIэрыхьащ ЛIуп Ислъам. Абы къыпежьа гъуащхьэтетым ди щIалэм топыр Iэзэу щхьэпридзри, «Спартак-Налшыкым» текIуэныгъэ къыхуэзыхьа бжыгъэр къызэIуихащ.
Япэ ехъулIэныгъэм гукъыдэж къезыта Къэбэрдей-Балъкъэрым и футбол командэм зыгъэсэныгъэ иригъэкIуэкIам хиубыдэу къыкIэлъыкIуэ зэныбжьэгъугъэ зэIущIэ дригъэкIуэкIащ Грознэ къа-лэм и «Ахмат»-м и щIалэгъуалэ командэм. Абыи налшыкдэсхэм текIуэныгъэ къыхуахьащ сымэджауэ ди командэм гъусэ яхуэхъу-жа къудейхэу ХъутIэ Анзоррэ Ашуев Мурадрэ я топхэм. ЗэпэщIэтыныгъэм хухаха зэманыр 2:0-у иухащ.
Зыгъэсэныгъэхэм хиубыдэу адэкIэ зи чэзу зэныбжьэгъугъэ зэIущIэр «Спартак-Налшыкым» и унэ щригъэкIуэкIащ. Мазаем и 25-м плъыжь-хужьыфэхэм 1:0-у хагъэщIащ «Мэшыкъуэ-КМВ»-р.
Зэхьэзэхуэр щIидзэжыным и пэ къихуэ иужьрей зэIущIэр нал-шыкдэсхэм драгъэкIуэкIащ Белгород и «Салют»-м. ЗэпэщIэтыныгъэм и япэ дакъикъэ дыдэм ЛIуп Ислъам дигъэкIа топым «Спартак-Налшыкым» къыкIэлъыкIуэ текIуэныгъэр къыхуихьащ.
Апхуэдэу, 2021 - 2022 гъэ джэгугъуэм и гъатхэ лъэхъэнэм зыхуагъэхьэзыру ди щIалэхэм ирагъэкIуэкIа зэIущIитхуми пашэныгъэр къыщахьащ. Уеблэмэ ди хьэрхуэрэгъухэм зы топи ди гъуэм къыдагъэкIыфакъым.
Зыгъэсэныгъэ иригъэкIуэкIам гукъыдэж къритам лъэхъэнэ-щIэм къаруущIэ къыщыхилъхьэну дыщогугъ «Спартак-Налшыкым». Мы гъэм хиубыдэ япэ официальнэ зэIущIэр ди щIалэхэм гъатхэпэм и 7-м ЕсэнтIыгу къалэм щыдрагъэкIуэкIынущ щIыпIэ командэм.