Хэку зауэшхуэм и лIыхъужьхэр ягу къагъэкIыж

УФ-м и Лъэпкъ гвардием и къудамэу КъБР-м щыIэм ведомствэм хэмыт и хъумакIуэ IэнатIэм и лэжьакIуэхэм Дзэ Плъыжьым хэта зауэлIхэм я кхъэлэгъунэу Налшык къалэм щыIэр зыхуей хуагъэзащ. А Iуэхур ирагъэкIуэкIащ Хэку зауэшхуэм хэтахэм я фэеплъхэр зыхуей хуэгъэзэным тещIыхьа щэбэт щIыхьэхум хыхьэу. Фэеплъым и хъуреягъыр зэщIагъэкъабзэри, мывэ плитари ятхьэщIащ.

 - Ди лъахэгъу-зауэлIхэу мамырыгъэр къытхуэзыхьахэм я фэеплъыр хъумэным хэлъхьэныгъэ хуэтщIыну Iэмал къыдэзытщ а Iуэхур, -  жиIащ Налшык къалэм ведомствэм хэмыт и хъумакIуэ управленэм и унафэщI, полицэм и полковник КIарэ Заур.

 Апхуэдэуи хабзэхъумэхэм ЯмыцIыху сэлэтым и фэеплъымрэ абы и хъуреягъымрэ зыхуей хуагъазэри, хэкIуэдахэм я фэеплъым пщIэ хуащIу дакъикъэкIэ щымащ.