КIэгъуасэ хужь

(фантастикэ)
Нэхущым нэблэгъати, мазэм и фэр текIыжырт, уафэм и кIапсэхэр къэубэлэцат. Нэхущвагъуэри IэпапIэ хужьу уэгум ист. Абдежым жьы шынагъуэ къепщэу щIидзащ, хуэм-хуэмурэ махуэщIэ къэунэхунум и нэщэнэ псори абы трилъэщIэжащ. КIыфIыгъэм къигъэзэжащ, нэхъри нэхъ Iув хъуауэ. 
Дунеижьыр къызэригъэщIрэ зекIуэ хабзэр къутащ, жэщыр имыкIыжу къинащ… Сыхьэтыр хы хъуащ. КIыфIщ. Блы, и, бгъу. Нэху щыркъым. Ищхъэрэжьыр етащи, гъуэгубгъум Iут жыгхэм яжьэхофыщIыхь, ятоухь, гъуэгум телъ къуэщIийхэр епхъуатэри, лъагэу еIэт, кърехьэкIри, итIанэ, губжьауэ, щIым къыхуедзыж… Нэху щыркъым… 
ЩIалэр къэушри сыхьэтым еплъащ. «Мыр сыт? Япэ ищауэ ара?». Iэпкълъэпкъым гузэвэгъуэ гуэр къыхэлъэдащ. Япэ щIыкIэ ар щхьэм еуащ, итIанэ, пщIыпщIурэ, лъакъуитIымкIэ щыхэжыжащ. Нэху щакъым. Зыгуэр къэхъуащ… Ар къыщылъэтри телефоным бгъэдэлъэдащ. КIыфIщ, зыри плъагъуркъым. Уэздыгъэр щIигъэнэну блыныр къеIэбэрэбыхь - къыхуэгъуэтыркъым. Iэпэ кIэзызхэмкIэ мафIэдзыр кIэстум жыпым кърепхъуэт. ХущIэгъанэркъым. ЩIалэм епIэщIэкIыу зехуапэ. «ПсынщIэу абы лъэIэсын хуейщ. Ягъэ кIынкъым, фэкIэ дызэрымыцIыхуми, илъэс псокIэ телефонкIэ…» Мис иджыпстущ абы хьэкъыу и фIэщ щыхъуар абырэ езымрэ… Ауэ… зэкIэ зыри жыпIэ хъунукъым. ПсалъэщIэ щыIэкъым. «Лъагъуныгъэ», «фIыуэ солъагъу». А псалъэхэри къарууншэ мэхъу кIуэ пэтми. Гущхьэм щыуш псоми щыпэмыджэжыф къохъу. Ауэ ар сыт? 
Шынагъуэу, къигъащтэу, и гур къыхэузыкIащ, иужьым занщIэу зипхъуатэри, Iэпкълъэпкъыр ибгынащ, арщхьэкIэ кIэщIу къигъэзэжри, «мастэ хэуари» зэрыхэлъу, и пIэм иувэжащ. «ПсынщIэу абы лъэIэсын хуейщ. Ягъэ кIынкъым зэи дызэхуэмызами, иджы абыхэм уегупсысыну зэман щыIэжкъым». КIыфIыгъэр нэхъри нэхъ шынагъуэу щхьэгъубжэм къытегуплIащ, абджынэхэм къыпхыпщри пэшым къыщIэпщхьащ. Абы хэту… Зыгуэр пэшым къыщIэлъатэри, гъуэлъыпIэм бгъэдэт стIол лъахъшэм тетIысхьащ. Ар мы дуней псэущхьэтэкъым, и бэуэкIэр щIыIэт, езыр къэлъагъугъуейт, нэр темыпыIэу и теплъэм зихъуэжырти. Щхьэгъубжэ абджыр хэудащи, абыкIэ иджы уэс къыдосэ, ауэ щIалэр, пIыщIэн дэнэ къэна, къэпщIэнтIащ. 
«ХьэщIэм» гу лъызыта, блыным кIэрыIулIа сурэт шынагъуэри къэкIэзызащ. «Зыгуэрыр» стIолыщхьэм къеувэхри, щIалэм къыхуэкIуэу къежьащ. Гум «хэлъ» мастэр къэкIэзыза мыхъумэ, щIалэр шынакъым. «Адрей дуней…» - игу къокIыж. «Ущыуакъым, - къоIу макъ. - Сэ абы сыкъикIащ, занщIэуи уи деж сыкъэкIуащ». Пэш къыщIэкIыпIэм деж щыт гъуджэ зэIухыр мащIэу къызэщIэлыдащ, ауэ «хьэщIэр», абы бгъэдэт щхьэкIэ, къэщтакъым. 
- ГурыIуэгъуэщ, - жиIащ щIалэм. - Уэ адрей дунейм укъикIауэ аращ. УхьэщIэну укъэкIуауэ тхьэм къыщIигъэкI. ХьэщIэм дапщэщми къыздикIам егъэзэж. 
- Ущыуакъым, жысIай! 
«ХьэщIэр», егъэзэжри, стIолыщхьэм тотIысхьэж. Жьышхуэр а зэрыетащи - мэгурым, уэсыр пэшым къыщIепхъэ. 
- Си псэр пхьыну ара? Иджыпсту занщIэу сIуумых, зэ закъуэ Ар сыгъэлъагъужи, итIанэ… 
- Хьэ-хьэ-хьэхь!.. Псэр, жы- пIа? Абы сыхуейкъым сэ иджыпсту. ИужькIэ, и пIалъэр къэсмэ, къытезгъэзэжынщи, итIанэ… Сэ сыкъыщIэкIуар нэгъуэщIщ. СощIэ, уи щхьэ куцIым пхылъэфащ абы и цIэр. НакIуэ си гъусэу абы и деж. ИтIанэ, ухуеймэ, и цIэр пщызгъэгъупщэжынщи, уи гум изгъэхужынщ. НакIуэ. Дэ дыпIэщIэн хуейщ. Зэ закъуэ зы IуэхуфI схуэщIэмэ сеплъынщ. Ар уэ къыбгурымыIуэ узыфэщ. Уесэжащ а узым, зи Iэ, зи лъакъуэ къэтыр абы зэресэжым хуэдэу. 
«ХьэщIэр» къэкIуатэри, щIалэм щIыIэу къытеIэбащ. Iэпкълъэпкъыр арыххэу псынщIэ хъуащ. Зызымыхъуэжу къэнар игу закъуэр арат. ЩIалэм, унэ лъэгум темытыжыфу, къауцу зиIэтащ, тIуми я Iэр зэрыубыдри, напIэзыпIэм щхьэгъубжэмкIэ дэлъэтащ. КIыфIт, уэс къесыжыртэкъым. КъуэкIыпIэмкIэ темыпыIэу утхынтхэу пшэ фIыцIэшхуэ къыщыкъуэкIащ, къэсри зиутхыпщIащ, хэщэIукIри, уэшх ткIуэпс пIащэхэр къыIэщIэкIыу хуежьащ… Къалэр къэушырти, къэхъуар къыгурымыIуэу, къэувыIэжат. Нэхущым хуэпабгъэ бзухэри зэхуэшауэ жыгым къытенэжат. Псоми къахуокIуэ ар, жэщыр - лIыукIми, псэ хьэлэлми, зеиншэми. Псори абы щогуфIыкI, ауэ имыкIыжу къинэмэ… Нэхъ щIыIэ къэхъуу хуежьащ. ЩIалэм лъэныкъуэкIэ зригъэбгъунлъэкIщ, и IитIыр щIыбагъымкIэ щызэридзэри, щIиупскIэу щIидзащ. Абы гу лъызыта «хьэщIэм» уафэ джабэм гъунэгъу зыхуищIщ, дэпыр къыпылъэлъу зы вагъуэ къыкIэриудри, щIалэм къыхуидзащ. ЩIалэр пIыщIэжыртэкъым иджы, псори хъарзынэ хъуат, ауэ и лъабжьэмкIэ, щIымкIэ, асыхьэту зы псэ хей щыхэкIащ. Абыхэм къатищу зэтет унэр тIэунейрэ къауфэрэзыхьри абы и пэшым щIэлъэтащ. 
Пэшыр, и фэр пыкIауэ, нэхутхьэхут. Жэщ уэздыгъэм идз нэху мащIэр плIанэпэхэм нэмысу кIыфIым хэкIуэсэжырт, жей Iув зыхэт хьэуар псэм егуапэрт. Ар жейрт. ЩIалэм и гум «хэлъ мастэм» зиудыныщIэу хуежьащ. Абы и щхьэц фIыцIэ кIэщIыр щхьэнтэм тепхъат, сабий еншэ щIыкIэу, и Iупэхэр мащIэу ныкъуэзэтежт. Щхьэнтэм «тхылъыр» зэгуэхауэ телът. «…ИтIанэ и Iэ кIэзызхэр уафэм хуишиящ. Арат абы хузэфIэкIыр иджыпстукIэ. Адэ жыжьэу уэшх къыщешхырт, ауэ цIыхухэр зэбгрыкIыжыртэкъым. Уафэ джабэм къыкIэриуда вагъуэхэр зи кIэстумыбгъэм хэзу хэзыIуам едаIуэрт, зэриухыу Iэгу еуэн хьэзыру…» - къоджэ щIалэр. 
АдэкIэ тхылъым зыри итыжтэкъым, напэкIуэцIыр къабзэу текIыжат. Щытащ ар зы тэлайкIэ, абы и нэгум иплъэу, гу мастэр къыхэузыкIынкIэ шынэу. «Мэжей. НэхъыфIщ нэхъыбэрэ къэмыушмэ. Къэхъуар къищIэмэ, и гур къэувыIэнущ, дыгъэншэу псэуфынукъым». ЩIалэм и гъусэр лъэмакъыншэу къыбгъэдыхьащ. «НакIуэ ныщIэкIыж. Сэ си гугъэщ пхуэмышэчу къэбгъэушыну. Уэ, цIыху, сызэримыгугъауэ укъыщIэкIащ. НакIуэ». 
Хьэуа кIыфIым хэлъэтэжащ зэгъуситIыр. Дамэ хъуа и IитIыр щIиупскIэурэ, щIалэр хьэуам хосыхь, зеIэт, напIэзыпIэми зыкърегъэхуэхыж. «Ар слъэгъуащ. Абы и деж сыщыIащ», - бзэрабзэрт щIалэм и гур. Ауэрэ къалэр къызэранэкIащ. Иджы, еплъыхмэ, ялъагъур къуакIэбгыкIэт. Къыр лъагэм и сыджым тетIысхьэну хуаунэтIащ. Арыххэу бгы абрагъуэм и щIыбагъым мафIэ топышхуэ дэукIуреири ар зэгуэудащ. Мис а дыхьэпIэмкIэ щIалэмрэ и гъусэмрэ бгы кIуэцIым илъэтащ. Щымт бгы нэщIышхуэр. МафIэ куэд къыщыблэрт - цIыкIуи ини. 
ЩIалэмрэ жэщ «хьэщIэмрэ» жьантIэмкIэ дыхьащ. «Мис абы и гъащIэ мафIэр. Плъагъурэ, куэдрэ псэунущ, и мафIэм къаруушхуэ бгъэдэлъщ. Мес, плъагъуркъэ, модрейр уэращ зейр. ТIури зэбгъэдэтщ. Сызэримыгугъауэ укъызэрыщIэкIам щхьэкIэ мыбы укъэсшащ. Мес мо мафIэ къомым узыхуейм хуэдиз къыхэхи ууейм хэлъхьэ. МафIэр ункIыфIамэ, псэр хэкIауэ аращ. Мес, плъагъуркъэ, ищхъэрэкIэ мафIэ куэд щызэдоункIыфI. Фэ, цIыхухэр, фызэрымыукIыжу фыпсэуфыркъым. Аращи, еуэ, уи гъащIэм хэгъахъуэ». 
ЩIалэм, лъэгуажьэмыщхьэу етIысэхри, и IитIыр мафIэм хуишиящ, и нэр къыщхьэрипхъуауэ. «Сыхуейкъым. Сыхуейкъым си гъащIэм хэхъуэну. ГъащIэ кIыхьыр фIыщ, ауэ ар тэмэму епхьэкIыну тыншкъым. СыгъэкIуэж, сынолъэIу, уэри жэщыр здэшэжи кIуэж…» 
ЩIалэр бгы гъуанэ къикIыжыпIэм деж къыщызэтеувыIэри къызэплъэкIыжащ. МафIэхэм кIэгъуасэ ящIырт, языныкъуэхэм фIыцIабзэу, адрейхэм хужьу… Ар къызэщыуащ. Иджыри кIыфIт. Iэбэри лъэныкъуэкIэ ебгъунлъэкIа тхылъыр зэгуипIэжащ… Мис иджы нэху щырт. МахуэщIэм и дыгъэр щхьэгъубжэм къыдэпсэрт. ЩIалэр къэушри къызэфIэтIысхьащ.
 «Абы и деж сыпсэлъэнщи, и макъ зэрызэхэсхыу, трубкэр теслъхьэжынщ, - къэкIащ абы игу. - Ауэ мыр сыт мы си Iэм кIэрылъыр? КIэгъуасэмэ къыкIэрех, щхьэи хужь?..» МахуэщIэм и дыгъэр убзэу щхьэгъубжэм къыкIэрытт.

 

Къанкъул Заур.
Поделиться:

Читать также:

25.03.2024 - 15:30 Си жэнэт
21.03.2024 - 11:30 Ахъмэт и фо изщ