Саугъэт нэхъыщхьэм щIэбэнынухэр

Налшык и ипподромым щекIуэкIынущ шыхъуэхэм нэхъыбэу зызыхуагъэхьэзыр зэхьэзэхуэр. Ар хабзэ хъуауэ ягъэджэгу ДербикIэ зэджэ илъэсищ зи ныбжь лIы къабзэ уанэшхэм я къызэдэжэрщ.

Дерби-2022-м и метр 2400-м лъагъуэм къызэдэтеуващ шы 12. Зэхьэрхуэрэгъухэм я зэфIэкIыр зэ еплъыгъуэкIэ зэхуэдэт, къыхэбгъэщын яхэттэкъым. НэгъуэщI къалэхэм къикIахэм ящыщу гу зылъытапхъэр Грознэ щекIуэкIа Дербим къыщыхэжаныкIа Абдулазизовым и гъэхъун Падишах Эклипст. Бжьыпэм щIэбэныну дишхэм яхэтт Анилинэ саугъэтым етIуанэ щыхъуа ДыщэкIым иш Ультиматум, ардыдэм ещанэу къыщыса Сэкрэкым и гъэхъун Ихтирам. Псом хуэмыдэжт хэщIыныгъэ зимыIа (къызэдэжищми текIуэныгъищ къыщызыхьа, Анилинэри хэту) Вэрокъуэм и гъэхъун Принц Роуз. КъищынэмыщIауэ, ищхьэкIэ къэдгъэлъэгъуахэм хьэрхуэрэгъу нэс яхъуэхъуфынут Бетрожьым иш Псыхуабэ Анилинэ саугъэтым ещанэ, Грознэ и Дербим еплIанэ щыхъуа Юнкер. Налшык и къызэдэжэм кърикIуэнур къэщIэгъуейт.

ЕтIуанэ гупым хыхьэ Къэбэрдей-Балъкъэрым и саугъэтыр (Дерби цIыкIу) къэхьыным ехьэлIа къызэдэжэм ипэкIэ къэдгъэлъэгъуам къызэзырщхьэщыкIыр къызэдэжэ шыхэм я рейтингыр зэрынэхъ-мащIэмкIэт. Мы гъэм Дерби цIыкIуми шы 12 щызэпеуэнут. Абыхэм ящыщщ иужь лъэхъэнэм текIуэныгъэм и Iэфагъыр зэхэзыщIэфа шыбзитI. Дызытепсэлъыхьыр «Ставропольский» шы заводым и гъэхъун Вакханкэ – Грознэм и Арагвэ саугъэтым щытекIуамрэ къызэрыкIуэ шыгъажэм пашэныгъэр щызыубыда «Малкинский» шы заводым и Флеш Ситирэщ. Зи кIэн къимыкIхэм ящыщу къыхэгъэщыпхъэщ Сэкрэкым и Пасьянсыр. Ауэ ари лъэныкъуэкIэ щыту къызэдэжэхэм еплъыну фIэщщIыгъуейщ.

Япэ тажым и саугъэтыр - илъэситI зи ныбжьхэр метр 1600-м къыщызэдэжэрщ. Абы щIэбэнынущ ших. Иджырей зэпеуэм зэхьэрхуэрэгъу нэхъ лъэщхэм ящыщу къыщалъытэ Битокъумрэ Къудеймрэ я гъэхъунхэу Битистутэрэ (Грознэ щекIуэкIа Гъэмахуэ саугъэтым пашэныгъэр щызыубыдамрэ) Флайбриджрэ. Къэтлъэгъунщ, «Эльбрус» шы спорт клубым иш Налшык и Гъэмахуэ саугъэтыр къэзыхьа Аксесс а къызэдэжэм зэрыхуэхьэзырри.

ЕтIуанэ гупым хыхьэ Спринтер саугъэтышхуэр къэхьыным ехьэлIауэ метр 1200-м къыщызэдэжэнухэм яхэтынущ илъэсищым щIигъуа шыхэр. Саугъэт нэхъыщхьэм щIэбэнынухэм кърихьэлIэнущ Мэржэхъум и гъэхъун илъэситху зи ныбжь Безмерный. Налшык ипподромым и ветераным и дежкIэ иджырей зэхьэзэхуэр етIощIанэу щытынущ. Безмернэм и хьэрхуэрэгъу нэхъыщхьэр Бозийм и Геодезистырщ. Ар къызэдэжэ I7-м хэтати блым щытекIуащ, Псыхуабэ щекIуэкIа ещанэ гупым хыхьэ ЗэрызэхуащIыж саугъэтри хэту.

Илъэсищ зи ныбжь шыбз жыджэрхэр щызэхуэсащ етIуанэ гупым хиубыдэ Фантэ саугъэтым. Абы хэтынущ Краснодаррэ Ростоврэ къызэрыкIуэ шыгъажэхэм щытекIуа Апекъуэм иш Никилэ, ОКС саугъэтым къыщыхэжаныкIа Сэкрэкым и Рашен Мун, «Малкинский» шы заводым и гъэхъун Мисс Флёр (Налшык щекIуэкIа къызэдэжищым ящыщу тIум щытекIуащ) сымэ.

Жокей клубым и саугъэтым щызэхуэсащ метр 2400-м къыщызэдэжэн илъэсиплIым щIигъу шыхэр. Битокъумрэ Къудеймрэ утыкум кърагъэувэнущ «американхэу» Налшык, Псыхуабэ, Краснодар ипподромхэм къыщыхэжаныкIа Блессед Кингрэ Глори Лайнрэ (Налшык щызэхэта япэ тажым и саугъэтыр къихьащ, щэнейрэ нэгъуэщIхэм къыщыхэжаныкIащ). А зэхьэзэхуэм пашэныгъэр щиубыдыфыну хуагъэфащэ «Налшык» хьэлвэ щащI заводым и гъэхъун зыхуэбгъадэ хъун щымыIэ Терек Стар. Ар щытекIуащ Налшык щекIуэкIа Вступительный, КИФЩI саугъэтхэм, Краснодари и Супер Дербим ещанэ щыхъуащ.

Псори зэхэту шыгъажипщI екIуэкIынущ. ШыщхьэуIум и 7-м Налшык ипподромым зэшыгъуэ щыIэнукъым. ЩыщIидзэр сыхьэт 12-рщ.