ШыщхьэуIум и 10-м къыщыщIэдзауэ жэпуэгъуэм и 2 пщIондэ ди къэралым щекIуэкIынущ Урысей Федерацэм и щIыналъэхэм я 1 Урысейпсо спартакиадэ. Спорт лIэужьыгъуэ 39-мкIэ зэпеуэхэр щекIуэкIынущ къэралым и щIыналъэ 12-м. ГуфIэгъуэкIэ спартакиадэр шыщхьэуIум и 20-м Мэзкуу къалэ дэт «Мегаспорт» спорт комплексым къыщызэIуахынущ. Зэхьэзэхуэхэм я къызэгъэпэщакIуэщ Урысейм СпортымкIэ и министерствэр.
Псори зэхэту Урысейпсо спартакиадэм хэтынущ цIыху мин 13, абыхэм ящыщу 9200-р спортсменщ, 3800-р тренеррэ IэщIагъэлIрэщ. Зэхьэзэхуэм и саугъэт нэхъыщхьэхэм щIэбэнынущ Урысейм и щIыналъэхэм я командэ къыхэхахэм хэт спортсмен нэхъ лъэрызехьэхэр. Урысейпсо спартакиадэр зэхагъэуващ 2024 гъэм Париж щекIуэкIыну XXXIII Олимп джэгухэм я спорт программэм тету икIи бадминтон, баскетбол, бокс, лъакъуэрыгъажэ спорт, псы поло, волейбол, гандбол, гольф, байдаркэхэмрэ каноэмкIэ псым есын, дзюдо, шы спорт, атлетикэ псынщIэ, стIолыщхьэ теннис, парус спорт, псы есын, псым хэлъэн, батутым щыдэлъеин, фочкIэ нэщанэм еуэн, регби-7, самбэ, серфинг, зэдэууэ псым есын, къырым дэкIын, скейтбординг, иджырей пятиборье, спорт бэнэкIэ, спорт гимнастикэ, шабзэкIэ нэщанэм еуэн, къэфэкIэ спорт, теннис, триатлон, тхэквондо, атлетикэ хьэлъэ, фехтование, губгъуэ хоккей, художественнэ гимнастикэ спорт лIэужьыгъуэхэмкIэ зэпеуэнущ.
Мэзкуу щызэхьэзэхуэнущ спорт лIэужьыгъуэ I8-кIэ саугъэт нэхъыщхьэхэр къыщыхьынымкIэ. Тэтэрстаным лIэужьыгъуэ I2-мкIэ зэпеуэхэм щекIуэкIынущ, Мэзкуу областым - 6, Санкт-Петербург – 3. КъищынэмыщIауэ, зэхьэзэхуэхэр щызэхэтынущ Краснодар, Камчатскэ крайхэм, Новгородскэ, Калининградскэ, Челибинскэ, Новосибирскэ, Тульскэ областхэм, Къэрэшей-Шэрджэс Республикэм.
«Иджырей спартакиадэр ди къэралым и спорт зэхьэзэхуэ нэхъыщхьэу щытынущ. Дэ дыкIэлъыплъынущ зыщагъасэ спорт лIэужьыгъуэхэм дуней псом пашэныгъэр щызыIыгъ Урысейм и атлет нэхъ лъэщ дыдэхэм я зыкъэгъэлъэгъуэныгъэм», - къыхигъэщащ Урысейм спортым и министр Матыцин Олег.
