Тэмэму дыпсэун папщIэ

Къэбэрдей-Балъкъэрым терроризмэмрэ экстремизмэмрэ епха щIэпхъаджагъэхэр къэмыгъэхъуным гулъытэшхуэ щыхуащI. Абы ехьэлIа Iуэхугъуэхэр къызэрагъэпэщ «КъБР-м терроризмэмрэ экстремизмэмрэ щапэщIэтын» къэрал программэм къыщыгъэлъэгъуахэм тету. 2022 гъэр къызэрихьэрэ, КъБР-м Егъэджэныгъэмрэ щIэныгъэмкIэ и министерствэми унэтIыныгъэ зэмылIэужьы­гъуэкIэ гуэшауэ лэжьыгъэхэр ирегъэкIуэкI. 

Зи гугъу тщIы Iуэхухэр щымыIэныр, шэч хэмылъу, щIалэгъуалэр зэрыбгъасэм елъытащ. Абы ипкъ иткIэ, «ЕгъэджакIуэхэм я Iэзагъэм щыхагъахъуэ центр» къэрал IуэхущIапIэм мы гъэм мэлыжьыхьым и 12-м къыщыщIэ­дзауэ и 25 пщIондэ курсхэр къыщызэрагъэ­пэщащ, цIыху 80-м нэс къызэщIиубыдэу. Апхуэдэ дыдэу курыт еджапIэхэм щрагъэ­кIуэкIащ терроризмэмрэ экстремизмэмрэ япэ­щIэтынымрэ хабзэр къызэпемыгъэудынымрэ епха Iуэхухэм щытепсэлъыхьа конференцхэр.
Мэлыжьыхь - накъыгъэ мазэхэм ирагъэ­кIуэкIа зэхьэзэхуэр ехьэлIауэ щытащ терроризмэм пэщIэтыным теухуа рефератхэр еджа­кIуэхэм ирагъэтхыным. Зэпеуэм цIыхуищым текIуэныгъэр щыхуагъэфэщащ, 9-м я лэжьыгъэхэри къыхагъэщащ.
КъищынэмыщIауэ, Къэбэрдей-Балъкъэрым щекIуэкIащ «Команда 5642» республикэ щIалэгъуалэ зэхыхьэр. Ар хуэунэтIауэ щытащ щIэблэр щIэпхъаджагъэ ямыщIэным хуэу­щииным, лъэпкъ зэмылIэужьыгъуэхэм къы­хэкIахэмрэ зи дин зэтемыхуэхэмрэ зэгурыгъэIуэным, щIалэ­гъуалэм я жэрдэмыр ядэIыгъыным. КъБР-м Егъэджэныгъэмрэ щIэныгъэмкIэ и министерствэм къызэригъэпэща Iуэхур махуищкIэ (мэкъуауэгъуэм и 15 - 18-хэм) Къэбэрдей-Балъкъэр къэрал университетым Iуащхьэмахуэ щиIэ и егъэджэны­гъэ-щIэныгъэ IуэхущIапIэм щызэхэтащ. ЩIалэгъуалэр абдеж щрагъэдэIуащ шынагъуэншагъэм, щIэпхъаджагъэхэм япэIэщIэу зэ­рыщытыпхъэм, лъэпкъ, дин зэгурыIуэ щыIэн зэрыхуейм. ­КъищынэмыщIауэ, ныбжьыщIэхэр ирагъэ­плъащ икIи я Iуэху еплъыкIэхэм зыщагъэ­гъуэзэн папщIэ трагъэпсэлъыхьыжащ «Долгая дорога к миру», «Исповедь террориста», «Охотники за головами» видеофильмхэм. А Iуэхум хэтащ еджапIэ нэхъыщхьэхэмрэ курытхэмрэ щIэсхэу, волонтёр зэгухьэныгъэхэм хэту, апхуэдэуи балигъ ныбжьым нэмысауэ Iуэху­гъуэ зэхуэмыдэхэмкIэ зи нэIэ зытрагъэт щIалэгъуалэ 50-м нэс. 
Апхуэдэуи «КъБР-м терроризмэмрэ экстремизмэмрэ щапэщIэтын» къэрал программэм хыхьэу, КъБР-м Егъэджэныгъэмрэ щIэныгъэмкIэ и министерствэм зэхьэзэхуэ къыхилъхьащ жылагъуэм дежкIэ мыхьэнэшхуэ зиIэ проектхэм ахъшэ саугъэтхэр зэрыхухахынум теухуауэ. Къыхэдгъэщынщи, ар бадзэуэгъуэм и 29-м ирагъэжьащ икIи шыщхьэуIум и 28-м зэхуащIыж. 
2022 гъэр къызэрихьэрэ министерствэм и IэщIагъэлIхэр щIэх-щIэхыурэ еджапIэхэм йоблагъэ, терроризмэмрэ экстремизмэмрэ къэ­мыгъэхъуным и мыхьэнэр студентхэм я деж нахьэсын мурад яIэу. Апхуэдэуи балигъ ныбжьым нэмысахэми ямыгъэтIысауэ тезыр зытралъхьахэми абы и лъэныкъуэкIэ ядолажьэ. СтIол хъурейхэр, лекцэхэр, семинархэр - лъэныкъуэ куэдкIэ бгъэдохьэ республикэм терроризмэм щыпэщIэтыным. Апхуэдэ Iуэху­гъуэхэр щрагъэкIуэкIкIэ хабзэхъумэ IэнатIэхэм, жылагъуэ, дин зэгухьэныгъэхэм я лIыкIуэхэр ирагъэблагъэ.
Министерствэм къызэрыщыджаIамкIэ, 2022 гъэм и япэ илъэс ныкъуэм уриплъэжмэ, терроризмэмрэ экстремизмэмрэ япэщIэтыным хуэу­нэтIа Iуэхугъуэу 300-м нэблагъэ ирагъэкIуэкIащ. Абыхэм цIыху мини 100-м щIигъу хэтащ.