Iус зэхэлъым къыщIэупщIэм хохъуэ

Iэщым ирагъэшх Iус зэхэлъыр къыщIэзыгъэкIыу Къэбэрдей-Балъкъэрым щылажьэ IуэхущIапIэхэр нобэкIэ 13 мэхъу. Ахэр псори хьэрычэт щIэн IэнатIэ мыинхэрэ уней IуэхущIапIэхэрэщ.

Дызэрыт илъэсым и япэ мазитIым къриубыдэу абыхэм псоми зэхэту къыщIагъэкIащ Iусу тонн мин 17,8-рэ икIи ар хуэдэ 1,9-кIэ нэхъыбэщ нэгъабэ и апхуэдэ лъэхъэнэм хуэзэу щыIа бжыгъэхэм нэхърэ. Iус зэхэлъыр ирагъэшх Iэщышхуэм, мэл-бжэным, джэдкъазым, бдзэжьейм, тхьэкIумэкIыхьым, нэгъуэщIхэми.

Езыхэм зэрахуэ Iэщымрэ джэдкъазымрэ зрикъунум хуэдиз Iус ягъэхьэзырым и закъуэкъым а IуэхущIапIэхэм, ар иращэ а IэнатIэм хэт мэкъумэшыщIэхэм. Къэбэрдей-Балъкъэрым имызакъуэу, къэралым и нэгъуэщI щIыналъэхэми  щыщхэр къыщIоупщIэ абы икIи куэду ящэху, Iусым и зэхэлъыкIэм фIагъ лъагэ зэриIэр къалъытэу, къитащ иджыблагъэ КъБР-м Мэкъумэш хозяйствэмкIэ и министерствэм.