Дунейпсо чемпион ЩхьэщэмыщI Рэмэзан

Узбекистаным и Намаган къалэм щекIуэкIащ бгырыпх бэнэкIэмкIэ дунейпсо чем­пио­нат. Абы хэтащ къэрал  32-м къикIа спортсмен 350-рэ. Урысей Федерацэм и командэ къыхэхам дэщIыгъуу зэ­пеуэм зыкъыщигъэлъэ­гъуащ Къэбэрдей-Балъкъэ­рым щыщ спортсменми.

Зи хьэлъагъыр килограмми 100-м щIигъухэм я гупым щригъэкIуэкIа зэпэщIэтыныгъищми щытекIуа Щхьэщэ­мыщI Рэмэзан дунейпсо зэхьэзэхуэм и абсолютнэ чемпион хъуащ. Лэскэн муници­пальнэ районым и ДЮСШОР-м и гъэсэныр зэхьэзэхуэм хуигъэхьэзыращ и адэ икIи и ­тренер, лъэпкъ бэнэкIэмкIэ РСФСР-м и чемпион Щхьэ­щэмыщI Ахьмэдхъан.
- Финалым ипэ къихуэу зэ­­-пэ­щIэтыныгъитIым сыщыте­кIуащ. ЕтIуанэ бэнакIуэм дезгъэкIуэкIа зэIущIэр нэхъ къыстехьэлъащ, ауэ абы кърикIуам зэхьэзэхуэм кIэух хуэ­хъунур игъэбелджылащ. Финалым хьэрхуэрэгъу къыщыс­хуэхъуам и бэнэкIэм фIыуэ сыщыгъуазэт, езыри сцIыхурт. ПэщIэдзэ зыгъэсэныгъэхэр ­зэгъусэу едгъэкIуэкIащ, а лъэхъэнэми абы сыщыкIэлъы­плъурэ тактикэ щхьэхуэ хуэзгъэхьэзыращ. Мазэ бжыгъэ­-кIэ зызыхуэзгъэхьэзыра зэ­IущIэм секунд 40-м къриу-­
быдэу сы­щы­текIуащ, - жиIащ фокIа­дэм и 12-м Налшык и ­къухьлъатэтедзапIэм къыщрагъэблэгъэжа ЩхьэщэмыщI Рэмэзан.
Дунейпсо чемпионатым зэ­рыщытекIуам къыхэкIыу адыгэ щIалэм къыхуагъэфэщащ ­дунейпсо класс зиIэ спортым и мастер цIэ лъапIэр. АдэкIэ ­ди лъэпкъэгъум зыхуигъэ­хьэзы­рынущ Дунейпсо Кубокыр къэхьыным ехьэлIа зэхьэ­зэ­хуэм.
Къэбэрдей-Балъкъэр къэ­рал университетым Физическэ щэнхабзэмрэ спортымкIэ и факультетыр къэзыуха Щхьэ­щэмыщI Рэмэзан иджыри ­ехъулIэныгъэ куэдкIэ дыщо­гугъ.