Зи анэдэлъхубзэр гугъэзагъэу зыгъэшэрыуэ ТхакIуэ ХьэIупщы МуIэед къызэралъхурэ илъэс 70 ирокъу

ХьэIупщы МуIэед ТIалэ и къуэр Къулъкъужын Ищхъэрэ къуажэм 1952 гъэм дыгъэгъазэм и 20-м къыщалъхуащ. 1970 гъэм къуажэ школыр къиухри, илъэскIэ ухуакIуэ бригадэм щылэжьащ. I97I-I973 гъэхэм советыдзэм къулыкъу щищIащ. Абы щыгъуэщ МуIэед журналистикэм гу щыхуищIар. Ленинград военнэ округым къыдигъэкI «На страже Родины» газетым и тхыгъэхэр къытрыригъадзэурэ а IэщIагъэм дихьэхыпауэ абы къегъэзэж къыщалъхуа къуажэм.

Дзэ къулыкъур щIыхь пылъу зэфIэзыгъэкIа ХьэIупщыр КъБКъУ-м и тхыдэ-филологие факультетым щIотIысхьэ. Ар къиуха нэужь, я къуажэм дэт курыт школым адыгэбзэмрэ литературэмкIэ илъэситIкIэ щрегъаджэ. Литературэм пымыщIа нэгъуэщI лэжьыгъэхэми пэрытащ МуIэед. Ауэ, дэнэ щымыIами, абы тхэн Iуэхур зэи IэщIыб ищIакъым. I98I гъэм куэд щIауэ здырагъэблагъэ радиокомитетым корреспонденту мэув. Журналист IэщIагъэм ехьэлIауэ къигъэлъагъуэ зэфIэкIхэм щхьэкIэ къулыкъукIэ драгъэкIуэтейуэрэ, абы IэнатIэ зыбжанэ зэблехъу: «Адыгэ псалъэ» газетым и корреспондентщ, Къэбэрдей-Балъкъэрым и ТхакIуэхэм я союзым и консультантщ, жэуап зыхь и секретарщ, «Iуащхьэмахуэ» журналым публицистикэмкIэ и отделым и унафэщIщ. 2012 гъэм ХьэIупщыр пенсэм макIуэ, арщхьэкIэ, мазэ бжыгъэ фIэкIа дэмыкIауэ, а журнал дыдэм жэуап зыхь секретару ирагъэблэгъэж. А IэнатIэм ар пэрытащ 2018 гъэ пщIондэ – дунейм ехыжыху.
МуIэед и Iэдакъэ къыщIэкIащ статьяхэр, очеркхэр, рецензэхэр, интервьюхэр. Урыс тхакIуэхэм я тхыгъэ зыбжани абы адыгэбзэм Iэзэу къригъэтIэсащ. 
ХьэIупщым новеллэхэмрэ повестхэмрэ щызэхуэхьэсауэ и тхылъитI дунейм къытехьащ – «Къулъкъужын макъамэхэр», «Хуэрэджейр мэгъагъэ» жыхуиIэхэр. И ещанэ тхылъым и Iэрытхри къызэрыдэкIыным хуигъэхьэзырат. Иджырей гъащIэм и лъэныкъуэ псори къыщIэгъэлъауэ къыщигъэлъэгъуэж роман зэритхми куэд щыгъуазэт. АрщхьэкIэ ар тхылъеджэхэм я пащхьэ ирилъхьэну хунэсакъым. 
Дунейпсо тхыдэми, культурэми, литературэми, гъащIэм и адрей лъэныкъуэ куэдми фIыуэ хищIыкIт МуIэед. Арагъэнт абы и дэтхэнэ IэдакъэщIэкIри купщIафIэ, щIэщыгъуэ, гуимыхуж щIэхъур. 
ХьэIупщыр Урысей Федерацэм и ТхакIуэхэми УФ-м и Журналистхэми я союзхэм хэтащ.
Зи гупсысэр жан, зи гурыщIэр куу, зи анэдэлъхубзэр гугъэзагъэу зыгъэшэрыуэ тхакIуэт МуIэед. Ди критикхэм гу зэрылъатащи, абы и IэдакъэщIэкIхэр хэлъхьэныгъэ нэс хуэхъуащ ди лъэпкъ литературэм.