(сабийхэм папщIэ)
Жыгым дэжея жызумей щхьэкIэм щIэх-щIэхыурэ зыгуэр къыщоджэ. Джэш пичу абдежым щыс Ларисэ шынэри, къыщылъэтащ. Зэрысабийрэ блэм и джэ макъыр зыхигъэгъуащэ щыIэтэкъым абы.
ПщIащэ пылъэлъыжыгъуэм зэрынэсу, я мыIэрысей хадэшхуэм хьэблэм дэс цIыкIухэр къыщызэхуэсырти, тхьэмпэ самэшхуэхэр джэгупIэ ящIырт. Блэр къаджэу щызэхахкIэ, я джэгунри зэпагъэурти, шынауэ псоми заудыгъурт, ауэ зэи ар къахуэлъагъуртэкъым. Гупым ящыщ Лацэ, «блэ» жаIэу яхуимыдэу щIидзащ.
- «КIэнкIыхьщ» жытIэн хуейр, «кIэнкIыхь, ялыхь къытхуэгъэгъу» жыдмыIэмэ, къыдэбгынущ», - къыздикIари къахуэмыщIэу, ар гупым къахихьат абы махуэ гуэрым. Сабий акъылыр куэд хуейт?- я тхьэкIумэм къицырхъар мыдрей жыIэзыфIэщхэм зэуэ къапхъуэтащ. Иджы блэр къэджэху, цIыкIу гупыр «кIэнкIыхьым» елъэIурт. Ар щIэкIэнкIыхьри, къахуигъэгъун хуейуэ ятелъри уэ къащIэт…
Ларисэ зыхэт гукъэкIыжхэм зэуэ къыхишыжащ, тэлай дигъэкIыу джэн щIэзыдзэжа блэм. Къуэрагъым я нэхъ иныр чы-бжэгъу зэтелъым къыхилъэфри, темыгушхуащэурэ бжьамийм теуIуащ ар, блэр къихуу и щхьэм къытехуэнкIэ шынапэурэ. Плъэмэ, бжьамий зыкъэзыгъэшым Iэпэ псыгъуэ цIыкIуищ, удзыфэ- къуэлэн хъужауэ зыгуэрым кърегъэж. Ларисэ ар зыкъомрэ зыпиплъыхьащ, зригъэщхьынур къыхуэмыщIэу. БашымкIэ мащIэу Iэпэм щецырхъым, шэм хуэдэу и щхьэщыгумкIэ щхьэпрылъэтри, жыг щIагъым щехуэхащ. ЧыпэмкIэ удзыпэр мащIэрэ щIищыкIа - гъуэбжэгъуэщу бзэхащ цIэимыIуэр.
И кIэр ирихъуэкIыу махуэ псом къыбгъэдэса джэдуужьыр зэкIэлъхьэпыту къэпщIэуащ. Жыгым тест ар, къыбгъэдэхута хьэндыркъуакъуэ удзыфэ цIыкIур зэпиплъыхьу. Ар апхуэдизкIэ пщIащэ зыхэсым ещхьти, гу зэрылъыптэн щыIэтэкъым. Еплъыпэмэ, къелъагъу къудамэ лантIэр быдэу зыIыгъ Iэпэ удзыфэ цIыкIуищыр…
ИгъащIэ лъандэрэ Ларисэ блэм и джэ макъыу игугъар, жыгыщхьэм ис хьэндыркъуакъуэ цIыкIум ейуэ къыщIэкIащ. ИщIэртэкъым абы блэр зэрымыджэри.
