Мырзэкъаным и 13-нэ текIуэныгъэ

«ММА»-кIэ зэджэ бэнэкIэ зэмылIэужьыгъуэхэмкIэ зэкIэлъыпыту  13-рэ щытекIуащ Мырзэкъан Азэмэт. 
Зэи къыхамыгъэщIа ди щIалэ хъыжьэр Америкэм и Штат Зэгуэтхэм я спортсмен Джейкоби Дастинэ текIуащ и Iэ сэмэгур етIуанэ раундым зэрикъутэжауэ. «Сэ срогуфIэ икIи срогушхуэ си ехъулIэныгъэхэм. СыволъэIу нэхъ бэнакIуэ лъэрызехьэ къыспэщIэвгъэувэну»,- жиIащ Азэмэт зэхьэзэхуэр  къызэзыгъэпэщхэм захуигъазэу.

 Чемпион цIэм щIэбэнынухэр

Къэрэшей-Шэрджэс Республикэм илъэс 13-14-м ит ныбжьыщIэхэм боксымкIэ я урысейпсо зэхьэзэхуэ щекIуэкIащ ди къэралым и профсоюзхэм я жэрдэмкIэ. 

ЦIыху 200-м щIигъу хэтащ зэхьэзэхуэм. Къалэн нэхъыщхьэу зэпеуэм хуагъэувар Урысейм пашэныгъэ къыщыхьыным щIэбэнынухэр гъэбелджылынырт.
Килограмм 44-рэ зи хьэлъагъ спортсменхэр ерыщу зэпэщIэтащ. А зэхьэзэхуэ гугъум  ди щIалэ ГъукIапщэ Альберт япэ увыпIэр къыщихьащ. Иджы ар щIэбэнынущ Урысейм и чемпион хъуным. Альберт зэхьэзэхуэм хуагъэхьэзыращ Куэшмэн Аслъэнрэ Елгъэр Эльдаррэ.
Килограмм 46-рэ зи хьэлъагъ гупым етIуанэ увыпIэр къыщихьащ ди спортсмен Батыр Ринат. Ар зыгъэхьэзырар Джылахъстэн Муратщ.
Гъуэгуанэ жыжьэ зэпызычахэр БанэкIэ хуитымкIэ Урысейм пашэ щыхъуным теухуауэ Якутск щекIуэкIа зэхьэзэхуэм хэтащ зи ныбжьыр илъэс 21-м щхьэдэмых щIалэгъуалэр.

Спортсмен 300-м щIигъу зэхуишэсат мы Iуэхум

Къэбэрдей-Балъкъэрым икIауэ мыбы хэтщ бэнакIуэу 12. И хьэлъагъ елъытакIэ, зыхэта гупым япэ увыпIэр щиубыдащ Къылъшыкъуэ Ислъам (килограмм 97-рэ). Килограмм 74-рэ хъухэм къахэжаныкIащ Маргъущ Жэмал, ещанэ увыпIэр Шыгъэлыгъуэ Айдамыррэ Жыласэ Рустамрэ (килограмм 61-рэ), ЕхъулIэ Азэмэт (килограмм 97-рэ) сымэ къахьащ.

 Параолимп джэгухэр къапоплъэ

Хьэлъэ къэIэтыным лIэужьыгъуищкIэ Урысей и чемпионат Санкт-Петербург, спортсмен 200  хэту, щекIуэкIащ. Ар къызэрагъэпэщат я узыншагъэкIэ сэкъат зиIэхэм папщIэ.
Къэбэрдей-Балъкъэр Республикэм щыщу щIалитI абы хэтати, япэ увыпIэр ГъукIэлI Ислъам къихьащ. Ар псори зэхэту килограмм 601-м пэлъэщащ. Мыбыхэм я тренер нэхъыщхьэр икIи капитаныр килограмм 72-рэ зи хьэлъагъ спортсменхэм я гупым етIуанэ щыхъуа Кугъуэт СулътIанщ. Ди щIалитIым Параолимп джэгухэм Урысейм и спорт щIыхьыр щахъумэнущ.