Жылэр щIэIэпхъуарЖэбагъы зыдэс жылэр бгы лъапэм тест. Бгым дэкIауэ, Жэбагъы гу лъитащ бгыр къызэрежьам. Бгы къэчапIэм мывэ дилъхьащ Жэбагъы. Зэман дигъэкIри, мывэм еплъащ: мывэр бгым дэкIуэтат. Тригъазэурэ зыбжанэрэ кIэлъыплъащ мывэм: мывэр бгы къэчам дэкIуатэ зэпытт. Къуажэпщым деж кIуащ Жэбагъы: - Бгыр къыгуэунущ, къуажэр гъэIэпхъуэ, - жери. Къуажэм и ныкъуэр бгы лъапэм къытекIащ, бгы лъапэм къытенар бгыр къыгуэури щIиубыдащ.
Лэжьыгъэм емыкIу илъкъым «Жэбагъы зэдгъэлъэгъунщ, акъыл къыпытхынщ», - жари шу гуп къыхуепсыхащ Къэзэнокъуэм. Шу гупыр епсыха щхьэкIэ, Жэбагъы къапежьакъым. ПщIантIэм зы щIалэ дэтти еупщIащ: - Жэбагъы дэскъэ? – жари. -Дэсщ, - къажриIащ щIалэм. – Бжьын епщIэ фызым щIыгъуу. - Фызым щIыгъуу бжьын зыпщIэм акъыл къыпытхынкъым, - жари шу гупыр шэсыжын хъуауэ, Жэбагъы хадэм къикIыжащ, шу гупыр хьэщIэщым иришэри Iэнэ къахуигъэуващ. Iэнэм здыпэрысым, шу гупым я нэхъыжьыр Жэбагъы къехъурджэуащ: - Фызым бжьын дыбопщIэ, ар емыкIукъэ? – жери. - Лэжьыгъэм емыкIу илъкъым, - жиIащ Жэбагъы. – ЕмыкIур лэжьыгъэм зыщызыдзейрщ. ЛIы гупыр арэзы хъуауэ Жэбагъы и пщIантIэм дэкIыжащ.
Iуэху цIыкIу щыIэкъым Жэбагъы жьы хъуауэ шу гуп къыхуепсыхащ. ЛIы гупыр щыщIэупщIэм, Жэбагъы хадэм зэрисыр къыжраIащ: - Бжьын епщIэ, - жари. - Хадэм итIысхьэжауэ бжьын зыпщIэм псалъэ къыпытхынкъым, - жаIащ лIы гупым. ИтIани: - Мыбы нэс дыкъыщыкIуакIэ, зыIудгъэщIэнщ, - жари хьэщIэщым ихьащ. Жэбагъы хадэм къикIыжри, хьэщIэм яхыхьащ. - ЩIалэ цIыкIухэм кIэн сащыдэджэгупхъэм садэджэгуащ, - жиIащ Жэбагъы. – Си ныбжь нэсри шум садэшэсащ, садызекIуащ. Жьы сыхъури, фызым сакъыхэнащи, ящIэр ядызощIэ. Iуэху цIыкIу щыIэкъым: фи ныбжьым хуэфащэр влэжь.
Жэбагъы и уэсят Жэбагъы жьы хъууэ и лIэгъуэр къыщыблагъэм: - Уэсят къытхуэгъанэ, - жари жылэр къелъэIуащ. - Си уэсятыр мыращ, - жиIащ Жэбагъы. – Япэ фымыуэ, къывэуэм фыпимыкIуэт. Гъунэгъу Iей благъэ фымыщI. ФифI фымыгъэпуд. Фи Iей фымыгъэпщкIу. Зэманым фыдекIу. Къэрмокъуэ Хьэмид зэхуихьэсыжа IуэрыIуатэм щыщщ.
Поделиться:
Читать также:
08.05.2024 - 13:05 →
ЩIэныгъэлI усакIуэхэр
07.05.2024 - 14:31 →
Къэбэрдейм цеипхъэжь джанэр зэрыщаха щIыкIэр
06.05.2024 - 16:22 →
ФIыуэ флъагъухэм закъевгъащIэ!
06.05.2024 - 13:00 →
ЛIыгъэр зыгъэунэхуар
03.05.2024 - 15:00 →
Гъатхэпежьэ удз гъэгъахэр
|