Илъэс 87-рэ гъуэгуанэ

Бадзэуэгъуэм и 3-р ГИБДД-м (ГАИ) и лэжьакIуэхэм я махуэщ. Урысей МВД-м Гъуэгухэм шынагъуэншэу щызекIуэным кIэлъыплъ и Къэрал инспекцэр къызэрызэрагъэпэщрэ илъэс 87-рэ зэрырикъум теухуа зэIущIэ гуапэ щекIуэкIащ Къэбэрдей-Балъкъэрым ОВД-мрэ ВВ-мрэ я ветеранхэм я советым.

Махуэшхуэ зэIущIэм хэтащ къэрал кIуэцI IуэхухэмкIэ министру КъБР-м щыIэм и къуэдзэ, полицэм и полковник Бахъуэ Аслъэн, МВД-м и ветеранхэм я советым и тхьэмадэ Пыхъ МуIэед, респуб­ликэм и Къэрал автоинспекцэм и управленэм и унафэщIым и къалэнхэр пIалъэкIэ зыгъэзащIэ, полицэм и полковник Сухорученкэ Дмитрий, IуэхущIапIэм и гупыр.

Ведомствэм и унафэщIхэм къабгъэдэкIыу Бахъуэ Аслъэн зи махуэр зыгъэлъапIэхэм фIыщIэ яхуищIащ хьэлэлу илъэс куэд хъуауэ я IэнатIэм зэрыпэрытым папщIэ, узыншагъэ яIэу псэуну иджыпсту лажьэхэми ветеранхэми ехъуэхъуащ.

Пыхъ МуIэед жиIащ хабзэхъумэ IэнатIэм и унафэщIхэм, хэхауэ къэрал кIуэцI IуэхухэмкIэ министр, полицэм и генерал-лейтенант Павлов Василий я Советми МВД-м и ветеранхэми зэрызыкъыщIагъакъуэр, къыхигъэщащ тIысыжауэ зызыгъэпсэху нэхъыжьхэми, абыхэм я унагъуэхэми ядэIэпыкъуну зэрыхьэзырыр.

Сухорученкэ Дмитрий езыми, Къэрал автоинспекцэми къабгъэдэкIыу ветеранхэми ехъуэхъуащ, къыхигъэщащ къыкIэлъыкIуэ илъэсхэми нобэ хуэдэу зэкъуэту махуэшхуэхэр ягъэлъэпIэну зэрыщыгугъыр.

Дунейм ехыжа я лэжьэгъухэр ягу къагъэкIыжу, я фэеплъым пщIэ хуащIу къызэхуэсахэр дакъикъэкIэ щымащ.

Къэрал автоинспекцэм и республикэ управленэм и лэжьакIуэхэм ягъэхьэзырри ягъэлъэгъуащ Къэбэрдей-Балъкъэрым и ГАИ-ГИБДД-м и тхыдэр къызытещ сурэтхэм я видеоальбом. Ветеранхэм ялъэгъуащ лэжьыгъэм щыпэрытам траха я сурэтхэр, куэд ягу къагъэкIыжащ, къыхуащI гулъытэр нэхъри зыхащIащ.

АдэкIэ ветеранхэмрэ нобэ къалэныр езыхьэкI лэжьакIуэхэмрэ иратащ ЩIыхь тхылъхэмрэ фIыщIэ письмохэмрэ.

Къызэхуэсахэм зыщаплъыхьащ КъБР-м щыIэ МВД-м и музейм, шей Iэнэм бгъэдэсу я гукъэкIыжхэмкIэ зэдэгуэшащ.