Гупсысэр зыунэтI къару лъэщ

ХъыбарегъащIэ IэнатIэхэр ди гъащIэм увыпIэшхуэ щызыубыд, жылагъуэм гупсысэр щызыунэтI, Iуэхугъуэ хэхахэр зэрыпхагъэкI Iэмэпсымэ лъэщщ. Зэманым зэрызихъуэжымрэ гъащIэм зэрызиужьымрэ елъытауэ IэнатIэм къыпэщылъ къалэнхэри нэгъуэщI мэхъу: абыхэм къахохъуэ, зэрызэбгъэхъулIэфыну мардэхэми теплъэщIэрэ купщIэщIэрэ ягъуэт. Куэд мэхъу иджырей хъыбарегъащIэ Iэмэпсымэхэр. Апхуэдэу щытми, дэтхэнэми езым и ухуэкIэрэ Iуэху зегъэкIуэкIэрэ иIэжщ.

Нэхъ IэнатIэ хьэлэмэтхэм, апхуэдэуи жэуаплыныгъэ зыпылъхэм халъытэ журналистикэм дызэрыт лъэхъэнэм къыпэщылъ къалэнхэмрэ мурадхэмрэ ятеухуауэ щытащ Владикавказ щекIуэкIа зэхуэсышхуэр. Абы щытепсэлъыхьащ къэралми жылагъуэми апхуэдиз мыхьэнэ щызиIэ хъыбарегъащIэ IэнатIэхэм иджырей дунейм, политикэ зэпэщIэувэныгъэ пхъашэмрэ экономикэ дэкъузэныгъэ ткIийхэмрэ я лъэхъэнэм, щагъуэт увыпIэм. «PRO Кавказ» фIэщыгъэр зиIа а зэхуэс иныр, къыхэдгъэщынщи, иджы етIуанэу а щIыналъэм щызэхашэ, республикэм и Iэтащхьэ Меняйлэ Сергей и жэрдэмкIэ. Форумыр егъэкIуэкIынымкIэ дэIэпыкъуэгъу хъуащ ар къыщызэрагъэпэща, Оперэмрэ балетымкIэ Мариинскэ театрым и къудамэу Осетие Ищхъэрэм щылажьэм и унафэщI Гергиев Валерий, «Казачий хутор», «ПМК-МЕДЭК», Сбер, «Меркада», «U-holding», «ТБАУ», «Бавария» уней IэнатIэхэр, УФ-м и Журналистхэм и зэгухьэныгъэм РСО - Аланием щиIэ къудамэр, нэгъуэщIхэри. 

Дызэрыт гъэмахуэм Кавказ Ищхъэрэ федеральнэ щIыналъэм къыщыхъуа Iуэхугъуэ нэхъыщхьэхэм халъытэ форумыр. Абы и утыкум щызэхуэзащ ди къэралым и щIыпIэ куэдым къикIа журналистхэр, блогерхэр, тхылъ къыдэзыгъэкIхэр, къэрал къулыкъущIапIэхэми, жылагъуэ, эксперт зэгухьэныгъэхэми, хьэрычэтыщIэ IэнатIэхэми я лIыкIуэхэр. ЦIыху 500-м нэс зыхэта зэIущIэ иным КИФЩI-м хыхьэ субъектхэм нэмыщI, къекIуэлIащ Москварэ Санкт-Петербургрэ, КъуэкIыпIэ Жыжьэм, Белоруссием, Армением, Осетие Ипщэм, нэгъуэщI щIыналъэхэми щылажьэ медиа IэнатIэхэм къикIа гупхэр, IэщIагъэлI пашэхэр. Форумым и хьэщIэ лъапIэхэт хъыбарегъащIэ IэнатIэм и эксперт цIэрыIуэхэри. Апхуэдэхэт «Санкт-Петербург» телеканалым, Кавказыр джынымкIэ институтым (Армение), ТАСС-м и пресс-центрым, РЕН ТВ, «Минск-Новости» агентствэм (Белоруссие), Осетие Ищхъэрэ - Аланием Печатымрэ цIыхубэ коммуникацэмкIэ и къэрал комитетым, республикэм и Журналистхэм я зэгухьэныгъэм, «АнтиФэйк» проектым я унафэщIхэр, политологхэр.

Ди республикэм и лIыкIуэу «PRO Кавказ» форумым хэтащ «Адыгэ псалъэ» республикэ газетым и редактор нэхъыщхьэ, КъБР-м и Журналистхэм я зэгухьэныгъэм и тхьэмадэм и къалэнхэр зыгъэзащIэ Жыласэ Заурбэч (ар гупым я пашэт), «Заман» республикэ газетым и редактор нэхъыщхьэ Конаков Хьэсэн, «Iуащхьэмахуэ» тхылъ тедзапIэм и унафэщI Ацкъан Руслан, «Кабардино-Балкарская правда» республикэ газетым и корреспондент Васинэ Вероникэ сымэ.

МахуитIкIэ екIуэкIа зэхуэсышхуэм къэрал гулъытэ лъагэ игъуэтащ. Абы и пленарнэ зэIущIэм хэтащ Осетие Ищхъэрэ – Алание Республикэм и Iэтащхьэ Меняйлэ Сергей, республикэм и Правительствэм и УнафэщI Джанаев Борис. Ахэр гуапэу ехъуэхъуащ зэхуэс иным кърихьэлIа псоми лэжьыгъэфI кърахьэлIэну икIи къыхагъэщащ зэхъуэкIыныгъэшхуэхэр щекIуэкI иджырей лъэхъэнэм хъыбарегъащIэ IэнатIэхэм къапэщылъ къалэнхэм хэпщIыкIыу зэрызихъуэжар, ахэр, япэм хуэмыдэжу, нэхъ ткIий, жэуап зыпылъ зэрыхъуар. IэнатIэхэм жылагъуэм, политикэм, гъащIэм щаубыд мыхьэнэр нэхъ лъагэ зэрыхъуар жаIэу, къулыкъущIэхэм ягъэбелджылащ журналистхэм пэжыр я тегъэщIапIэу къэралым, дунейм щекIуэкI Iуэхугъуэхэр, дэтхэнэ къэхъукъащIэри къагъэлъэгъуэн зэрыхуейр. «Мы форумышхуэм къекIуэлIахэр жылагъуэ гупсысэр зыунэтI IэнатIэхэм я пашэхэращ, я лIыкIуэхэращ. Фэращ цIыхухэм зэхахыр, фи псалъэхэращ зэджэр, вгъэхьэзыр нэтынхэращ зэплъыр. Фэ жыфIэхэмрэ фи къалэмыпэм къыпыкI тхыгъэхэмрэ ятещIыхьауэ убзыхуа мэхъу ди цIыхухэм я нэхъыбэм я гупсысэр, дуней еплъыкIэр. ФIыщIэ фхузощI Iэзагъышхуэ фхэлъу, пэжымрэ пцIымрэ, хужьымрэ фIыцIэмрэ зэхэгъэщхьэхукIауэ тхылъеджэхэм, газетеджэхэм, телевизореплъхэмрэ радиом едаIуэхэмрэ я пащхьэ зэрифлъхьэм папщIэ. Фызэхъуажэ фи Iуэху зехьэкIэ пэрытхэмкIэ, фызэдэгуашэ гупсысэщIэхэмрэ къалэныщIэхэм фазэрылъэIэсыфыну IэмалхэмкIэ», - жаIащ абыхэм.

Зэхуэсым хэтхэм хъуэхъукIэ закъыхуигъэзащ УФ-м и Президентым и полномочнэ лIыкIуэу КИФЩI-м щыIэ Чайкэ Юрий. Абы къызэхуэсахэр щыгъуазэ хуищIащ РСО - Аланием и федеральнэ инспектор нэхъыщхьэ Гончаров Сергей. «Псори дызэкъуэту дызэдэлажьэмэ, дытекIуэнущ хъыбар нэпцIхэр жылагъуэм щызыгъэIу медиаIэнатIэхэу бэм я гупсысэр пэжымрэ зэпIэзэрытыныгъэмрэ тезышыну яужь итхэм. ХъыбарегъащIэ IэнатIэ зэмылIэужьыгъуэхэм я лIыкIуэхэм фи зэхуэсыр ирехъу методологие пэрытхэмрэ IэмалыщIэхэмрэ я къигъэхъуапIэ».

 Зэхуэсым къызэщIиубыда лэжьыгъэ купщIафIэхэм ящыщщ абы хэта щIыналъэ псоми ягъэхьэзыра, зыщыщ щIыналъэм и хъыбарегъащIэ IэнатIэм и лэжьэкIэр уэзыгъэцIыху гъэлъэгъуэныгъэ хьэлэмэтхэр. Ди республикэм къылъыса плIанэпэм къыщызэрагъэпэща гъэлъэгъуэныгъэм щыплъагъунут щIыналъэм дунейм къыщытехьэ тхылъхэр, газетхэмрэ журналхэмрэ я къыдэкIыгъуэ зэмылIэужьыгъуэхэр, бзищымкIи къызэгъэпэщауэ, балигъхэми сабийхэми яхуэгъэзахэр хэлъу. А псоми я гугъу зэпкърыхауэ ящIащ Жыласэ Заурбэчрэ Ацкъан Русланрэ.

 Куэдым гукъинэ ящыхъуащ Дагъыстэн Республикэм къикIа IэщIагъэлIхэм къызэригъэпэщахэри. Ахэр ятеухуат «Дагестанская правда» республикэ газетыр къызэрыдэкIрэ илъэси 105-рэ зэрырикъумрэ щIыналъэм и цIыхубэ усакIуэ, тхакIуэ Гамзатов Расул и гъащIэмрэ и творчествэмрэ.

Пленарнэ зэIущIэмрэ гъэлъэгъуэныгъэ купщIафIэхэмрэ къакIэлъыкIуэу форумым кърихьэлIахэр гуп-гупу лэжьащ, щхьэж дэзыхьэх унэтIыныгъэ елъытауэ.

«PRO Кавказ» медиазэхуэсыр абы хэта дэтхэнэм и дежкIи IэмалыфI дыдэщ IэнатIэм пэрытхэр зыгъэпIейтей, лъэхъэнэщIэм къигъэув къалэныщIэхэмрэ Iуэху зехьэкIэщIэ мардэхэмрэ щытепсэлъыхьыну. Мыхьэнэшхуэ иIащ медиафорумым хиубыдэу къызэрагъэпэща лекцэхэм, мастер-классхэм, «стIол хъурей» зэIущIэхэм.