Бгъэдэлъ фIыщIэм уасэ иIэкъымУэхъутэ Анзор Жамбот и къуэр 1915 гъэм щIышылэм и 10-м Хьэбэз районым хыхьэ Беслъэней къуажэм къыщалъхуащ. Къуажэ еджапIэр къиуха нэужь, Черкесск къалэм дэт педучилищэм щеджащ. 1938 - 1939 гъэхэм ар «Черкес плъыжь» газетым и редактору щытащ. Иужьым, IэнатIэ зэхуэмыдэхэр иIыгъащ, зауэр къэхъеиху. 1943 гъэм ар аргуэру адыгэ газетым и редактору ягъэув. Уэхъутэм къыхуагъэфэщащ «Лэжьыгъэм хьэлэлу зэрыпэрытым папщIэ» медалыр. 1938 гъэм фокIадэ мазэм «Черкес плъыжь» газетым и редактору щыта Мэшыкъуэ Хьэжумар дзэм къулыкъу щищIэну ираджэри, газетыр редакторыншэу къонэ. А IэнатIэр ЦIыхухэм ягу изуда 1937 гъэр икIaт. МащIэтэкъым абы щыгъуэм лажьи-хьэкъи имыIэу ягъэкIуэдар, газетым щылэжьахэри яхэту. - Сэращ, - жэуап иретыж Анзор. - АтIэ, уэрамэ, зыхуапэ, обкомыр къоджэ, - тегъэчыныхьауэ, пэрыуэгъу щыIэн зэрыхуэмейр щIигъэбыдэу жеIэ Къумыкъум. - Зэ, педсоветыр сыгъэухи, итIанэ дыкIуэнщ, - Анзор жиIа щхьэкIэ, модрейм къыхуидакъым. А дакъикъэхэм Анзор и гур куэдым жащ. Апхуэдэ зыхуэпэкIэ зиIэр чекистхэрати, хьэкъ зытрагъэхуар ягъэтIысыну щыкIэлъыкIуэм дежи арат ящыгъ хабзэр. «КъыскIэлъыкIуащ!» - егупсысащ Уэхъутэр, къыщIыкIэлъыкIуэн къуаншагъэ къуэмылъ пэтми. Абы щыгъуэм къуаншагъэ гуэр умылэжьами, икIэщIыпIэкIэ хъыбарыншэу уагъэкIуэдыныр зыхуэIуа щыIэтэкъым. Нэрыбгищыр уи къуаншагъэм арэзы техъуамэ, уи гъащIэр бухат… ЕджапIэ бжэIупэм Iут машинэм кърагъэтIысхьэри, Черкесск къалэм нашэс. Къалэм нэсыхукIэ машинэм исам ящыщу зы цIыхум псалъэ къыжьэдэкIакъым, Анзор здашэм, щIашэм хуэгъэзауэ. «Iэщэ зезыхьэщ абы къикIыр, дэ апхуэдэ дыхуейкъым», - жеIэ абы. КъыкIэлъыкIуэу, Уэхъутэм упщIэ зыбжанэ кърат. Анзори абыхэм жэуап тэрэз яритыжыфкъым, иджыри нэгъэсауэ зыхэхуар къыгурыIуэркъыми. Хуэм-хуэмурэ, Iуэхур зытетым щыгъуэза, адыгэ газетым и редактору ягъэувыну къызэрыхуагъэфащэр къызыгурыIуа Анзор, япэщIыкIэ ауи идэркъым а IэнатIэм пэрыхьэну. Абы и щхьэусыгъуэуи жеIэ газет Iуэхум зыри зэрыхимыщIыкIыр, редакцэм и лэжьыгъэм, редакторым и пщэрылъым зэрыщымыгъуазэр. Ауэ партым и обкомым хэтхэм къабгъэдэкIыу Уэхъутэм зэхихыр зы псалъэщ: «ДыбдэIэпыкъунущ!». Мис апхуэдэу, 1938 гъэм и бжьыхьэ мазэм егъэджакIуэ IэщIагъэм къыпэраша Уэхъутэ Анзор адыгэ газетым и редактор ящI. Ар хохуэ езым ипэкIэ редактору тета Мэшыкъуэ Хьэжумар къызэригъэпэща гупым, езыми лэжьыгъэм къыхешэ нэгъуэщI журналистхэр.
Поделиться:
Читать также:
27.04.2024 - 16:12 →
ЩIыуэпсым хэт пэлъэщыфар?!
27.04.2024 - 14:59 →
Лъагъуныгъэмрэ зэгурыIуэмрэ я къарур
27.04.2024 - 14:07 →
Шы гъэхъуным теухуа хабзэщIэ
27.04.2024 - 12:26 →
Бжэ зэIухахэм я махуэ
27.04.2024 - 12:18 →
Гугъуехьыр пщIэншэ хъуакъым
|