Хьэпшыпхэр хуашащ

КъБР-м узыншагъэр хъумэ­нымкIэ и министр Къалэбатэ Рустам я пашэу респуб­ликэм и дохутыр гуп иджыблагъэ щы­Iащ Херсон областым и медицинэ IуэхущIапIэ зыбжанэм. Iэ­щIагъэлIхэм зрагъэлъэ­гъуащ­ Краснэ, Лазурнэ, Новониколаевкэ къуа­жэ­хэм дэт амбулаторэхэмрэ Владимировкэ жылэм дэт ФАП-мрэ. Апхуэдэу ахэр щыIащ Скадовск дэт ­район сымаджэщым, абы мы гъэм и гъатхэпэ мазэ лъандэрэ ди щIы­налъэм щыщ анестезиолог-реаниматолог гуп щолажьэ.

Гулъытэ нэхъыбэ хуащIащ Михайловкэ къуажэм ди республикэм щригъэухуа ам­булаторэм. Скадовск муниципальнэ щIыналъэм и унафэщI Дудкэ Александр и гъусэу тепсэлъыхьахэщ абы щып­сэу­хэм япэ ме­дико-санитар дэIэпыкъуныгъэхэр зэрыратым, я узын­шагъэр къэпщытэнымкIэ ирагъэкIуэкI Iуэхухэм. Къалэбатэ Рустам къы­хигъэщащ IэнатIэр зэпэщу зэтеувэ­жы­нымкIэ ди республикэр сыт и лъэны­къуэкIи дэIэпыкъуэгъу зэрыхъунур, зыхуэныкъуэ Iэ­щIа­гъэлIхэр зэрыхуагъэкIуэнур.
Республикэм икIа гупым Херсон областым и медицинэ IуэхущIапIэхэр зыхуэныкъуэ хьэп­шыпхэр хуашащ: хущхъуэхэр, медицинэ хьэпшып зэхуэмы­дэхэр, ерыскъыхэр, зэфэн псы. 
Фигу къэдгъэкIыжынщи, Къэ­бэрдей-Балъкъэрыр илъэсрэ ныкъуэрэ хъуауэ дэIэпы­къуэгъу яхуохъу Херсон областым щыщу и нэIэ щIэт щIыналъэхэм узыншагъэр хъу­мэ­нымкIэ и IэнатIэхэм, ахэр зыхуэныкъуэ медицинэ IэщIагъэлI зэхуэмыдэхэр яхуигъа­кIуэу­рэ.