Гъуэгухэр адэкIи ирагъэфIакIуэ

Дунейм хуабэ кIапэ зэригъуэтрэ «ГъуэгуфI шынагъуэншэхэр» лъэпкъ пэхуэщIэм епха Iуэхугъуэхэм ди щIыналъэм жыджэру къыщыпащащ. БлэкIа илъэсым къриубыдэу Къэбэрдей-Балъкъэрым щIыпIэ-щIыпIэкIэрэ жылагъуэ-экономикэ мыхьэнэ зиIэ гъуэгухэр щызэрагъэпэщыж, къагъэщIэрэщIэж, тралъхьэ, нэхъ кIыхьу яукъуэдий. ЩIыналъэм щекIуэкI лэжьыгъэшхуэм гу лъымытапIэ иIэкъым – зыхыумыщIэнкIэ Iэмал имыIэу гъуэгухэм я фIагъым хэхъуащ, иджыри къыздэсым цIыхум гъуэгум зэран къыщыхуэхъу щыщIэныгъэ куэди зэрагъэзэхуащ. ПэхуэщIэм епха лэжьыгъэм 2024 гъэми къыпащащ. Апхуэдэу нэгъабэ кърагъэжьауэ мыгъэми пащэ Шордакъ къуажэмрэ Дзэлыкъуэшхуэ псымрэ зэпызыщ Iэ гъуэгум и зэгъэпэщыжыныр.

Шордакъ къуажэм Школьнэ фIэщыгъэр зиIэ и уэрам нэхъыщхьэм ирикIуэ гъуэгуращ ухуакIуэхэм зэрагъэпэщыжыр. ЦIыху 1700-м щIигъу зыщыпсэу жылэм деж а гъуэгум мыхьэнэшхуэ иIэщ, икIи абы и зэгъэпэщыжыным къуажэм и псэукIэр зэрыригъэфIэкIуэнум пцIы хэлъкъым. Километррэ метр щиблрэ зи кIыхьагъ гъуэгум сабий гъэсапIэр, курыт еджапIэр, сымаджэщыр, мэжджытыр тетщ. ЦIыхухэм я зэхэзекIуапIэу, машинэхэри уэру зэрыщызэхэзежэр къэплъытэмэ, абы тетхэм я шынагъэншагъэр къызэзыгъэпэщ IэнатIи мэхъу екIуэкI лэжьыгъэр.
Мы далэм гъуэгум телъ асфальт къилъэлъар трахащ, тIуащIэу зэтелъын хуей асфальтобетоным къатыщIэр тралъхьащ. Иджыпсту зиужь итыр асфальтобетоным и къатыщхьэр телъхьэнырщ, ар зызрагъэукъуэдия гъуэгубгъуэм ирагъэубыдынырщ. Гъуэгуухуэхэм зэрыжаIэмкIэ, къуажэ гъуэгум дяпэкIэ зэпрыкIыпIэхэмрэ зэблэкIыпIэхэмрэ яхуэфащэ нагъыщэхэмкIэ къыхагъэщынущ, гъуазэхэр гъуэгущхьэхэм трагъэувэнущ, уэздыгэ пкъохэр хатIэнущ.
Абы къищынэмыщIауэ, Шордакъ къуажэм къыдэкI гъуэгум зэпиупщI, Дзэлыкъуэшхуэ псыежэхэм телъ лъэмыжри зэрагъэпэщыжыну я гугъэщ. Жьы хъуа лъэмыжым и лъабжьэр щIэрыщIэу ягъэжыным, ибгъухэр гъуэгущхьэIухэм къыхагъэхьэжыным епха унафэхэр къащтащ, лъэмыжым и лъэгур зытрагъэжыхьыну щIыпIэхэм и куууагъыр къалъытащ, лъэмыж бгыкъухэмрэ щхьэIумрэ здыхагъэувэнур ягъэнэхуащ. Лъэмыжым и пкъыр псыхъуэ нэпкъхэм хагъэжыхьа нэужь, лъэныкъуитIымкIэ къекIуалIэ гъуэгухэм хыхьэжу асфальтобетон тралъхьэну я гугъэщ.
Лъэпкъ пэхуэщIэм ипкъ иткIэ кърахьэжьа Iуэхум псори гъэмахуэм зэфIагъэкIыну я гугъэщ. Мызыгъуэгум гъуэгум иращIылIэ хуэIухуэщIэ псори ягъэнэхуа пIалъэм тету йокIуэкI, ухуэныгъэ технологием къигъэув мардэхэр зыри къэмынэу нэсу ягъэзащIэ.