IэнатIэр къепщытэ

КъБР-м узыншагъэр хъу­мэнымкIэ и министр Къалэбатэ Рустам лэжьыгъэ IуэхукIэ щыIащ Республикэ клиникэ сымаджэщым. Абы зригъэ­лъэгъуащ зэрагъэпэщыжа, щIэуэ къызэIуаха къудамэ­щIэхэр. Апхуэдэуи зыщигъэ­гъуэзащ сымаджэхэм псын­щIэу дэIэпыкъуэгъу щахуэхъу къудамэщIэм и ухуэныгъэхэр зэрекIуэкIым.

Республикэ клиникэ сы­маджэщым къыщызэIуахащ ­ЭндокринологиемкIэ щIыналъэ центр. Эндокринологие IэнатIэмкIэ мыр республикэм щы­лажьэ центр етIуанэщ, япэр ­Къалэ клиникэ сымаджэщ №1-м хэтщ. Центрхэм я лэжьыгъэр хуэунэтIащ фошыгъуузым, щитовиднэ железам, лы лей зытелъхьэным епха нэгъуэщI ­эндокриннэ узыфэхэр зыпкърыт сымаджэхэм зыхуэныкъуэ медицинэ дэIэпыкъуныгъэр егъэгъуэтыным. IуэхущIапIэр къы­зэра­гъэпэщащ «Узыншагъэр ­хъумэн» лъэпкъ проектым хыхьэ «Фошыгъуузым пэщIэтын» щIыналъэ программэм ипкъ иткIэ икIи и къалэн нэхъыщхьэри ап­хуэдэ сымаджэхэм хуащIэ Iуэху­тхьэбзэхэм я фIагъым хэгъэ­хъуэнырщ.
Къалэбатэ Рустам къип­щы­тащ иджыблагъэ зэгъэ­пэщы­жыныгъэхэр щрагъэкIуэкIа неврологие къудамэмрэ апхуэдэ­-уи иджырей технологиехэр и ­лъабжьэу сымаджэхэм дэIэпыкъуныгъэхэр щыхуащIэ хирургиемрэ я лэжьыгъэр зэрызэтеублам икIи абы щIэлъ сымаджэхэми я Iуэху зыIутыр зригъэщIащ.
Сымаджэхэм псынщIэу дэIэ­пыкъуэгъу щахуэхъу къудамэ­щIэм и ухуэныгъэхэр здынэсари зригъэлъэгъуащ министрым. УхуакIуэхэм унэм и япэ къатыр дращIеящ. Псори зэхэту абы иубыдынущ метр зэбгъузэнатIэу мин 1,2-рэ. Ар сымаджэхэми ­медицинэ лэжьакIуэхэми я тын­шыпIэм хуэщIауэ щытынущ. Абы хэтынущ операцэ щащI, реа­нимацэ пэшхэр, къищынэ­мы­щIауэ, лъэрытет сымаджэхэмрэ зи щытыкIэр нэхъ хьэлъэхэмрэ щаIыгъ щIыпIэхэр зэщхьэщы­хауэ щытынущ. Къудамэм иIэнущ иджырей IэмэпсымэхэмкIэ къызэгъэпэща диагностикэ пэш, КТ, УЗИ аппарат лъэщхэр щIэту. Сымаджэхэр мыбдеж щаIыгъынущ махуищым нэблагъэкIэ - и щытыкIэр зыхуэдэр зэхагъэкIыу адэкIэ къыщеIэзэну къудамэм ягъэкIуэхукIэ. Абы Iэмал къаритынущ хирургие и лъэныкъуэкIэ лэжьыгъэр зэтеублауэ екIуэкIы­нымкIэ, сымаджэщым и зэфIэкI псори нэсу къагъэсэбэпынымкIэ. IуэхущIапIэщIэр сымаджэ­щым и хирургие нэхъыщхьэр зыхэт корпуситIым щхьэ зытелъ зэпрыкIэпIэкIэ пыщIауэ щытынущ, абы ипкъ иткIи сымаджэ хьэлъэхэр здагъэкIуэну къудамэхэм нэхъ тыншу яшэнущ. Апхуэдэ Iуэху бгъэдыхьэкIэхэм я фIыгъэкIэ пIэщIэгъуэкIэ медицинэ дэIэпыкъуныгъэ хуэны­къуэхэм нэхъ псынщIэу Iуэхутхьэбзэхэр хуащIэфынущ.