Зыхуагъэувыжа пIалъэхэм намыгъэсу

Дызэрыт илъэсым къриубыдэу Къэбэрдей-Балъкъэрым и щIыналъэхэм псори зэхэту километр 84-рэ зи кIыхьагъ автомобиль гъуэгухэр щыIэ мардэм кърагъэтIэсыжынущ. Лэжьыгъэхэр ирагъэкIуэкIынущ «ГъащIэм папщIэ инфраструктурэ» лъэпкъ пэхуэщIэм ипкъ иткIэ икIи абыхэм трагъэкIуэдэну мылъкур щIыналъэм и гъуэгу фондым къыхэкIынущ.

Гъуэгум елэжьхэм гупсысэ зыхэлъу яубзыхуа лэжьыгъэхэмрэ абыхэм пэрагъыхьэну IуэхущIапIэхэр къызэрыхах зэхьэзэзэхуэр и чэзум зэрырагъэкIуэкIамрэ я фIыгъэкIэ ухуакIуэхэм Iэмал ягъуэтащ къапэщылъ IэнатIэм нэхъапэIуэкIэ зыхуагъэхьэзырыну. Абыхэм хохьэ лэжьыгъэшхуэхэр иджыпсту щрагъэкIуэкI Шэджэм ЕтIуанэмрэ Булунгу къуажэмрэ зэпызыщIэ, псори зэхэту километр 25-рэ и кIыхьагъ автомобиль гъуэгумрэ абы щхьэпрыдза лъэмыжибгъумрэ.

Апхуэдэуи къызыхуэтыншэу къызэрагъэпэщыж Май къалэмрэ Урожайнэ къуажэмрэ зэпызыщIэ автомобиль гъуэгум хуэзэу Тэрч псым телъ, метри 162-рэ зи кIыхьагъ лъэмыжри.

Дызэрыт илъэсым и гъатхэпэ мазэм гъуэгу лэжьыгъэхэм щрагъэжьащ республикэм и щIыналъэхэм я нэгъуэщI щIыпIи 7-ми. Абыхэм дамыгъэхэмрэ хъыбар уэзыгъащIэ пхъэбгъухэмрэ пIалъэкIэ щагъэуващ, жыгыжьхэр, къуацэжьхэр къыщраупщIыкI, щаухъуэнщI. Псалъэм къыдэкIуэу, апхуэдэ Iуэхугъуэхэр щрагъэкIуэкI Малкэ, Шытхьэлэ, Александровскэ, Ташлы-Тала къуажэхэм, Прохладнэ къалэм, Зэрэгъыжрэ Псыгуэнсурэ зэпызыщIэ автомобиль гъуэгум, Дей, Курп Ищхъэрэ къуажэхэм я гъуэгур, Осетие Ищхъэрэ – Аланием и гъунапкъэм нэсыху.

Абыхэм нэмыщI Тэрч щIыналъэм и Дей къуажэм ЩауэцIыкIум и цIэр зезыхьэ и уэрамыр къызыхуэтыншэу къызэрагъэпэщыж. Мыбдежым гъуэгужьым и щхьэфэр щытратхъунщIыкIри абы и лъабжьэр ягъэбыдащ, зэ ирикIуэгъуэу асфальтыщIэ тралъхьащ, мывэхэмкIэ кърагъэтIылъэкIащ, пкъохэр щагъэуващ.

Налшык къалэми КIыщокъуэм, Головком, Нэгумэм, Щорсым я цIэкIэ щыIэ уэрамхэм, Кэнжэ и Каменскэ уэрамым гъуэгу лэжьыгъэхэм щоужьэрэкI: инженер коммуникацэхэр щызэрахъуэкI, асфальтыжьыр щытратхъунщIыкI.

Нэгъабэ хуэдэуи мы гъэм зыхуагъэувыжа къалэнхэр щагъэзэщIэну пIалъэхэм намыгъэсу гъуэгу лэжьыгъэхэр дызэрыт илъэсым икIэхэм ирихьэлIэу зэфIагъэкIын мурад щыIэщ, иужькIэ абыхэм ягъуэтыну фIагъым зэран яхуэмыхъуу.