ЩIалэщIэм и мурадхэр

Унагъуэм илъ зэхущытыкIэр къащIэхъуэ сабийм щапхъэ зэ­рыхуэхъум шэч хэлъкъым. Абы гъэсэныгъэ тэмэм игъуэтын папщIэ лэжьыгъэшхуэ я пщэм къыдохуэ адэ-анэм. ЩыцIы­кIум къыщегъэжьауэ хабзэм, нэмысым, гущIэгъум, гулъытэм хуаущиймэ, гъуэгу захуэ техьэну ущыгугъ хъунущ. 
Апхуэдэщ зи гугъу фхуэс­щIыну щIалэр. Ар 2003 гъэм республикэм и къалащхьэм къы­щалъхуа, 2021 гъэм Налшык дэт лицей №2-р аттестат плъыжькIэ къэзыуха, мы зэманым Бэ­рбэч Хьэ­тIутIэ и цIэр зезыхьэ КъБКъУ-м СтоматологиемкIэ и институ­тым и етхуанэ курсым щеджэ Еристау Имирланщ. 
Еристаур мы гъэм и гъатхэ ­лъандэрэ КъБР-м и Парламентым дэлажьэ ЩIалэгъуалэ па­латэм узыншагъэр хъумэнымкIэ, щIы­уэп­сымрэ туризмэмкIэ и комиссэм и унафэщIщ. Мэкъуауэ­гъуэм къы­щегъэжьауэ, ар хэтщ Къэбэрдей-Балъкъэрым и Iэтащхьэм щIалэ­гъуалэ IуэхухэмкIэ дэлажьэ гупми Налшык къалэ ­округым и адми­нистрацэм деж щыIэ щIалэгъуалэ советми.
Имирлан зэхыхьэ щхьэпэхэр къызэрегъэпэщ, а Iуэхухэм хуэ­жы­джэру. Хэку зауэшхуэм Те­кIуэ­ныгъэр къызэрыщытхьрэ илъэс 80 зэрырикъум и щIыхькIэ Iуэхугъуэ зыбжанэ иригъэкIуэкIащ абы, ­Хэкум нэхъ лъапIэ зэры­щы­мыIэм тригъащIэу. Узыншагъэр хъума зэрыхъуным теухуауи зэIущIэ щхьэпэхэр къызэригъэпэщащ. Псалъэм папщIэ, респуб­ликэм ЩIалэгъуалэ IуэхухэмкIэ и министерствэр и дэIэпыкъуэ­гъуу Еристаур ныбжьыщIэхэм къа­хуеджащ «ЦIыхум и дзэхэр узын­шэу къызэтригъэнэн папщIэ ищIапхъэхэр» дерсым. ­Имирлан абы ещхь Iуэхугъуэ дяпэкIи иригъэкIуэкIыну и мурадщ, комис­сэм къыхуигъэлъагъуэ махуэхэм техуэу. 
НыбжькIэ щIалэми, зэфIэкI иIэу дунейм тетыну узыщызы­гъэгугъщ Имирлан. Иджыблагъэ абы депсэлъащи, къыджиIам фыщыдогъэ­гъуазэ.

- Дзэ дохутырым ухуеджэныр сытым къыхэпха, Имирлан? 
- ЕтIуанэ классым сызэрыщIэс лъандэрэ си гуращэт дохутыр IэщIагъэм сыхуеджэну. Хирург IэщIагъэрт нэхъ зытезгъащIэр, ауэ, сыкъыдэкIуэтея нэужь, сегуп­сы­сыж­ри, дзэ дохутыр Iэ­щIагъэр къы­хэсхмэ нэхъыфIу къэслъытэжащ. А мурадыр ­къыздаIыгъащ сыкъы­зыхэкIа уна­гъуэм ис нэхъыжьхэми. КъезгъэзэкIыжынщи, дохутыру се­джэну щIытезубыдар си адэ­шхуэр кIыхьу сымэджати арат. Си анэм ар зэрихьащ, гугъу дехьу. «Паркинсон узыфэ» жыхуаIэрат къеузри зэ­ры­щхьэщыпхын Iэмал щыIэтэкъым. Иджы дыдэ къэIуащ еджагъэш­хуэхэм а уз бзаджэм хущ­хъуэгъуэ къыхуагъуэтауэ. АтIэ, адэшхуэм ­телъ бэлыхьыр махуэ къэс слъа­гъурт. Узым игъэхыщIэ абы и нэгум сыщиплъэкIэ, си гущIэм зыкъи­гъазэрт. Дадэ лIэну сыхуейкъым, жысIэу сыгъыу сыщыщысаи куэдрэ къэ­хъуащ. «Дадэ, сэ укъызогъэ­гугъэ фIы дыдэу седжэну, школыр дыщэ медалкIэ къэзухыу доху­тыр Iэзэ сыхъуну, цIыхухэм са­дэIэ­пы­къуну, уи узыр пщхьэ­щы­зыхын ­хущхъуэ къэзгупсысы­ну», - жесIауэ щытат си адэшхуэм. Си анэм и адэр къызэрызгъэгугъам сытету сыкъэгъуэгурыкIуэну сы­хуейщ сыпсэухукIэ. Адэшхуэм ифIэфIт IэщIагъэ, щIэныгъэ ­зыбгъэдэлъхэр. Еджэныр зыхилъхьэ щыIэтэкъым. Мис арауэ жыпIэ хъунущ щхьэусыгъуэ хуэ­хъуар дохутыр IэщIагъэр къыхэс­хыным. 
- Сыт хуэдэ лъагапIэ сынэсащэрэт жыпIэрэ? 
- ГъащIэ щыхъукIэ, лъэпощхьэпо куэдым ухуозэ. Ди япэ итхэм я чэнджэщ уедаIуэмэ, ущыуэнукъым. «УзэупщIын умыгъуэтмэ, уи пыIэр щхьэрыхи ечэнджэщ», жаIэртэкъэ?! Ди нэхъыжьыфIу фIыщIэ иныр зыхуэфащэхэм къытхуагъэ­-на псалъэ Iущхэр псэм и зы Iыхьэщ, ахэр сытым щыгъуи си гум илъу сыкъокIуэкI. СызэрыцIыкIурэ быдэу мурад сщIащ цIыхухэм садэIэпы­къуну, зы мащIэкIэ нэхъ мыхъуми я гум сехуэбылIэну. Дзэ дохутыр Iуэхум куэд щIауэ ирилажьэхэр, фIыуэ хэзыщIыкIхэр къезгъэб­ла­гъэурэ дерс ярызогъэт а IэщIагъэм хуеджэ щIалэгъуалэм. 
2024 гъэм Iуэхур езгъэжьащ, икIи мыхьэнэ иIэу къызолъытэ. 
Иджыблагъэ «Эристави» зы­фIэс­ща IуэхущIапIэ дзэм зэрелэжьыну щIыкIэм щыхуагъасэ центр къы­зэIусхащ. А цIэр абы щIыфIэсщар сыкъызыхэкIа лIакъуэм и щIыхь­кIэщ. Си мурадхэм ящыщ зыуэ ари къызэхъулIащи, адэкIэ си гугъэщ нэхъ Iуэху­шхуэхэми зеспщытыну. Зыгуэр пщIэну уи гум иплъхьамэ, уеу­жьэ­рэкIын хуейщ. ГъащIэр бжьизщ зэрыхъур. Машинэ къызжьэхэуэри фэбжьышхуэ згъуэ­тауэ щытати, абы щыгъуэ къызгурыIуащ нобэ пхуэщIэнур зэбгъэ­тIылъэкI зэрымыхъунур. 
- Упсэу, Имирлан, апхуэдэ Iуэху щхьэпэхэр зэрыблэжьым папщIэ. Тхьэм уригъэфIакIуэ!