Спорт хъыбархэр

ЕджапIэхэм я мардэхэр

Спортым и лъагапIэ нэхъ ин дыдэхэр къахуэщтэну, Олимп джэгухэм хэтыфыну зэчийхэр зыбгъэдэлъ сабийхэр щагъэхьэзыр еджапIэу 14 Къэбэрдей-Балъкъэрым иIэщ мы зэманым. Ахэр щыIэщ Налшык, Бахъсэн, Прохладнэ къалэхэмрэ Лэскэн, Тэрч, Iуащхьэмахуэ щIыналъэхэмрэ.
Республикэм и апхуэдэ еджапIэхэм къызэщIаубыдэ спорт лIэужьыгъуэу 22-рэ, сабийуэ абыхэм зыщызыгъасэхэм я бжыгъэр мин 11-м щIегъу, щIэныгъэ куу зыбгъэдэлъ тренеру 376-рэ абыхэм ядолажьэ.
ЕджапIэхэм я къалэн нэхъыщхьэр Олимп джэгухэмрэ дунейпсо чемпионатхэмрэ екIуу хэтыфын спортсмен лъэщхэр Къэбэрдей-Балъкъэрымрэ Урысей Федерацэмрэ я командэ къыхэхахэм папщIэ гъэхьэзырынырщ.

Спортым дегъэхьэхыным хуэунэтIауэ

Шэджэм щIыналъэм и спорт инфраструктурэр егъэфIэкIуэным хуэунэтIа лэжьыгъэхэр абы и жылэхэмрэ къалэмрэ зэпымыууэ щрагъэкIуэкI. Ахэр псори хуэунэтIащ къытщIэхъуэ щIэблэр спортым дегъэхьэхынымрэ гъащIэ узыншэм ахэр хуэущиинымрэ.
 Псалъэм къыдэкIуэу, «Къуажэхэм сыт и лъэныкъуэкIи зегъэужьын» къэрал программэм ипкъ иткIэ Щхьэлыкъуэ жылэм нэгъабэ къыщызэIуахащ спорт лIэужьыгъуэ куэдкIэ зэхьэзэхуэхэр щебгъэкIуэкI, абыхэм защыхуэбгъасэ хъун спорт комплексрэ стадионрэ. Нобэ абы щыIэ секцэхэм зрагъэтхащ сабий 500-м нэблагъэм, я ныбжькIэ илъэси 7-м къыщыщIэдзауэ нэхъыжьхэри яхэту. 
Апхуэдэуи, «Бизнес-спринт («Сэ спортыр къыхыхох!») къэрал пэхуэщIэм ипкъ иткIэ Хъущтэ-Сырт къуажэм спорт утыку «губзыгъэ» жыхуаIэм хуэдэ къыщызэIуахащ. Абы хэтщ щIыбым зыщыбгъэсэным хуэщIа спорт комплекс, джэгупIэхэр, къэжыхьыпIэхэр, нэгъуэщIхэри. Къуажэм футболымкIэ и секцэм сабий 30-м щIигъум нобэ зыщрагъэтхащ.
Шэджэм къалэм и курыт еджапIэ №3-м спорт бэнэкIэ лIэужьыгъуэхэм дихьэххэм папщIэ нэгъабэ пэшышхуэ къыщызэIуахащ икIи спортсмен ныбжьыщIи 150-м щIигъум абы зыщагъасэ. 

ГТО-м зыщыхуагъэхьэзыр щIыпIэхэр

2020 гъэм щегъэжьауэ Къэбэрдей-Балъкъэрым и цIыху мин 40-м щIигъу хэтащ «Лэжьыгъэмрэ зыхъумэжыныгъэмрэ сахуэхьэзырщ» (ГТО) спорт Iуэхугъуэм икIи абы къигъэув мардэхэр зэрагъэзэщIам щыхьэт техъуэ бгъэхэIу дамыгъэхэр цIыху мин 20-м иратащ. 
ГТО-м и мардэхэр гъэзэщIэным зыщыхуагъэхьэзыр, «алэрыбгъу IэрыщIхэр» зэрылъ, иджырей спорт тренажерхэр зэрыт утыку зэпэщхэр иужьрей илъэсхэм къыщызэIуахащ Къулъкъужын Ипщэ, Аргудан, Бабугент, Котляревскэ, Дыгулыбгъуей, Хьэбэз, Зеикъуэ, Терскол къуажэхэмрэ Тэрч къалэмрэ. 
Фигу къэдгъэкIыжынщи, ГТО-м и мардэхэр цIыхухэм щагъэзащIэ щIыпIэу республикэм и щIыналъэ къэс зырыз щыIэщ, Налшык къалэри яхэту.