Нобэ, жэпуэгъуэм и 16-р, ЩIакхъуэм (хьэлыгъум) и дунейпсо махуэщ (World Bread Day). Ар щагъэлъапIэ ЩIы Хъурейм тет къэралхэм я нэхъыбапIэм.
Зи гугъу тщIы Iуэхугъуэм гулъытэ хэха хуэщIынымкIэ япэ дыдэу жэрдэм къыщыхалъхьауэ щытар ЩIакхъуэгъажьэхэмрэ IэфIыкIэ зыщIхэмрэ я къэрал зэхуаку зэгухьэныгъэм 2006 гъэм иригъэкIуэкIа зэхыхьэрщ. Ар жэпуэгъуэм и I6-м щIытрагъэхуар, 1945 гъэм а махуэ дыдэм ООН-м деж ЕрыскъыхэкIхэмрэ мэкъумэш хозяйствэмкIэ гуп щхьэхуэ къыщызэрагъэпэщауэ зэрыщытарщ.
Археологхэр щыхьэт зэрытехъуэмкIэ, ди планетэм щIакхъуэхэкIхэр япэ дыдэу ягъэжьэн зэрыщыщIадзэрэ илъэс мин 15-м щIигъу дэкIащ. А Iуэхум щыхьэт техъуэ лъэужь зыбжанэ Курыт Азием къыщагъуэтыжащ. Тхыдэтххэм зэрыжаIэмкIэ, а щIыпIэм деж щыпсэуахэм гуэдзыр зы мащIэ гуэркIэ щагъэщIытэрти, зэхэпща хъуа хукхъуэр мафIэкIэ зэщIагъэплъа мывэ пIащIэхэм тралъхьэрт...
Дызэрыщыгъуазэщи, мы шхыныгъуэр дэнэ щIыпIэкIи, унагъуэ щхьэхуэхэм я деж къыщыщIэдзауэ шхапIэ лъэрызехьэхэм я деж щиухыжу, зыпащI щымыIэм хуэдэу, щагъэхьэзыр, щызэрахьэ, махуэм къриубыдэу зыбжанэрэ щызыIуагъахуэ, сытми дашх. АтIэми, ар Iэнэм къытехутэн ипэ, гъуэгуанэ ин къызэпызыч ерыскъыгъуэщ. Арагъэнущ, абы пщIэшхуэ щIыщIыхуащIыр. Апхуэдэу, ЩIакхъуэм (хьэлыгъум) и дунейпсо махуэм къэрал куэдым зи гугъу тщIы шхыныгъуэм ехьэлIа Iуэхугъуэхэр щрагъэкIуэкI: къызыхащIыкIа, къыщежьа я лъэныкъуэкIэ яфIэтелъыджэу кърахьэлIахэм я жармыкIэхэр къыщызэIуах, я гъэхьэзырыкIэм щыгъуазэ зыщыхуащI зэхыхьэхэр къыщызэрагъэпэщ, щIакхъуэгъажьэхэр щызэрощIэ...
