Шынагъуэншагъэр къызэгъэпэщыным теухуауэ

КъБР-м Iэтащхьэ КIуэкIуэ Казбек видеоконференц жыпхъэм иту хэтащ УФ-м и Президентым и полномочнэ лIыкIуэу Кавказ Ищхъэрэ федеральнэ щIыналъэм щыIэ Чайкэ Юрий и нэIэм щIэту екIуэкIа, шына­гъуэншагъэр къызэгъэ­пэщы­ным, коррупцэм пэ­щIэ­ты­ным, хабзэр хъумэным теухуауэ ЗэзыгъэуIу зэхуэсым и зэ­хы­хьэм. ЗэIущIэм хэтащ УФ-м цIыхубэм щIэныгъэ егъэгъуэ­ты­нымкIэ и министрым и къуэ­дзэ Корнеев Андрей, Террорым пэщIэтынымкIэ лъэпкъ комитетым и аппаратым и унафэщIым и къуэдзэ Новиков Андрей, ­КИФЩI-м и щIыналъэхэм я Iэтащ­хьэхэр.

Абы щытепсэлъыхьащ щIыналъэм и егъэджэныгъэ IуэхущIапIэхэр террорым щыхъумэнымкIэ ирагъэкIуэкIхэр щIэгъэхуэбжьэным и лъэныкъуэкIэ щыIэ хэкIыпIэ нэхъыщхьэхэм, Iэпхъуэшапхъуэ IэнатIэм хабзэр къы­щы­зэпемыгъэудынымкIэ хабзэ­хъумэ органхэм я лэжьыгъэм ­кърикIуахэм.
ЗэIущIэм зэрыщыжаIамкIэ, тер­рор щIэпхъаджагъэ ялэжьыну шынагъуэ щыщыIэм и деж егъэджэныгъэ IуэхущIапIэхэм я егъэджакIуэхэмрэ щеджэхэмрэ ящIэнухэм хуэгъэхьэзырыным, а IэнатIэхэм я техникэ къызэгъэпэщыныгъэр егъэфIэкIуэным теухуауэ щIыналъэхэм щыIэ власт­хэмрэ хабзэхъумэхэмрэ лэ­жьы­гъэшхуэ ирагъэкIуэкIащ. ­УФ-м и Президент Путин Владимир пщэрылъ зэращищIам ипкъ иткIэ, егъэджэныгъэ объектхэм  я шынагъуэншагъэр къызэгъэ­пэ­щыным адэкIи трагъэкIуэдэну мылъкур федеральнэ бюджетым къызэрыхагъэкIынум теухуа Iуэхум хоплъэ.
ЩIыналъэхэм я Iэтащхьэхэм къалэн щащIащ егъэджэныгъэ объектхэр террорым щыхъу­мэ­ным теухуауэ ирагъэкIуэкI Iуэ­ху­хэр и кIэм нагъэсыну. Псом хуэ­мы­дэу гулъытэ нэхъыбэ хуэ­щIыпхъэщ абы и лъэныкъуэкIэ еджакIуэхэм драгъэкIуэкI лэжьыгъэхэм.
Iэпхъуэшапхъуэ IуэхухэмкIэ IэнатIэм хабзэр къызэрыщызэ­паудым пэщIэтыным ехьэлIауэ Чайкэ Юрий къыхигъэщащ Урысей Федерацэм и законхэм теты­нымкIэ, абы и лъэныкъуэкIэ щIэпхъаджагъэхэр къэмыгъэхъу­ным­кIэ иджыпсту щыIэ щ­ы­ты­кIэм хэкIыпIэ щхьэхуэхэр къы­халъ­хьэ­ну къазэрыхуигъэувыр. «Хабзэ­хъумэ IэнатIэхэм я органхэр а къалэнхэр зэрагъэзэ­щIэ­ным сыт и лъэныкъуэкIи хуэщIауэ къызэгъэпэщащ», - къыхигъэщащ абы.
ЗэIущIэм къыщаIэта Iуэхухэм япкъ иткIэ, УФ-м и Президентым и полномочнэ лIыкIуэу Кавказ Ищхъэрэ федеральнэ щIыналъэм щыIэм пщэрылъ пыухыкIахэр къигъэлъэгъуащ.