Аккизовэ Имарэ и гъэлъэгъуэныгъэщIэ

Къэбэрдей уэрамым тет «Малахитовая шкатулка» арт-хьэщIэщым иджыблагъэ къыщызэIуахащ сурэтыщI Аккизовэ Имарэ и IэдакъэщIэкIхэм я гъэлъэгъуэныгъэ.

Абы щыплъагъунущ Имарэ и гуащэ цIэрыIуэ хъуахэр. Псом хуэмыдэу къызэхуэсахэм ягу ирихьащ лэчкIэ щIа сурэтхэмрэ прикладной гъуазджэмрэ щызэщIыгъу лэжьыгъэхэр. КъызэгъэпэщакIуэхэм зэрыжаIэмкIэ, а лэжьыгъэхэм я нэхъыбэр иджы япэу Налшык щагъэлъагъуэу аращ.

- Мы гъэлъэгъуэныгъэр къанэ щымыIэу зи фIыщIэр Имарэщ, куэд щIауэ сыщIэхъуэпсырт абы и IэдакъэщIэкIхэр зэхуэхьэсауэ утыку къитхьэнуи, иджыщ къыщыдэхъулIар. «Гуащэ къалэ» фIищу сурэтыщIым ди пащхьэ кърихьа гуащэхэр телъыджэщ, си щхьэкIэ срогушхуэ, зэрысхузэфIэкIымкIи сыдэIэпыкъунущ а бзылъхугъэ IэпэIэсэм, - жиIащ КъБР-м и сурэтыщIхэм я унафэщI Къаныкъуэ Жаннэ.

Имарэ и псалъэхэм къыхигъэщащ дапщэщи и зэфIэкI зригъэужьыну, зригъэубгъуну зэрыхущIэкъур, гъуазджэм и унэтIыныгъэ псори зэрыфIэгъэщIэгъуэныр.

- Сэ сызэмыплъа унэтIыныгъэ щыIэу си фIэщ хъуркъым. ЯпэщIыкIэ ятIэ гъэжьам къуэщын къыхэсщIыкIыу щытащ, итIанэ гуащэ щIыным сыдихьэхащ, сурэт щIыным сызэрыцIыкIурэ солIалIэ, - жеIэ Аккизовэм.

Хъыджэбзым жеIэ ар и адэ-анэм (КъБР-м щIыхь зиIэ и сурэтыщI Аккизов Якъубрэ сурэтыщI Iэзэ Сиярэрэ) я IэдакъэщIэкIхэм къащхьэщыкIыу, и лэжьыгъэхэр ищIын папщIэ дапщэщи щIэ гуэрхэм зэрызрипщытыр. Ауэ щыхъукIи, абы и лэжьыгъэхэмкIэ чэнджэщ къезытри, мыхъуа хэтмэ, япэу къыжезыIэри ахэращ.

Имарэ зэрыжиIамкIэ, абы и гуащэхэр нэхъ ипэкIэ Псыхуабэ, Владикавказ, Мейкъуапэ утыку къыщрихьащ.

- Си лэжьыгъэхэр зыфIэгъэщIэгъуэнхэм я деж гъэлъэгъуэныгъэ щызощI. Иджырейр фэ фыслъагъун щхьэкIэщ щIэсщIар, - захуигъэзащ сурэтыщIым къызэхуэсахэм.

ТЭРЧОКЪУЭ Дисэ.
Поделиться: