ЩIым и озон къатыр хъумэным и дунейпсо махуэщ
Секретарым и махуэщ
Къыргъызстаным къэрал шынагъуэншагъэр къызэгъэпэщынымкIэ и IэнатIэм и лэжьакIуэхэм я махуэщ
Мексикэм и щхьэхуитыныгъэм и махуэщ. 1810 гъэм Мексикэр Испанием къызэрыхэкIым теухуа унафэр къащтащ.
Къэзахъстаным Анэм и махуэр щагъэлъапIэ
1380 гъэм урысыдзэхэр Куликовэ щIыпIэм деж Мамай хъаным и зауэлIхэм щатекIуащ.
1918 гъэм Бэракъ Плъыжь орденыр къащтащ.
1931 гъэм Москва Гуащэхэм я къэрал академическэ театр къыщызэIуахащ. Театрым зэрехьэ абы и къызэгъэпэщакIуэ, илъэс куэдкIэ и унафэщIу щыта, СССР-м и цIыхубэ артист Образцов Сергей и цIэр.
1943 гъэм советыдзэхэм Новороссийск къалэр фашистхэм къыIэщIагъэкIыжащ.
1944 гъэм Налшык къыщызэIуахащ республикэм и дохутырхэм я съезд.
1976 гъэм Ереван псы хъумапIэм хэхуа троллейбусым исахэм ящыщу цIыху 20-м щIигъу къригъэлащ псы щIагъым щесынымкIэ дунейпсо чемпион мызэ-мытIэу хъуауэ щыта Карапетян Шаварш.
1745 гъэм къалъхуащ урыс дзэпщ, генерал-фельдмаршал Кутузов Михаил (и унэцIэ дыдэр Голенищев-Кутузовщ).
1931 гъэм къалъхуащ тхыдэ щIэныгъэхэмкIэ доктор, профессор, УФ-м щIэныгъэмкIэ щIыхь зиIэ и лэжьакIуэ, адыгэхэм я къекIуэкIыкIар зыджа, ЩIДАА-м и академик Куценкэ Игорь.
1936 гъэм къалъхуащ урысей актёр, УФ-м и цIыхубэ артист Кокшёнов Михаил.
1942 гъэм къалъхуащ теленэтынхэр езыгъэкIуэкI, УФ-м и цIыхубэ артисткэ Вовк Ангелинэ.
1943 гъэм къалъхуащ абазэ щIэныгъэлI, политик, КъШР-м и ЦIыхубэ Зэхуэсым и депутату щыта Шенкао Мухьэдин.
1945 гъэм къалъхуащ УФ-м и цIыхубэ артист Петросян Евгений.
1947 гъэм къалъхуащ къэрал, политикэ лэжьакIуэ, Совет Союзым и ЛIыхъужь, Урысейм и вице-президенту щыта, экономикэ щIэныгъэхэмкIэ доктор, дзэ щIэныгъэхэмкIэ кандидат, профессор Руцкой Александр.
1951 гъэм къалъхуащ физико-математикэ щIэныгъэхэмкIэ доктор, КъБКъУ-м и профессор Ащхъуэт Олег.
1952 гъэм къалъхуащ США-м щыщ киноактёр цIэрыIуэ Рурк Микки.
1956 гъэм къалъхуащ США-м щыщ иллюзионист, игъэлъагъуэ мэгъу къарумкIэ дуней псом цIэрыIуэ щыхъуа Копперфильд (и унэцIэ дыдэр Коткинщ) Дэвид.
Дунейм и щытыкIэнур
«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Хуабэр махуэм градус 19 – 20, жэщым градус 13 – 14 щыхъунущ.
Лъэпкъ Iущыгъэ:
БжызоIэ, сипхъу, зэхэщIыкI, си нысэ.
