26 сентября, 2022 - 12:44
Иужьрей зэманым цIыхум къахыхьа узыфэ зэрыцIалэмрэ щIыпIэ-щIыпIэкIэ къыщылыб хьэргъэшыргъэхэмрэ мащIэ нэхъей, щIыуэпсри къыдэгуэуащ 2022 гъэм.
Бжьыхьэ кIуам цIыху 50 щиукIа «Листвяжная» шахтэм аргуэру и лэжьакIуибл къызэрызэIыхьам и хъыбар къэIуащ гъатхэпэм и 22-ми. Лэжьыгъэхэр къызэтрагъэувыIэри, абы щIэта лэжьакIуи 142-р къыдрашеижу шахтэр щыщIащыкIым, къахутащ хьэуар зыгъэкъабзэ Iэмэпсымэхэр тэмэму зэрымылажьэм абы и зэран цIыху 12 екIауэ. Псори сымаджэщым щIэхуащ, я насыпуи къелащ.
Абы ипэ къихуэу, Ростов областым щыIэ «Обуховская» шахтэм къыщыщIах фIамыщIыр щагъэгъущ ухуэныгъэмрэ щахъумэмрэ зэпызыщIэ лъэмыжыр къызэтещэщащ. А Iуэхум теухуауэ Ростехнадзорым иригъэкIуэкIа къэпщытэныгъэхэм къызэрагъэлъэгъуамкIэ, ковидыр щхьэусыгъуэ ящIу IуэхущIапIэхэм я лэжьэкIэм хэплъэн зэрыщагъэтыжарщ а насыпыншагъэм щхьэусыгъуэ хуэхъуар – и чэзум къахуэщIакъым лъэмыжыр махэ зэрыхъуамрэ лэжьакIуэхэм я IэщIагъэм тэмэму зэрыхамыщIыкIымрэ.
2022 гъэм щIышылэм и 15-м Перу и тенджыз Iуфэм щракIутат щIыдагъэшхуэ. Ауэ абы цIыхум и зэран хэлъакъым, атIэ а къэралыгъуэм и Iэшэлъашэм къэбэкъауэр къыщикIщ, толъкъун абрагъуэхэм зригъэIэтри, щIыдагъэр къызэрашэкI кхъухьыр къридзэкIыурэ къижауэ арат. Испанием и Persol IуэхущIапIэм и Mare Doricrum кхъухьым IэщIэкIауэ баррель мин I2 псым хэлъэдат абы щыгъуэ. Абы щыщу къызэщIакъуэжыфари и Iыхьэ щанэрщ. Псалъэмакъышхуэ къикIыжат мы Iуэхум: Перум и унафэщIхэм зэрыжаIэмкIэ, Испанием и кхъухьым IэщIэкIа щIыдагъэм и бжыгъэр ибзыщIащ, Испанием гукъанэ ищIащ Перум къэбэкъауэ, псыдзэ зэрыщыIэнур и чэзууэ къызэрамыхутэфам щхьэкIэ. Дауэ мыхъуами, Перум мазищкIэ хуэгъэкъэбзэжауэ аращ псыщхьэ километр зэбгъузэнатIэ мин 18-м трищIа щIыдагъэр. Абы псэущхьэу хэкIуэдамрэ лэжьыгъэншэу къэна бдзэжьеящэхэмрэ я гугъу умыщIыххэ!
ЩIышылэм и иужьрей махуэр гукъинэ ящыхъуащ Таиланд щыпсэухэм. Дайверхэм я зи чэзу щIэгъэмбрууэгъуэм къахутащ псы лъабжьэм щIэлъ бжьамийр зэгуэтхъауэ щIыдагъэ къызэрыдэжыр. ЗэрымыщIэкIэ псым хэлъэдагъэххэт щIыдагъэ баррель 300-м щIигъу. Ар псыщхьэм трищIат километр зэбгъузэнатIэ 42-рэ хъу бжьыгъэшхуэу. Псыщхьэр ягъэкъэбзэжащ кхъухь I2-рэ кхъухьлъатэ зыбжанэкIэ. Абы хэлIыфIыхьат цIыху 350-рэ.
А тхьэмахуэ дыдэм, мазаем и 3-м, Нигерием и псы Iуфэм къыщыуащ щIыдагъэ къыщIэзыш кхъухьыр. Абы хэкIуэда цIыхуи 7-м абыхэм ящыщу 6-м я хьэдащхьэр ягъуэтыжыххакъым. А щIыпIэм апхуэдизкIэ щIыдагъэшхуэ псым щыхэлъэдати, и бжыгъэ дыдэр къахуэхутакъым. Ауэ, зэрыхуагъэфащэмкIэ, баррель мелуани 2 итащ а махуэм къэуа кхъухьым. Абы и щхьэусыгъуэу къалъытари кхъухьым и ныбжьырщ – ар илъэс 46-рэ хъут, увыIэгъуэ имыIэу ягъэлажьэурэ тIорысэ хъуауэ арат. ЩIыдагъэр псыщхьэм телъадэу абдеж къыщыувыIами я насыпт! МафIэс къыкIэлъыкIуащ. Абы насыпыншагъэр щIигъэхуэбжьэнтэкъэ – и зэранышхуэ екIащ псэущхьэхэмрэ къэкIыгъэмрэ.
Гу лъытапхъэщ щIыуэпсым къыщыхъу насыпыншагъэхэр сытым дежи экономикэми зэредэмэпкъауэр. Илъэс 50-кIэ узэIэбэкIыжмэ, Стокгольм щекIуэкIауэ щытащ щIыуэпсыр хъумэным теухуа зэIущIэшхуэ. Абы къыщапсэлъамрэ къыщаIэта Iуэхугъуэхэмрэ зы тхьэкIумэмкIэ ихьэу адреймкIэ къикIыжам хуэдэщ: зыми зихъуэжакъым абы лъандэрэ, нэхъ Iей мыхъуамэ.
