ГушыIэр и щIасэт
Зи ахърэтыр дахэ хъун ТIыхъужь Алий ди лъэпкъым фIы дыдэу илъагъу цIыхухэм, артистхэм ящыщт.
1992 гъэм Алий илъэс 75-рэ зэрырикъум теухуауэ спектакль-бенефис цIыху зыбжанэм ди жэрдэмкIэ дгъэхьэзырауэ щытащ: Шэрджэс Мухьэмэд режиссёру, езы Алий, Къаздэхъу СулътIан, Мэшыкъуэ Феня, Балъкъэр Юрэ, Мысост Вадим сымэ щыджэгуу, Къэжэр Борисрэ сэрэ къызэгъэпэщакIуэхэу, Жэбалыхэ Николайрэ Олегрэ мылъкукIэ зыкъытщIагъакъуэу.
Демократием и жьы хуабэ къыкъуэуам цIыхум «чэф гуакIуэ» къыщрита зэманрати, мурад дахэ цIыкIу гуэри дигухэм щыдгъафIэрт: контракткIэ лажьэ театр къызэдгъэпэщыну. Ноби сохъумэ художник Iэзэ ПщыхьэщIэ Хьэсэн абы щыгъуэ тхуищIауэ щыта афишэ дахэхэр.
Хьэзыр хъунум къэнэжа щымыIэу, къуажэ гуэрми «вагъэсеплъ папщIэу» зэ щыдгъэлъэгъуагъэххэу, спектакль-бенефисыр IэщIыб хъужауэ щытащ, Алий и юбилейр «гушыIэншэу» ягъэлъэпIэн мурад «Унэшхуэм» щаIэу къыщIэкIри…
ГушыIэр зи щIасэу щыта, гушыIэшхуи зыхэлъа ТIыхъужь Алий фэеплъ хурехъу а зи гугъу тщIа спектаклыр.
Псалъэм къыдэкIуэу жытIэнщи, Алий и илъэс 90-м ирихьэлIэу сэ сигу илъащ а теплъэгъуэр хэту тхылъ къыдэзгъэкIыну. «ГуапэхужыIэ тхыгъэхэр» - аращ фIэщыгъэ хуэсщIар а тхылъым. Абы хыхьащ ди щэнхабзэм хэлъхьэныгъэ ин хуэзыщIахэу, хуэщхьэпахэу цIыху 50-м щIигъум ятеухуа тхыгъэхэр. Тхылъыр къыдэкIыным сыт и лъэныкъуэкIи хуэхьэзыру зыкъом лъандэрэ щылъщ.
IутIыж Борис,
тхакIуэ, усакIуэ, драматург.
2007 гъэ.
Гупыр зыгъэгуп
Седжэу Москва сыщыщыIа зэманым цIыхугъэ куэд къысхуэхъуащ. Дуней псом къыщацIыху артистышхуэхэм я джэгукIэр тлъэгъуащ, щэнхабзэм, гъуазджэм я лэжьакIуэ пашэхэм, цIыху цIэрыIуэхэм даIущIащ. Ауэ абыхэм къысхалъхьам нэхърэ нэхъыбэщ ди театрым щылажьэу щыта нэхъыжьхэм къызатар. Ар куэдрэ жызоIэ икIи семышу къытезгъэзэжыфынущ.
Иджы хуабжьу си гуапэ хъуа зы IуэхугъуэкIэ газетеджэхэм садэгуэшэнут. Сэ щезгъаджэ Кавказ Ищхъэрэм гъуазджэхэмкIэ и институтым сыхьэт бжыгъэ къыщыдатащ ди лъэпкъ театрхэр зыухуахэм я хъыбар студентхэм яжетIэну, абыхэм я лэжьыгъэм едгъаджэхэр щыдгъэгъуэзэну. Ди жагъуэ зэрыхъунщи, щыIэкъым ди артист пашэхэм ятеухуа тхыгъэ гъэхуахэр. Газетхэм ятхми, ятхыр фIым я нэхъыфIыжхэм теухуарщ. Шэч хэлъкъым абыхэм къызэралэжьым, ауэ адрейхэри ямыгъусамэ, абыхэм къыдамыIыгъамэ, ди артист пашэхэм я цIэр апхуэдэу Iуну къыщIэкIынтэкъым. Сэ куэдрэ жызоIэ ди лэжьыгъэр гуп зэкъуэтым и гуащIэу зэрыщытыр. Абы къыхэкIыу институтым апхуэдэ сыхьэт бжыгъэ программэм зэрыхагъэхьар згъэщIэгъуащ, хэту пIэрэ зи гукъэкIыр жысIэуи сегупсысащ. Абы хэт и гупсысэ хуэкIуами, хуабжьу сэбэп зыпылъ Iуэхугъуэ утыку кърихьащи, егъэлеяуэ сыщогуфIыкI.
Газетеджэхэми телевизореплъхэми я щхьэр езгъэужэгъункIэ мэхъу къытезгъэзэжурэ зэрыжысIэм: ди артист пашэхэм къалэжьакъэ я цIэ къалэхэм, уэрамхэм, ахэр щеджа школхэм фIащыну?! Сигу къоуэ артистышхуэ зыхужыпIэну ди лъэпкъым иIа цIыху цIэрыIуэхэм я цIэхэр къытщIэхъуэ щIэблэм яIэщIэху хуэдэу зэрыхъуар. Ахэр нобэми къытхэту фIэкIа сэ къызэрызмылъытэфырщ цIыхубэм фIыуэ ялъэгъуа артист нэсхэм я цIэм «мыгъуэ» псалъэр пыту зэи къыщIэзмыгъэсэбэпыфыр. Абыхэм ди гум щIилъыпхъэ, мыхьэнэшхуэ зиIэ лэжьыгъэ къызэранэкIащ.
Алий и гугъу щысщIкIэ, сэ куэдрэ сытопсэлъыхь абы дэзгъэува пьесэхэм, сэ къыздищIа ролхэм. Ауэ зыгуэрым къыщымыхъуну пIэрэ ар «мы Алий сэращ нэхъыбэрэ дэлэжьар, сэращ ролыфI езыгъэщIар» жысIэу? Апхуэдэу къизгъэкIыркъым. Сэ сыкъэмыкIуэж щIыкIи ар Алийт, къыдалъхуа и артистыгъэмкIэ цIыхухэм яцIыхурт. Сысабийуэ театрым кIуэн щыщIэздзахэм щегъэжьауэ, Алий артистышхуэт, пыплъхьэни пыпхыни щымыIэу. Зэгъусэу къэдгъэщIа ролхэм ящыщщ «Мыщэ и къуэ Батыр», «ЩIыщIэ къэIэта», «ТIатIушэрэ СатIурэ» пьесэхэм, нэгъуэщI куэдми абы щигъэзэщIа, нэ фыгъуэ зытрамыгъаплъэм хуэдэщ, зыхужыпIэн образхэр. Абы ролыфI си деж щищIамэ, сэ езгъэщIауэ аракъым, атIэ ар езым и лъэкIыныгъэщ. Режиссёрым сэ фIыщIэ псори бгъэдэслъхьэркъым. АртистыфIыр режиссёр лъыхъуэркъым, езым хузэфIэкI утыкум къыщигъэлъагъуэу аращ. ТIэкIу узэIэбэкIыжмэ, режиссёр Урысейм щыIэу щытакъым. Япэ дыдэ Театр цIыкIум режиссёр щагъэкIуам абы щылажьэ актёр лъэщхэм «зэран къытхуэмыхъумэ, додэ» жаIауэ щытащ. Сэ Алий ролхэр ищIынымкIэ зэи зэран сыхуэхъуакъым. Сыт щхьэкIэ жыпIэмэ, сэ сызэрыхуеймрэ пьесэр зытхар зыхущIэкъуамрэ къыгурыIуэрти, ролхэр езым фIыуэ ищIырт, образхэр гугъэзэгъауэ къигъэлъэгъуэфырт. Апхуэдэ дыдэущ ар зыдэлэжьа режиссёрыфIхэу Ерчэн Леонид, Мыд Хьэжмусэ, Шортэн Аскэрбий сымэ зэрабгъэдэтар.
Ди артистышхуэхэр къыщытхэтым пщIэ гуэри къулыкъущIэхэм къабгъэдэкIыу къалъыса къыщIэкIынщ, ауэ иджы дунейм щехыжакIэ, къытщIэхъуэ щIэблэр абыхэм я зэфIэкIым щIэппIыкIын, абы ирибгъэсэн папщIэ артистышхуэхэм я лэжьыгъэм къанэ щымыIэу хэгъэгъуэзэн хуейуэ къызолъытэ. Аращ институтым а Iуэхугъуэм хухиха сыхьэт бжыгъэм сыщIыщыгуфIыкIари.
Теувэж СулътIан,
Урысей Федерацэм щэнхабзэмкIэ щIыхь зиIэ и лэжьакIуэ.
2007 гъэ.
Сценэр фIыуэ илъагъурт
Щукиным и цIэр зезыхьэ театральнэ училищэр 1975 гъэм къэдухри, ди адыгэ театрым щылэжьэн щIэддзауэ щытащ зы гупым. Мис а зэманращ сэ адыгэ лъэпкъыр зэрыгушхуэ, театр-еплъхэм фIыуэ ялъагъу ТIыхъужь Алий къыщысцIыхуар.
Сэ абы спектакль куэдым сыдыхэтакъым, ауэ ролитI-щы дэсщIар сигу къинэжащ. Мы си тхыгъэ кIэщIми зи гугъу щысщIыну сызыхуейр абы дыщыхэтым къытщыщIа (Алий уи гъусэу дыхьэшхэн гуэр къыпщымыщIу къэнэнутэкъым) Iуэхугъуэ цIыкIухэрщ.
Япэ дыдэ абырэ сэрэ дызыхэ-тар Шолоховым и «ЩIыщIэ къэIэтам» къытращIыкIа спектаклрат. Алий Щукарь дадэм и ролыр гъуэзэджэу зэрищIар театреплъ куэдым ящIэж. Сэ куэдрэ сигу къокIыж: спектаклым и иужьрей Iыхьэм лIыхъужь хэкIуэдахэм деж Алийрэ сэрэ дыщызэхуэзэрти, Алий зылъагъу цIыхухэр мыдыхьэшхыу тхуэмыщIу гугъу дызэрехьар.
ЕтIуанэу сыщыдэлэжьар «ТIатIушэрэ СатIурэ» спектаклырщ. Абы хэт Къаздэхъу СулътIан хамэ къэрал кIуати, сэ абы и пIэкIэ ТIатIушэ и ролыр сагъэгъэзащIэрт. Арати, Алий зэ-тIэу селъэIуащ спектаклым хэмыт къыхимылъхьэну. «Хъунщ», жиIэу быдэу сыкъигъэгугъа щхьэкIэ, утыкум диту жиIэн хуэмей нэгъуэщIхэри къыдыщIигъуу щIидзащ. Утыкум дыкъикIыжа иужь, сыбгъэдыхьэу «сынолъэIуати» щыжысIэм: «Текстыр сщыгъупщэжати, нэгъуэщI хэкIыпIэ сиIэтэкъым», - къызжиIащ.
Ар си гум илъу къуажэ гуэрым дыкIуащ, а спектакль дыдэр тшэри. Жылэ дызыдыхьам и тыкуэным Алий щIохьэри, тыкуэнтет цIыхубзым йолъэIу хьэщIэ зэриIэм къыхэкIыу аркъэ ашык кърищэну. Алий и Iуэхур зэрызэфIигъэкIыу, сэри зы аркъэ абдж къызощтэ, реквизитым хэт бащырыбэм зыми имылъагъуу псым и пIэкIэ ар изогъахъуэри, сценэм дохьэ. Спектаклым и зы Iыхьэм деж сэ Алий псы хуизгъэхъуэн хуейти, сышынапэурэ, псым и пIэкIэ стэканыжь къишиям аркъэ хузокIэ. Алий дэнэ щищIэнт абы итыр - зэуэ егъэщIейри иреф… «О-о-о», жиIэну щыщIидзэм зыкъищIэжри, щытыкIэ зэрыхуам сытым дежи екIуу къикIыу еса артист лъэщым: «Узгъэунэхъун, къигъахъуэ жысIамэ, сегъэтхьэлэ бжесIа?» - жиIэри трилъэфэжауэ щытащ. Сценэм дыкъикIыжащи, сожьэ, сыт щыгъуэу пIэрэ сыщиужьыгунур жызоIэри. АрщхьэкIэ, «нетIрейм щыщ тIэкIу щыIэж?» жиIа фIэкIа къыфIигъэкIатэкъым.
Сыхьэт бжыгъэкIэ, уеблэмэ махуэ бжыгъэкIэ утепсэлъыхьыфынущ ТIыхъужь Алий. Сценэр апхуэдизкIэ фIыуэ илъагъурт, абы фIыуэ хищIыкIырти, зэи пхущыгъэуэнутэкъым. Езым гушыIэшхуэ хэлът, театрыр фIыуэ зылъагъу цIыхухэм ящымыгъупщэу я гум илъщ абы и джэгукIэр. Илъэс куэдкIэ сценэр зыгъэбжьыфIа ТIыхъужьыр нобэми къытхэтщ игъэзэщIа ролхэмкIэ, и гуп хэтыкIэ екIумкIэ.