Иджыблагъэ Налшык щыхьэщIащ «Современник» театр цIэрыIуэм и артистхэр. Къэбэрдей-Балъкъэрыр илъэси 100 зэрырикъум и щIыхькIэ ар къызэригъэпэщащ УФ-м ЩэнхабзэмкIэ и министерствэм. Зэуэ къыхэгъэщыпхъэщ ди щIыналъэм щыпсэу куэд абы зэрыщыгуфIыкIар.
Абыхэм ди деж щагъэлъэгъуащ Шоу Бернард и «Пигмалион» пьесэм къытращIыкIа спектаклыр. Зыгъэувар Волчек Галинэщ.
Спектаклыр ягъэлъэгъуэн ипэ къызэрагъэпэща пресс-конференцым хэтащ Москва къалэ дэт «Современник» театрым и унафэщIым и къуэдзэ Барановэ Татьянэ, Урысейм и цIыхубэ артист Маковецкий Сергей, Урысейм щIыхь зиIэ и артисткэ Бабенкэ Алёнэ, «Современник» театрым и артисткэ Хазовэ Маринэ сымэ.
КъБР-м щэнхабзэмкIэ и министрым и къуэдзэ Карчаевэ Iэминат жиIащ мы Iуэхум театрыр фIыуэ зылъагъухэм я дежкIэ мыхьэнэшхуэ зэриIэр.
ФокIадэм и кIэхэм, Къэбэрдей-Балъкъэрым щэнхабзэмкIэ и махуэхэр Москва щыщекIуэкIам, «Современник» театрым и утыкум ди театрищми спектакль гъэщIэгъуэнхэр щагъэлъэгъуащ. Театреплъхэр гуапэу къапэджэжащ абыхэм. Шэч хэмылъу, фIыгъуэшхуэщ театр цIэрыIуэм и лэжьыгъэ ди унэ дисыжу ди нэгу зэрыщIэкIыр, - жиIащ Карчаевэм.
Барановэ Татьянэ къыщыпсалъэм къыхигъэщащ мы зэIущIэр «Современник»-мрэ ди театрхэмрэ я зэныбжьэгъугъэм, ахэр зэдэлэжьэным къежьапIэ хуэхъуну зэрыщыгугъыр.
Маковецкий Сергей иджы япэу Налшык къэкIуауэ арат. Абы журналистхэм яжриIэжащ режиссёр Волчек Галинэ 2004 гъэм мы спектаклым щигъэджэгуну иригъэблэгъауэ зэрыщытар. Зэман кIэщIым къриубыдэу абы зригъэщIат жиIэн хуейр, ар мащIэтэкъым, напэкIуэцI 90 хъурт. Дауи, гугъут артист цIэрыIуэ Гафт Валентин игъэзащIэу щыта ролым зеппщытыну. Ауэ пэлъэщащ, езым зэрыжиIэщи, «Пигмалион»-р езым нэхъыфIу илъагъу спектаклхэм ящыщ хъуащ. Илъэсибл дэкIа иужьщ спектаклым Бабенкэ Алёнэ къыщыхыхьар (Яковлевэ Еленэ и пIэкIэ).
Бабенкэ Алёни иджы япэу ди деж къеблэгъауэ арат. Ауэ нэхъапэкIэ ди къалэм теухуа хъыбар куэд зэхихат. КъызэрыщIэкIамкIэ, Алёнэ и нысэр (и къуэм и щхьэгъусэр) къыщалъхуар ди щIыналъэращ.
- Налшык сыкъыщыкIуа япэ махуэ дыдэм бгы, уэс, дыгъэпс дуней гуэрым сепщIыхьащ, - жеIэ къыкIэлъыкIуэу псалъэ зрата Хазовэ Маринэ. - ПщIыхьэпIэм апхуэдизкIэ сфIэфIу сыхэтащи, шэч къытесхьэркъым фIым зэрыхуэслъэгъуар. ЩIыналъэм и дахагъыр схуэIуэтэщIыркъым, хьэуаращи, зыщумыгъэнщIу къабзэщ. Кхъухьлъатэм сыкъызэрибэкъукIыу абы гу лъыстащ. Апхуэдэ дунейм щыпсэу фэ егъэлеяуэ узыншагъэшхуэрэ къарурэ фиIэн хуейуэ къысщохъу.
ПщыхьэщхьитIкIэ зыкъагъэлъэгъуащ «Современник» театрым и артистхэм, дауи, абыхэм театреплъхэр ятхьэкъуат. Абы и щыхьэтт Iэгуауэ мыухыжхэр. КъыжыIапхъэщ пщыхьэщхьитIми пэшым цIыхур щIэзу къызэрекIуэлIар.
ГушыIэ спектаклым лъабжьэ хуэхъуа хъыбарым куэд щыгъуазэми, зыгъэзащIэхэм я фIыгъэкIэ щIэщыгъуэ хъуат. Зэманым жьы, фагъуэ дэмыхъу спектаклым гупсысэрэ псэлъафэу къыхэпхынур мащIэкъым.
1995 гъэм ягъэувауэ щыта «Пигмалион» спектаклыр нобэми театрым зэпыу имыIэу щагъэлъагъуэхэм ящыщщ. ЛIыхъужь нэхъыщхьэхэм я ролхэр ягъэзэщIащ Урысейм и цIыхубэ артист Маковецкий Сергейрэ Урысейм и цIыхубэ артисткэ Бабенкэ Алёнэрэ. Кинохэм куэдрэ щытлъагъу артистхэр спектаклым щыджэгуу еплъыну щIэхъуэпсхэр мащIэтэкъым. Ар зыхащIэм хуэдэу, езы артистхэри я зэфIэкI еблэжакъым.
Театр цIэрыIуэр щежьэжым, КъБР-м щэнхабзэмкIэ и министр Къумахуэ Мухьэдин фIыщIэ псалъэкIэ захуигъазэри, дяпэкIи зэрыщIэну, зэдэлэжьэну зэрыщыгугъыр дыщIигъужащ.