Егугъуу еджэным къыхураджэ

Бахъсэн къалэм Сабий творчествэмкIэ и унэм, Налшык дэт «ДыгъафIэ къалэ» сабий творчествэмкIэ академием я гъэсэнхэр, ШколакIуэхэм я урысейпсо зэщIэхъееныгъэм и лэжьыгъэм жыджэру хэт ныбжьыщIэхэр иджыблагъэ яхуэзащ КъБР-м и Парламентым и депутатхэм. ИлъэсыщIэм ипэ къихуэ зэхуэсым къыщаIэтащ школакIуэхэм яфIэхьэлэмэт Iуэхугъуэ куэд. 

Хабзэухуэ IэнатIэм ЕгъэджэныгъэмкIэ, щIэныгъэмрэ щIалэгъуалэм я IуэхухэмкIэ и комитетым и пашэ Емуз Нинэ зэIущIэм кърихьэлIа псоми гуапэу ехъуэ­хъуащ къэблэгъа ИлъэсыщIэмкIэ, а лъэхъэнэщIэм яублэну IуэхущIэхэм ящыщ зым и пэщIэдзэ нобэрей зэхуэсыр зэрыхъунур къыхигъэщу. Ар адэкIэ тепсэ­лъыхьащ зи унафэщI къудамэм щIыналъэм егъэджэныгъэмрэ щIэныгъэмрэ, апхуэдэуи щIалэгъуалэм ехьэлIа Iуэху­хэм адэкIи зыщегъэужьынымкIэ щрагъэкIуэкI лэжьыгъэхэм. Депутатхэр жыджэру ядолажьэ школ-интернатхэм я гъэсэнхэм. Гулъытэншэу къанэркъым Хэку зауэшхуэм и ветеранхэр, мы зэманым дзэ къулыкъум пэрытхэр. 
НыбжьыщIэхэр яфIэхьэлэмэту епсэлъылIащ КъБР-м и Парламентым и УнафэщIым и къуэдзэ Къардэн Мурати. Спортсмен цIэрыIуэр, Олимп джэгухэм я чемпионыр школакIуэхэм яхутепсэлъыхьащ Парламентым щекIуэкI лэжьыгъэхэм, абы и депутатхэм къыхалъхьэ жэрдэмхэр зи лъабжьэ хабзэхэр щIыналъэм гъэзэщIа зэрыщыхъум. 
Сабийхэм упщIэхэр я куэдт. Ахэр ятеухуат зэхъуэ­кIыныгъхэхэр зи куэд иджырей гъащIэм узэрыхэзэгъэным, щIэныгъэмрэ IэщIагъэмрэ зэрызэпыщIам, спортым и мыхьэнэм, нэгъуэщIхэми. Къардэным жэ­уап зэпкърыха яритащ абыхэм.