ГъащIэм пэджэжу

Къэбэрдей-Балъкъэрым курыт щIэныгъэ щрагъэгъуэт и IуэхущIапIэхэм щеджэ цIыкIухэм дяпэкIэ Iэмал яIэнущ финанс щIэныгъэм епхауэ къызэрагъэпэщ пэIудза дерсхэм хыхьэну. КъБР-м и Лъэпкъ Банкым хъыбар къызэритымкIэ, финанс щIэныгъэмкIэ гъатхэм къыхалъхьэну пэхуэщIэм (проектым) хыхьэфынущ 8 - 11-нэ классхэм щеджэхэр, КъБР-м IэщIагъэрэ щIэныгъэрэ щрат колледжхэмрэ техникумхэмрэ щIэсхэр.

ПэIудзауэ ирагъэкIуэкIыну дерсхэм Iуэхугъуэ 20-м щIигъу къызэщIиубыдэнущ. Абы хыхьэну ныбжьыщIэхэм Iэмал яIэнущ банк гъэпцIакIуэхэр къызэрыхагъэщ щIыкIэхэр зрагъэщIэну, банкым епха хъуам иIэ хуитыныгъэхэр зыхуэдэм зыщигъэгъуэзэну, банк IуэхущIапIэхэм къыхалъхьэ финанс Iэмэпсымэхэм зэрыгъуэзэн икIи ахэр къыхэхын зэрыхуей Iэмалхэм хуеджэну. Апхуэдэу еджэныгъэм хыхьа щIалэгъуалэм ахъшэмрэ ар къызэрыунэхуа щIыкIэмрэ я тхыдэм щагъэгъуэзэнущ. ЖэрдэмщIакIуэхэм къыхалъхьэ пэхуэщIэр егъэджэныгъэ IэнатIэм еджакIуэхэм щIэныгъэ зэрарит программэхэм текIыркъым, упщIэхэм я зы IыхьэфIыр обществознаниемкIэ Зыуэ щыт къэрал гъэунэхуныгъэхэм (ЕГЭ жыхуаIэм) къащыхуэщхьэпэжынкIэ хъунущ.

ПэIудза дерсхэм финанс хуэIухуэщIэхэм къищынэмыщIауэ, IэщIагъэм хэзыгъэгъуазэ, IэнатIэм хэлъ щхьэхуэныгъэхэр зэпкърызых упщIэхэри хэтынущ. Псалъэм и хьэтыркIэ, дерсхэм хэтыну ныбжьыщIэхэм финансистымрэ бизнес-информатикымрэ я лэжьыгъэм хэлъ хьэлэмэтагъ псоми яхутепсэлъыхьынущ, щапхъэкIэ хузэпкърахыу, практикэкIэ хэлъ щэхухэр хуаIуэтэнущ. КъызэгъэпэщакIуэхэм зэрыжаIэмкIэ, дяпэкIэ щIалэгъуалэм IэщIагъэр къыхэхынымкIэ а дерс Iыхьэм мыхьэнэ пыухыкIа иIэнущ.

ПэIудза дерсхэр зэIухащ, сыт щыгъуи ухыхьэфынущ: егъэджакIуэм и гъусэу ухэлэжьэфынущ, уи закъуэу е адэ-анэр пщIыгъуу ухэтыфынущ. Дерсхэм щекIуэкIыну махуэмрэ зэманымрэ, абы узэрыхыхьэну щIыкIэмрэ лэжьыгъэхэм узэреплъынумрэ пэхуэщIэм и интернет напэкIуэцIым кърагъэувэнущ. Гъатхэ дерсхэр мэлыжьыхьым и 21 пщIондэ екIуэкIынущ.

Къэбэрдей-Балъкъэрыр финанс щIэныгъэмкIэ къызэрагъэпэщ пэIудза дерсхэм нэхъ жыджэру хыхьэхэм языхэзщ. 2022 гъэм щIыналъэм и курыт еджапIэхэр къанэ щымы1эу а Iуэхугъуэм хыхьауэ щытащ. ЛъэныкъуэкIэ къыщынакъым колледжхэмрэ техникумхэмрэ, уеблэмэ гъатхэм къызэрагъэпэщ хабзэ пэIудза дерсхэр программэм хаухуэнауэ щытащ. А дерсхэм хыхьэ хэгъэгухэм уеплъмэ, Къэбэрдей-Балъкъэрыр ипэ ит щIыналъипщIым яхэтщ. Кърибгъэлъэгъуэну ирикъунщ нэгъабэ екIуэкIа гъатхэ икIи бжьыхьэ дерсхэм КъБР-м и еджакIуэхэм ящыщу цIыху мин 98-рэ хыхьауэ зэрыщытар. КъызэгъэпэщакIуэхэм зэрыжаIэмкIэ, дерсхэр пэIудзами, гъащIэм пэджэжу, абы и щытыкIэ куэд къытещу зэрыщытым щIалэгъуалэр зыIэпешэ.

ЩIэныгъэр фIыщ, цIыхум и зэхэщIыкIым хэгъэхъуэным хуэунэтIамэ, ауэ абы жылагъуэм и зыужьыныгъэр епхамэ, щIыналъэм и къэкIуэнум щыщ Iуэхугъуэхэр хэухуэнауэ щытмэ, гулъытэншэ хъуныр игъуэджэщ. Гуапэщ дунеймкIэ гузэхэщIэ зиIэ щIалэгъуалэм апхуэдэ пэхуэщIэхэм я мыхьэнэр къазэрыгурыIуэр, арыххэуи ди щIыналъэм и пщэдейм гугъапIэ дахэхэр хууагъэщIу зэрыщытыр.