КъБР-м и Правительствэм и УнафэщI Мусуков Алий иригъэкIуэкIащ Iуэхугъуэ зэхуэмыдэхэм щытепсэлъыхьа зэIущIэ.
Хеймащэ гъэмахуэ хъупIэхэм Iэщхэр зэрахунум, Iэщым я бжыгъэр гъэбэгъуэным, хъупIэхэр нэсу къэгъэсэбэпыным, Iэщхэм якIэлъыплъыну ветеринар IуэхущIапIэхэр къызыхуэтыншэу щытыным, 2023 гъэм гъэмахуэ хъупIэхэр зэрыхуэхьэзырым тепсэлъыхьащ КъБР-м щIы, мылъку зэхущытыкIэхэмкIэ и министр Тэхъу Аслъэн.
2023 - 2025 гъэхэм Къэбэрдей-Балъкъэр Республикэм и бюджет зэхэлъым техьэ кредит щIыхуэр зэрапшынынум и Iэмалхэр гъэбелджылыным теухуауэ Правительствэм къыхилъхьа проектыр къигъэнэIуащ КъБР-м финансхэмкIэ и министр Лисун Еленэ.
«Экономикэ зыужьыныгъэрэ IэмалыщIэхэмкIэ гъэпса экономикэрэ», «ЛэжьэкIэмрэ хъыбар егъэщIэкIэмрэ зыгъэпсынщIэ Iэмалхэр къыщагъэсэбэп жылагъуэ» къэрал программэхэм зэхъуэкIыныгъэ щхьэхуэхэр зэрыхалъхьэр жиIащ КъБР-м экономикэ зыужьыныгъэмкIэ и министр Рахаев Борис.
«КъБР-м и мэз IэнатIэхэм зегъэужьыным», «Дыкъэзыухъуреихь дунейр хъумэным», «КъБР-м и щIыуэпс хъугъуэфIыгъуэхэр къэгъэсэбэпыным» теухуауэ республикэм иIэ къэрал программэхэм халъхьащ мылъкум ехьэлIа зэхъуэкIыныгъэхэр.
ЦIыхухэр псыкIэ къызэгъэпэща хъун папщIэ КъБР-м и бюджетым къыхэкIыу щIыналъэхэм мы гъэм яIэрыхьэну мылъкур зытрагуэшэнум тепсэлъыхьащ КъБР-м ухуэныгъэмрэ псэупIэ-коммунальнэ хозяйствэмкIэ и министр Бэрбэч Алим.
- Проектыр дгъэхьэзыращ «КъБР-м и цIыхухэр псэупIэкIэ коммунальнэ IуэхутхьэбзэхэмкIэ къызэгъэпэщыным» теухуауэ щыIэ къэрал прграммэм и мардэхэм тету. Республикэм проектым хухихащ сом мелуани 10,5-рэ. ЩIыпIэхэм я мылъкуу абы халъхьэнущ сом мелуани 3,5-рэ. Проектым теухуауэ къызэрагъэпэща зэпеуэм пхыкIащ Прохладнэ, Тэрч къалэхэр, Дзэлыкъуэкъуажэ. Уэшхыпсыр зрижэ бжьамийхэр, псыр зэрагъэкъабзэ ухуэныгъэхэр мылъкумкIэ щагъэтэмэмынущ а щIыпIэхэм.
ЗэIущIэм щытепсэлъыхьащ къат куэду зэтет унэхэм я псэупIэхэр зэрагъэпэщыжыным папщIэ ят ахъшэм къыхэкIыу мазэ къэс зыгъэзэж компенсацэм. Ар иратынукъым илъэсищым и кIуэцIкIэ псэупIэ коммунальнэ Iуэхутхьэбзэм и щIыхуэ зэтрезыгъэхьахэм. КъБР-м лэжьыгъэмрэ цIыхухэм социальнэу къащхьэщыжынымкIэ и министерствэм щIыхуэ зытелъхэм я хъыбарыр Iэрегъэхьэ ЖКХ-м.