Япэ игъэщыпхъэхэр

КIуэкIуэ Казбек бэрэжьей кIуам иригъэкIуэкIа «муниципальнэ сыхьэтым» Iуэхугъуэ зыбжанэм щытепсэлъыхьащ. Абы хэтащ республикэм и къалэхэмрэ щIыналъэхэмрэ я Iэтащхьэхэр. 

Псом япэрауэ, къызэхуэсахэр тепсэлъыхьащ Къэбэрдей-Балъкъэрым щыщу Украинэм щекIуэкI дзэ Iуэху хэхам щыIэ ди щIалэхэм зэрадэIэпыкъум дяпэкIи къыпащэн зэрыхуейм. Иджыпстуи абыхэм хурагъашэ хьэпшыпхэмрэ ерыскъы­хэкIхэмрэ зэпыуакъым, техникэкIи къызэрагъэпэщ. ЩIыналъэ Iэтащхьэхэмрэ жылагъуэ зэгухьэныгъэхэм я лIыкIуэхэмрэ пIалъэ-пIалъэкIэрэ зауэ губгъуэм макIуэ, зауэлIхэр зыхуей-зыхуэфIхэр хуашэ. 
 «Сэ иджыблагъэ сыщыщыIам щIалэхэр къызэрызэлъэIуа псори яхуэтщIащ, ­гъуэгу гугъухэм тыншу ирикIуэ автомобиль зыбжанэ яIэрыдгъэхьащ», - жиIащ КIуэкIуэ Казбек. Iэтащхьэм къызэхуэсахэм ягу къигъэкIыжащ абыхэм я унагъуэхэми гулъытэ хэха яхуэщIын зэрыхуейр. 
ЗэIущIэм хэтахэр тепсэлъыхьащ лъэпкъ проектхэр гъэзэщIа зэрыхъум. Мы гъэм ухуэныгъи 150-рэ зэрагъэпэщыжынущ е щIэуэ ящIынущ. Ахэр социальнэ IуэхущIапIэхэрщ, гъуэгущIэхэрщ. А Iуэхум иужь итынухэм зэгурыIуэныгъэхэр иращIылIащ, лэжьыгъэм пэрыхьаи яхэтщ. 
КъулыкъущIэхэм и гугъу ящIащ къуажэхэр гъэкъэбзэн, псэупIэ-коммунальнэ IэнатIэр егъэфIэкIуэн зэрыхуейм, нэгъуэщIхэми.