ТрилъэсыкIа гъуэгухэр зэрагъэпэщыж

Мусуков Алий иригъэкIуэкIа КъБР-м и Прави­тельствэм и зи чэзу зэIущIэм, и къуэ­дзэхэу Говоров Сергей, Хъубий Марат, Къуныжь МуIэед къи­щы­нэмыщIауэ, кърихьэлIат республикэм и Iэтащхьэм и Администрацэм и УнафэщI Къуэдзокъуэ Мухьэмэд, УФ-м и ­Президентым и полномочнэ лIыкIуэу Кавказ ­Ищхъэрэ ­Федеральнэ округым щыIэм и Аппаратым КъБР-м къегъэщIылIа и федеральнэ инспектор ­нэхъыщхьэ ­Мэкъуауэ Тимур, КъБР-м и Парламентым и Уна­фэщIым и къуэдзэ Жанатаев Сэлим сымэ. 

ЗэIущIэм Iуэхугъуийм щыхэплъащ. КъБР-м транспортымрэ гъуэгу хозяйствэмкIэ и министр ДыщэкI ­Аслъэн тепсэлъыхьащ КъБР-м и Правительствэм и ахъшэ гъэтIылъыгъэм мылъку къыхэхыным теухуауэ Правительствэм ищIа унафэм и проектым. Налшык ­къалэ мылъку щхьэхуэ хухэхыным, ар зытрагъэкIуэдэнум министрыр щытепсэлъыхьым къыхигъэщащ иужь­рей махуэхэм къешха уэшхышхуэм гъуэгухэр Iисраф зэрищIар икIи ахэр зэгъэпэщыжыным ахъшэшхуэ ­трагъэкIуэдэн хуей зэрыхъур, Хьэсэней - Джэрпэджэж гъуэгур ягъэкъэбзэжу зыхуей хуагъэзэжын папщIэ ­республикэм и мылъку гъэтIылъам щыщу сом зы мел­уанрэ мин 730-рэ къызэрыхуаутIыпщынур. 
КъБР-м лэжьыгъэмрэ социальнэ къыщхьэщыжы­ныгъэмкIэ и министр Асанов Алим и гугъу ищIащ Прох­ладнэ дэт сабий унэ-интернатым щыпсэу, зи зыу­жьыкIэкIэ адрейхэм къакIэрыху цIыкIухэм я псэукIэр егъэфIэкIуэн, я хуитыныгъэхэр хъума хъун ­папщIэ Къэбэрдей-Балъкъэр Республикэм 2023 - 2025 гъэхэм IэмалыщIэхэр иубзыхун зэрыхуейм теухуауэ Прави­тельствэм ищIа унафэм и проектым. Асановым зэ­рыжиIамкIэ, УФ-м и Президент Путин Владимир а Iуэхум ехьэлIауэ къыдигъэкIа унафэм ипкъ иткIэ, республикэм щызекIуэ хабзэхэм зэхъуэкIыныгъэ хэлъ­- хьэн хуейщ. Зи психикэр зэтемыс сабийхэм медицинэ дэ­Iэ­пыкъуныгъэ етын, социальнэ Iуэхутхьэбзэхэр яхуэ­-щIэн, я хуитыныгъэхэр хъумэн, егъэджэн я лъэны­къуэкIэ хабзэм хуэщIын хуей дэщIыгъужыныгъэхэм арэзы техъуащ къызэхуэсахэр. 
Апхуэдэуи КъБР-м и Iэтащхьэ КIуэкIуэ Казбек ищIа унафэм ипкъ иткIэ, гъащIэм щытыкIэ гугъу иригъэу­вауэ ди хэгъэгум исхэм ахъшэкIэ ядэIэпыкъуным и Iуэхум теухуа проектри утыку кърихьащ Асановым. 
Къэбэрдей-Балъкъэрым ФIэкIыпIэ зимыIэ медицинэ страхованэмкIэ и щIыналъэ фондым и унафэщI Бгъэжьнокъуэ Зурият тепсэлъыхьащ я IуэхущIапIэм и лэжьакIуэхэр Донецк, Луганск цIыхубэ ­республикэхэм, Запорожье, Херсон областхэм лэжьыгъэ IуэхукIэ зэ­рагъакIуэм теухуауэ Правительствэм ищIа унафэм и проектым. УнафэщIым къигъэлъэ­гъуащ командировкэ кIуэхэм я гъуэгупщIэр, зыхуеинухэр, лэжьапщIэр  къы­зыхэкI мылъку щхьэхуэ зэ­рагъэпэщын зэрыхуейр.