IэнатIэм уехъулIэн папщIэ

Фестивалхэр

Пятигорск (Псыхуабэ) къалэм егъэджэныгъэмкIэ и «Машук» центрым мэкъуауэгъуэм и 23-м къыщызэIуахащ телевизионнэ фильмхэмрэ программэхэмрэ я 24-нэ, радиомрэ прессэмрэ я 17-нэ «Моя провинция» урысейпсо фестивалыр.

Фестивалыр 1999 гъэм ирагъэжьащ. Ар зи жэрдэмри фестивалым и президентри Фоминых Еленэщ. Ар щекIуэкIащ Борисоглебск (Воронежскэ област), Арзамас, Салехард, Сочэ, Улан-Удэ (Бурят Республикэ), Саяногорск (Хакасие Республикэ), Кострома къалэхэм.

Хабзэ зэрыхъуауэ, махуиплIым къриубыдэу, фестивалым хэтхэр абы щызочэнджэщ, IэмалыщIэхэм зыщыхагъэгъуазэ, хъыбарегъащIэ IэнатIэхэм щIэгъэкъуэн яхуэхъун проектхэр къыщыхалъхьэ, мастер-класс, зэIущIэ щхьэпэхэр къызэрагъэпэщ. КъэпщытакIуэ гупым хэтхэр йоплъ зэпеуэм къагъэхьа фильмхэмрэ программэхэмрэ. Мы зэми фестивалым лэжьыгъэ нэхъыфI къыщызыгъэлъэгъуахэр абы щагъэлъэпIащ.

Фестивалым хэтащ УФ-м и Президентым и полномочнэ лIыкIуэу Кавказ Ищхъэрэ федеральнэ щIыналъэм щыIэм и къуэдзэ Куренной Александр, УФ-м и Журналистхэм я зэгухьэныгъэм и унафэщIым и къуэдзэ Вишневецкий Алексей, «Машук» центрым и унафэщI Сериков Антон, «Московская правда» газетым и редактор нэхъыщхьэ Муладжанов Шод, фестивалым и президент Фоминых Еленэ сымэ, нэгъуэщIхэри.

Фестивалым зэхуишэсащ Кавказ Ищхъэрэ федеральнэ щIыналъэм и хэгъэгухэм я телевиденэхэм, радиохэм, газетхэм я лэжьакIуэхэр. Зэуэ къыхэзгъэщынщи, абыхэм зыщрагъэплъыхьащ къалэм и щIыпIэ дахэхэм.

«Моя провинция» фестивалыр къызэрагъэпэщащ УФ-м и Президентым и полномочнэ лIыкIуэу Кавказ Ищхъэрэ федеральнэ щIыналъэм щыIэр,УФ-м и Журналистхэм я зэгухьэныгъэр,ТАСС агентствэр, «Московская правда» газетыр я дэIэпыкъуэгъуу.

Мэкъуауэгъуэм и 24-м Пятигорск къалэм и «Машук» центрым Урысейм и ТАСС хъыбарегъащIэ агентствэм щригъэкIуэкIащ «Школа региональной журналистики» егъэджэныгъэ семинар. Абы зэхуишэсат Кавказ Ищхъэрэ федеральнэ щIыналъэм и хъыбарегъащIэ IэнатIэхэм я унафэщIхэр, редактор нэхъыщхьэхэр, журналистхэр, а IэщIагъэм хуеджэ студентхэр.

ТАСС-м къикIа, журналист IэщIагъэм хуэIэижь цIыху цIэрыIуэхэм мастер-классхэр ятащ. Ахэр ТАСС центрым и унафэщIым и къуэдзэ Соколов Андрей, ТАСС-м и Егъэджэныгъэ центрым хъыбарегъащIэ программэхэмкIэ и унафэщI, УФ-м щэнхабзэмкIэ щIыхь зиIэ и лэжьакIуэ Родионов Юрий, ТАСС-м Уралым щиIэ хъыбарегъащIэ центрым и унафэщI Картуз Марие, ТАСС-м хъыбарегъащIэ IуэхухэмкIэ, рекламэмрэ ИнтернетымкIэ и Управленэм и унафэщI Клундук Павел, ТАСС-м и пресс-IуэхущIапIэм и унафэщI Яковлев Николай, ТАСС-м щIыналъэхэм хъыбарыщIэхэмкIэ щиIэ редакцэм и унафэщI Цицинов Андрей сымэщ.

Соколов Андрей семинарыр къыщызэIуихым жиIащ я IуэхущIапIэм и лэжьакIуэ пашэхэм ятыну мастер-классхэм Iуэхугъуэ куэд къызэрызэщIаубыдэр икIи дэтхэнэри къыхуриджащ я Iуэху еплъыкIэр абы къыщагъэлъэгъуэну. Семинарым къэкIуахэм щIэ куэд къащIауэ, ахэр я IэнатIэм къызэрыщагъэсэбэпынум, зэрефIэкIуэнум хущIэкъуу Iуэхум пэрыхьэжыну зэригуапэр щIигъужащ Соколовым.

Яковлев Николай интервью щIэщыгъуэ зэрыбгъэхьэзырынум теухуа и мастер-классыр щIэщыгъуэ ящыхъуащ абы едэIуахэм. Нэхъыщхьэу гу зылъригъэтам и гугъу пщIымэ, ар узэпсэлъэну цIыхур пфIэгъэщIэгъуэну, абы зыпIыт-зыхуз хэмыту хуиту, уи цIыхугъэм, ныбжьэгъум хуэдэу уепсэлъэнырщ, уи дзыхь зэребгъэзыр къэбгъэнаIуэу. КъищынэмыщIауэ, интервью къызэIыпх цIыхум и лэжьыгъэм Iэмал имыIэу фIыуэ ущыгъуазэу щытын хуейщ. Интервью гъэщIэгъуэн зэрыпщIынум теухуауэ къигъэлъэгъуа нэтынхэр дерс къызыхэпхынт. Апхуэдэт УФ-м и Президент Путин Владимир ирата упщIэ 20-р.

Родионов Юрий семинарым щытепсэлъыхьащ федеральнэ хъыбарегъащIэ IуэхущIапIэхэм папщIэ нэтын зэрыбгъэхьэзырынум. Цицинов Андрей иригъэкIуэкIащ «Медиатренды» лекцэр. Ар къытеувыIащ цIыхубэр нэхъыбэу зэджэ хъыбарегъащIэхэр зэрыбгъэхьэзырынум.

Журналист лэжьыгъэм куэд щIауэ хэтхэми абы япэ лъэбакъуэ хэзычэхэми щхьэпэ яхуэхъуащ цIыху цIэрыIуэхэм я чэнджэщхэр. Журналистхэмрэ студентхэмрэ я упщIэхэми жэуап къыхуагъуэтащ абыхэм.

Семинарым хэтахэм сертификатхэр иратыжащ.