Щыгъын хужькIэ зыпхуэпэныр суннэщ

  Гу лъумытапIэ имыIэу, иужьрей зэманым ди уэрамхэм кIуэ пэтми нэхъыбэу щыдолагъу щэкI фIыцIэм къыхэщIыкIа фэилъхьэгъуэкIэ захуэпэныр Iэмалыншэу къызыщыхъухэр. Псом хуэмыдэу, ар я нэрыгъщ фарзым тету зызыхуапэ, щIэхъумапхъэхэр щIэзыхъумэ муслъымэн цIыхубзхэм ящыщ куэдым. Алыхьталэм и унафэм щIэувэу, зэрызахъумэжым папщIэ щытхъу яхуэфащэу щытми, Iимам Сэбаншы Хьэдис зэрыжиIэмкIэ, ахэр топлъэкъукI «нэм къыфIэмынэн» жыхуиIэ тегъэщIапIэм.

           «Хьэрып дунейм и гугъу тщIымэ, абы цIыхухъухэм я нэхъыбэм щыгъын хужь, цIыхубзхэм – фIыцIэ щыщатIагъэ.  Сыт фIыцIэр нэхъ къыщIыхахыр? ФIыцIэм нэр ехъуапсэркъыми, сеплъарэт жыпIэркъым. Ауэ нобэ ди республикэм къыщекIуэкIым ещхьу, цIыхубзыр зэрыщыту фIыцIэкIэ хуэпамэ, ар «хьиджабым гулъытэ зримышалIэу щытын хуейщ» жыхуиIэ унафэм ебэкъуа мэхъу. Мы щIыпIэм щыщатIагъэ щыгъын щытIагъэ, уэрамым дэт цIыхухэм уахэзэрыхьын хуэдэу. Зэрыщыту плъыжьуи, удзыфэуи, гъуэжь е фIыцIэ зэфэзэщуи зыщIэпхуэпэн щыIэкъым. МыщхъуэкIэплъыкIэу, къызэрыгуэкI фэ гуакIуэхэр къыхэх. Псори а жытIам йокIуэлIэж: «ЦIыхухъухэм я нэ укъыфIэмынэн хуэдэу». Ауэ ди щхьэгъусэхэм фIыцIэ зэфэзэщкIэ зедгъэхуапэрэ къыщIэтшмэ, псори зэплъыр аращ. Сыт апхуэдэу щIэхъур? Къахощри!  Хьиджабым и мыхьэнэр нэм укъыфIэмынэнырщ, цIыхум уакъыхэмыщынырщ. Зы щIэныгъэлI щыIэкъым «хьиджаб фIыцIэр суннэщ» жиIауэ.  Бегъымбар лъапIэу щэлатымрэ сэламымрэ зэхам и щхьэгъусэхэми щэхьабэхэм я щхьэгъусэхэми фэ зэмыщхьхэр щатIагъэу щытащ. Езы ЛIыкIуэ лъапIэу щэлатымрэ сэламымрэ зэхами фэ зэхуэмыдэхэм къыхэщIыкIа щыгъын зэрихьащ. ФIыцIэр суннэкъым. Хьэдисым суннэу къигъэлъагъуэр хужьырщ: «Щыгъын хужь щыфтIагъэ, дунейм ехыжа фи Iыхьлыхэри хужь ящыгъыу щIэфлъхьэж». Абы къыхэкIыу, цIыхухъухэм я дежкIэ суннэр хужьращ. ЦIыхубзхэм я дежкIэ - щыгъын быхъу, къомышэкIауэ, узэпхымыплъу, цIыхухъухэм я нэ къыфIэмынэу».

   ЧЭРИМ Марианнэ.