Иджыблагъэ адыгэ дунейм къытехьа «Гузэрыдзэ» («Узлы») адыгэ фильм телъыджэм лIыхъужь нэхъыщхьэм (Динэ) и ролыр щызыгъэзащIэ Мэмрэш Светланэ куэдым къезыгъэцIыхуар 2019 гъэм екIуэкIауэ щыта «Голос» теленэтынырщ.
Апхуэдэу, Светланэ хэтащ МэшбащIэ Исхьэкъ и Iэдакъэ къыщIэкIа «Аиссе» романым къытращIыкIа кинофильмым (Аиссе и ролыр игъэзащIэу). «Гоголь-центрым» (Москва къ.) и актрисэ пщащэм и роль къэс гукъинэжщ.
Мэмрэшым и гупсысэ, Iуэху еплъыкIэ къыхэщу инта интервьюхэм зэрыадыгэр, къыщыхъуа жылэм зэрыригушхуэр щыжеIэ.
- Сэ лъэпкъкIэ Нарткъалэ сыщыщщ. ФIыщэу солъагъу сыкъыщыхъуа щIыпIэр, лъахэр,- жеIэ абы.
- Ди къалэм дэт ЩэнхабзэмкIэ унэм къыщызэрагъэпэща театр гупжьейм етхуанэ классым сыщIэсу кIуэн щIэздзат. Дэ дезыгъаджэу щытар режиссёр Iэзэ Сапрыкинэ Галинэщ. Аращ театрым и дунейм сыхэзышар.
Школ нэужьым журналист IэщIагъэм сыщыхуеджэну Москва сыкIуат. Япэ илъэсым сыкъыпыхури, етIуанэ илъэсыр къыщыблагъэм, артист IэщIагъэм си насып хэлъмэ сеплъыну сыкIуащ.
Сэ еджапIэ сыщыщIэтIысхьэкIэ зыри къызэрыздэмыIэпыкъунур сщIэрти, дэнэми, пщIэ щIэзмыту, зыщIыпIэ сыщIэтIысхьэну тезухуат. Ауэ сэ си нэгу къысхущIэгъэхьэртэкъым театр училищэ, институт сыщIэтIысхьэфыну. Экзаменым сыщыкIуам, унэ лъэгум си нэр къытезмыхыу згъэхьэзырам сыкъеджауэ арат (пэжым ухуеймэ, бэлыхьу зызгъэхьэзыратэкъым). Ауэ, насып сиIэти, экзамен тIызыххэм зэфIэкI сиIэу къалъытащ. Абы сызэрыщIэтIысхьэфар гъащIэм щызиIэнкIэ хъуну ехъулIэныгъэхэм язу собж. Къыхэсха IэщIагъэр къыздэзыIыгъа си адэ-анэм фIыщIэ яхуэфащэщ. Щепкиным и цIэр зезыхьэ театр училищэм сызэрыщIэтIысхьам ахэр зэрыщыгуфIыкIар зэи сигу ихужынукъым.
Абы илъэситI фIэкIа сыщемыджауэ, Серебрянников Кирилл къызэригъэпэща МХАТ студием сыкIуауэ щытащ. Дауи, сэркIэ насыпышхуэт ар, сыт щхьэкIэ жыпIэмэ, Серебрянниковым и лэжьыгъэхэм сатхьэкъупат.
«Щепкэм» сызэрыщеджэм и фIыгъэкIэ Москва дэт театр инхэм пщIэншэу сыщIагъэхьэрт. А лъэхъэнэм театр дунейм щызэхэпхыр Серебрянников Кирилл и цIэрат. Абы Хаматовэ Чулпан, Миронов Евгений, Нееловэ Маринэ сымэ хэту спектаклхэр игъэувырт, илъэс ныкъуэ къэс спектаклыщIэ утыку кърахьэу. Абы дзыхь къыхуащIырт Волчек Галинэ, Табаков Олег хуэдэ артист инхэм.
Кирилл цIыху телъыджэщ: абы драмэ спектакль, балет, оперэ егъэув, фильм трех. Абы театр дунейм и пщIэ, увыпIэ къыщилэжьыжащ. Ар зигу ирихьи иримыхьи щыIэщ, ауэ абы хуэдэ IэщIагъэлI нэсхэр зырызщ.
Актёр IэщIагъэм и щэхухэм дыхуезыгъэджа Лобанов Михаил къыбдэлэжьэну куэд и уасэт! ЦIыхум зэригъэгъуэт IэщIагъэм зэрыхуэпабгъэ, абы ехьэлIауэ нэхъыбэ къызэрищIэнум зэрыхущIэкъум мыхьэнэшхуэ иIэщ. А щхьэусыгъуэр арагъэнщ илъэс 28-м ситу классикэ уэрэд жыIэным сыдихьэхыу, Ипполитов-Иванов и цIэр зезыхьэ институтым оперэ уэрэд жыIэнымкIэ и къудамэм сыщIэтIысхьэжу къыщIэзухар.
ИлъэсипщIым щIигъуауэ театрым сыщыIэщи, сигу зыкIэрыпщIа ролхэри сиIэщ. Чеховым и цIэр зезыхьэ театрым Булгаковым и «Зойкина квартира» пьесэм Серебрянников Кирилл къытрищIыкIа спектаклым Аллэ Вадимовнэ и ролыр щызогъэзащIэ. «Каренин» спектаклым Анна и ролыр (зытхыжар Сигарев Василийщ). «Гоголь-центрым» «Сон в летнюю ночь» спектаклым (Шекспир) Титания и ролыр, «Гамлет»-м Офелия и ролыр (режиссёрыр Бовэ Давидщ), «Девять дней одного года» фильмым къытращIыкIа спектаклым Лёлэ и ролыр щызогъэзащIэ, нэгъуэщIхэри.
Кином лъэбакъуэ цIыкIуурэ сыхуокIуэ. Артисткэ цIэрыIуэ Курковэ Равшанэ сригъэблагъэри, «А у нас во дворе» фильмым «Довлатов» фильмым и Iыхьэшхуэм (Герман нэхъыщIэм и фильмщ), Тишман Марк и клипым сыхэтащ. ИкъукIэ сфIэфIу селэжьащ МэшбащIэ Исхьэкъ и «Аиссе» романым къытращIыкIа фильмым.
ДызыхэпсэукI зэманым мыхьэнэшхуэ иIэщ цIыхухэм укъызэрацIыхум. Абы и лъэныкъуэкIэ сэ хуабжьу сэбэп къысхуэхъуащ «Голос» проектыр. А нэтыным и фIыгъэкIэ куэдым сыкъалъэгъуащ, нэхъыбэм сыкъацIыхуащ.
Налшык мы махуэхэм щагъэлъагъуэ «Гузэрыдзэ» фильмым, (сценарийр зытхар Къаныкъуэ Заринэщ, режиссёрыр Хьэмокъуэ Олегщ) Динэ и ролыр Мэмрэшым икъукIэ дахэу, уи фIэщ ищIу щегъэзащIэ. Адыгэ фильмым лъэбакъуэщIэ зэричар, зэрызиужьар наIуэ зыщI мы лэжьыгъэм ущымыгуфIыкIынкIэ Iэмал иIэкъым.
Сыт хуэдэ ехъулIэныгъэми и лъабжьэр гугъуехьырщ, а Iуэхум узэрелIалIэрщ зэлъытар. ЦIыхур гугъу зыдехь псори къехъулIэркъым, ауэ, узэлIалIэр къолIэлIэж, щIыжаIэр апхуэдэ зыгуэрщ. Ар Светланэ фIы дыдэу къыгуроIуэ.
Светланэ и IэщIагъэкIи дуней еплъыкIэкIи зыужьыныгъэ ин игъуэтыну, ефIэкIуэну, адыгэ лъэпкъым и цIэр жыжьэ игъэIуну ди гуапэщ.
