Мариинскэ театр

7 июля, 2023 - 12:27
Мариинскэ театрыр – Урысейм и музыкэ театр инщ икIи урыс щэнхабзэм и дамыгъэ нэхъыщхьэхэм ящыщщ. 
Театрым и балет гупыр урыс къафэ гъуазджэм и зыужьыныгъэм хэлъхьэныгъэфIхэр хуэзыщIа, къэралым и къэфакIуэ нэхъыжьхэм ящыщщ. Абы и оперэ труппэр дуней псом цIэрыIуэ щыхъуащ икIи пщIэ щиIэщ. Мариинскэ театрым сыт щекIуэкIми, цIыхушхуэ къокIуалIэ. Абы щIэх-щIэхыурэ зыкъыщагъэлъагъуэ дуней псом и цIыху цIэрыIуэхэм. 
1860 гъэм яухуа театрым и теплъэр дуней псом щынэхъ дахэхэм ящыщу къалъытэ. Ар и лэжьыгъэщ архитектор Кавос Альберт. Пэшышхуэм  ипэрей теплъэм зэхъуэкIыныгъэ хамылъхьэу ди нобэм къэсащ. Дыщэпс зытегъэлъэда, къэдабэ щхъуафэхэр зытелъ шэнтжьейхэр, хрусталь люстрэр, пащтыхь хэщIапIэм хуэдэ театр пэшым зыщыбгъэпсэхуныр уасэншэщ. Мариинскэ театрым и Iупхъуэр 1914 гъэм ягъэхьэзыращ театр художник цIэрыIуэ Головин Александр и эскизкIэ. Ар театрым и эмблемэ хъуащ. 
Театрыр щаухуам, пащтыхь Александр II и щхьэгъусэ пащтыхь гуащэ Марие и цIэр ф1ащат. 1935 гъэм театрыр Кировым и цIэкIэ зэрахъуэкIащ. ИужькIэ иратыжащ япэу фIаща Мариинскэ цIэр. Театрым и художественнэ унафэщIыр дирижёр цIэрыIуэ Гергиев Валерэщ. 
Мы театрым и утыр ягъэбжьыфIащ балетмейстер, къэфакIуэ цIэрыIуэхэу Нижинский, Павловэ, Карсавинэ, Петипа, Нуриев, Барышников, Дудинская. Абы уэрэд щыжаIащ Шаляпинымрэ  Собиновымрэ. Балет хъугъуэфIыгъуэхэр абы зэрыщахъумам и фIыгъэкIэ мы театрыр зыхуэбгъадэ хъун щыIэкъым.  
Къэбгъэлъагъуэмэ, балетым и щапхъэхэм ящыщ «Жизель» спектаклыр 1842 гъэм щыщIэдзауэ абы щагъэлъагъуэ. 1890 гъэм япэу абы и утыку кърахьащ «Лебединое озеро» балетыр. А гъэ дыдэм Чайковский Пётр и «Пиковая дама» оперэр япэу щагъэлъэгъуащ. Глазунов и «Раймонд» балетыр 1898 гъэм абы япэу зэрыщагъэлъагъуэрэ 370-рэ къытрагъэзэжащ. 
Куэд щIакъым Декабристхэм я уэрамым тет Декорацэ тыкуэным деж Мариинскэ театрым и Концерт пэшыщIэ къызэрыщызэIуахрэ. ЦIыху 1100-м хуэщIа ухуэныгъэм Мариинскэ театрым и оркестрым и симфоние концертхэр щрагъэкIуэкI. 
ТЕКIУЖЬ Заретэ.
  • 33 просмотра
Поделиться: