Зэхьэзэхуэр гуащIэу йокIуэкI

10 июля, 2023 - 10:31
Бадзэуэгъуэм и 5-м щIидзауэ Налшык щокIуэкI Кавказ Ищхъэрэ щIыналъэм мафIэсгъэункIыфI-къегъэлыныгъэ спортымкIэ я зэхьэзэхуэ. Судья нэхъыщхьэр Романчев Олегщ. 
Ар къыщызэIуахым Урысей МЧС-м и Управленэ нэхъыщхьэу КъБР-м щыIэм и унафэщIым и къуэдзэ Къэгъэзэж Анзор спортсменхэм зэхьэзэхуэхэм ехъулIэныгъэхэр щызыIэрагъэхьэмэ зэригуапэр яжриIащ. 
- МафIэсгъэункIыфI-къегъэлыныгъэ спортым ди лэжьыгъэм и пщIэр еIэт. МЧС-м и IэнатIэм щолажьэ цIыху къэмылэнджэжхэр, лIыгъэ зыхэлъхэр, бэшэчхэр, ахэр гузэвэгъуэм хэхуахэр къегъэлыным хуэхьэзырщ, езыхэм я гъащIэмрэ узыншагъэмрэ емыблэжу. А фIагъ псори щызэгъэуIуащ мы спорт лIэужьыгъуэм икIи ар мафIэсым пэщIэт цIыхум и зэфIэкIыр здынэсыр къыщагъэлъагъуэщ, - къыхигъэщащ Къэгъэзэжым. 
Зэхьэзэхуэхэм къызэхуишэсахэм фIэхъус псалъэкIэ захуигъэзаш КъБР-м спортымкIэ и министрым и къуэдзэ Анаев Аслъэн. ХьэщIэхэм я гукъыдэжыр къиIэтащ «Шагъдий» къэфакIуэ цIыхубэ ансамблым. 
Зэхьэзэхуэхэм хэтщ Урысей МЧС-м и Управленэ нэхъыщхьэу КИФЩI-м щыIэхэм я команди 7. Я IэщIагъэм зэрыхуэIэкIуэлъакIуэр къагъэлъагъуэ мафIэсгъэункIыфIу лажэьэхэми, я ныбжь елъытауэ гшупищу ягуэша зэщхьэщыха щIалэхэмрэ хъыджэбзхэмри. 
Чемионатыр къызэIуахри, япэ махуэм зэрызэпеуэну ябзыхуахэмкIэ зэхьэзэхуащ. Чэщанэм и етIуанэ къатым и щхьэгъубэм пкIэлъеймкIэ дэкIуеяхэщ нэхъыжьхэр зыхэта бзылъхугъэхэр. 
 Абы япэ увыпIэр къыщихьащ Клочковэ Вероникэ, Гурник Алиеэ етIуанэщ, ещанэ хъуащ Скобликовэ Викторие (Ставрополь край).
НэхъыщIэхэм я деж бжьыпэр щиубыдащ ГуIэтыж Дианэ (КъБР), Соколовэ Оксанэ етIуанэщ, ещанэр увыпIэр лъысащ Зафировэ Вероникэ (тIури Ставрополь крайм щыщщ).
Курыт ныбжьым хиубыдэхэм я деж щытекIуащ Джэду Фаридэ (КъБР), етIуанэ увыпIэр къихьащ Похилько Ульянэ, Деминэ Дарье ещанэщ (Ставрополь щыщхэщ)
ЩIалэхэм ящыщу зи ныбжьыкIэ курытхэр зыхэта зэпеуэм щытекIуащ Александр Иванов (Ставрополь край), етIуанэ увыпIэр къихьащ Шавхалов Асхьаб, Губаев Исмэхьил ещанэщ (тIури Шэшэн Республикэм щыщщ).
НэхъыщIэ гупым хиубыдэхэм ящыщу япэ увыпIэр лъысащ Илюшин Михаил, Погуло Даниил етIуанэщ (Ставрополь край), Къэбэрдей-Балъкъэрым щыщ Бахъуэ Ислъам ещанэщ.
Чэщанэм и ещанэ къатым и щхьэгъубэм пкIэлъеймкIэ дэкIуеяхэщ щIалэ нэхъыжьхэр. 
Абы бжьыпэр щиубыдащ Ставрополь крайм щыщ Несмачный Виктор, етIуанэ увыпIэр къихьащ абы и лъахэгъу Миляев Сергей. Шэшэн Республикэм къикIа Шавхалов Абдул-Хьэлим ещанэщ. 
МахуиплI зэхьэзэхуэм кърикIуахэр къапщытэжынурэ дэтхэнэ Iыхьэми балл нэхъыбэ къыщызыхьахэм елъытауэ текIуахэмрэ къыхэжаныкIахэмрэ ягъэлъэпIэнущ. 
БАХЪСЭН Азэмэт.
  • 53 просмотра
Поделиться:

Читать также:

03.05.2024 - 09:08 → НОБЭ
02.05.2024 - 12:21 → НОБЭ
27.04.2024 - 09:56 → НОБЭ
25.04.2024 - 09:00 → НОБЭ
24.04.2024 - 13:21 → ЩIым и махуэ