Псори кърагъэзэгъ

ЗыхуэпэкIэм мыхьэнэ ирату игъащIэм къокIуэкI. ЦIыху гуп зэхэту уаздыхэплъэм, Iэмал имыIэу яхэплъэгъуэнущ зэкIужу хуэпа зыбжанэ. Ахэр къахощ. Абы ящыгъыр къэмыхъуа зырызу е лъэпсейуэ щымытынкIэ Iэмалыншэкъым - къызэрыгуэкI дыдэми игъэдахэнущ, ар и ныбжьым, и Iэпкълъэпкъым, зыхыхьэ Iуэхум гупсысэ хэлъу къыхухихмэ. ЕкIуу зызыхуэпэну хуеймкIэ, нобэ хуэдэу Iэмалрэ зэфIэкIрэ щыщыIа къэхъуакъым - щыгъыныр куэдщ, ахэр къахуэмыщэхун хуэдэу цIыхухэми къулейсыз яхэткъым, ауэ гъэщIэгъуэнращи, нэхъыбэ щыIэху, зыхуэпэкIэмыщIагъэм нэхъ зиубгъуурэ макIуэ. Псом нэхъ гурымыхьыр цIыхур къыщыувыIэн хуей гъунапкъэ гуэр зэрыщымыIэжырщ - ухуеймэ сыти щытIагъэ - «къокIу»,  «къозэгъ».

Кърагъэзэгъ ныбжь хъарзынэ зиIэ цIыхубз пIащэм и бгъэгум хуэфIу зыгуэрым и сурэтышхуэ тещIыхьауэ ар къыщыздрихьэкIыр, абы зэщIэпщIыпщIэу цIуугъэнэ гуэрхэр хэгъэуэжауэ. КърагъэкIу зи дахэгъуэ пщащэм и майкэм е иджыпсту псоми ящыгъ футболкэхэм щхьэ къупщхьэ, езым хуэдизу, тету дэтыныр, хьэмэрэ нэхъ екIуIуэу хуэпа хуэдэм уеплъыжыIуэрэ, щылэ плIэ щыгъым удз гъэгъа сурэту япэщIыкIэ хэплъэгъуахэр Iупэ плъыжь защIэу къыщыщIэкIым деж.

- Я  щIалэгъуэщ, иджыпсту ар модэщ, - дэни щызэхэпхынур аращ. Сыт хуэдэ модэ? «Модэ» псалъэм сыткIэ пэгъунэгъу а псор?

БлэкIа лIэщIыгъуэм и кум нэсыху модельерхэм цIыхубзхэм хьэдэгъуэдахэу лей ирахыу щытащ.  Джейм и пащIэр зэрылъэфа куэншыбэр (корсетхэр) псоми ящIэлърэ, ар къарууэ яIэмкIэ зэпакъузыкIыжу. Абы къыкIэщIихуа лыр щIэпIиикIыу къэнарэ, абыкIи ягу мызагъэу, бантик зэрыдзаишхуэхэр трагъэуэжу. Нобэ а псом уеплъмэ, дыхьэшхэн дыдэ къыпщохъу.

 ЛIэщIыгъуэ блэкIам ипэхэм а псор IуигъэкъэбзыкIыу, дуней псом цIыхубзу тетыр хуиту зыгъэбэуэжар, щыгъыныгъуэ тынш екIур къахуэзыхьар Шанель Габриелщ (Коко). АрщхьэкIэ, зы IуэхущIафэ тэмэм къэунэхуркъым абы пэувын гуэр щIымыгъуу. Арати, къэунэхуащ нэгъуэщI зы итальян модельер цIыхубз. Коко и щыгъыныгъуэ зэпэщхэм бгъурыту абы къыщIиутIыпщыкIыу хуежьащ хьэдэгъуэдахэхэр: цIыхубз Iупэу щIа жыпхэр, лъакъуэ пцIанэхэр сурэту зыхэщIыхьа бостейхэр, бзу сурэту щIа метхэр, къуэлэныкIэ ямылейхэр. Коко абы кIэлъыплъри, куэдрэ елIэлIакъым:

- ЦIыхур цIапIэу щытын хуейщ апхуэдэ щыгъыныгъуэ къигупсысын щхьэкIэ. Ар зыхуэдэн хуейр щIыпIэ «щхьэхуэхэм» щызэхуэс цIыхубзхэрщ. А итальян IэфIейлъэфIейр сэ хьэрхуэрэгъу къысхуэхъуфынукъым… Ар зэхэзыхам Париж зыщиIэжьэжакъым.

Ноби дуней псом щынэхъ къулей дыдэхэм ящыщ Ротшильд унагъуэм япхъу Дианэ япэу гупым хашэн хуей щыхъум, Коко ираджащ, нэгъуэщI щIыпIэ щрагъэда бостейм ирагъэплъыну. Бостейр щыгъыу къыщIэкIа хъыджэбзым,  и бгъэдыхьи и епхъуи зы ищIу, лейуэ кIэрытыр къыкIэриудри, езым къызэрыригъэзэгъым хуэдэу зэригъэзэхуэжащ, мыдрейхэри пэрыуакъым.  Хъыджэбзыр балым къикIыжа нэужь къажриIащ Коко зэлэжьыжа  и бостейр псоми я нэм къызэрыфIэнар.

- ЦIыхубз лыфIэхэр диIэщ, гъуэншэдж зэвыр щатIагъэрэ абы плIэ кIэщI къешыхьэкIыпауэ пагъэувэжу - Коко абыхэм я щIыбагъымкIэ щыкIэлъыплъамэ, тобэ ирехъуи, гъынт. Апхуэдизыр тепхъуэншэрэ икIи зекIуэу уеплъыныр…

Зи гугъу тщIы модельерым щыгъыну къигупсысар лъэгуажьэм фIокIри, лъэнкIапIэм икум къыщоувыIэ.

- Лъакъуэм я нэхъ дахэр зыфIэтми, гупэкIэ къыхуэкIуэр зэплъыр и нэкIурщ, ауэ ар къыщызэплъэкIыжкIэ (ар Iэмал имыIэу къызэплъэкIыжынущ), нэр зытехуэр лъэгуажьэ щIагъ къэщIеипIэрщ - ар зэи дахэнукъыми, къыщIэщын хуейкъым, - жиIэгъащ  модэ мыкIуэдыжын къэзыгупсысыфа Шанель. А игъэува мардэми зэи яхутекIакъым ар, адрей модельерхэм кIэ кIыхьхэр къыщрагъажьи  кIэ кIэщIыбзэхэм щыхуэкIуи.

Анэм зыхуэпэкIэ имыщIэмэ, абы къыщIэхъуэ хъыджэбз цIыкIум а екIур тыншу  къыпхуегъэщтэжынукъым.  «Модэ» гурымыхьым къапикIухьакъым сабийхэми. Бэзэрхэм ущызрамыгъакIуэу телъщ япэ къаIэрыхьэ щэкIым япэ къэсым къыхищIыкI бостей, пыIэ, вакъэ цIыкIухэр. Сабий садхэм я зы дауэдапщэ зэвгъэлъагъу - а хьэпшып мыфэмыцхэр здэкIуэр къэфщIэнущ. ИгъащIэм жаIэ - хьэпшыпым щIэупщIэхэр щыщыIэкIэ, зыщэхуни къахэкIынущ: къызыхэщIыкIар, укъиуIэу, капроным я нэхъ къурэщ, цIугъэнэр тебгъащ, абыхэм я щIыIужым клеижь къызэрыгуэкIкIэ тегъэпщIэжащ а зи гугъу тщIа удз гъэгъа, бзу сурэтхэр… Ар къэзыщэхур анэращ. Нэхъ пудыр къещтэ, жыпIэнщи, щэкI къабзэлъабзэ къэпщэхуу, ар уэ езым хуэбдыным е хуебгъэдыным нэхъыбэ текIуадэркъым. АтIэ анэу хъуам щIэкIыу ахэр щхьэ къащтэрэ?  КъагурымыIуэным е емыгугъуным къыхэкIрэ?

ЕкIур сыт хуэдэ зэманми ейщ, абы кIуэдыпIэ иIэкъым, псом ящхьэр ар къыхэпхыфынырщ.

Шэрэдж Дисэ.